ខេត្តពោធិ៍សាត់៖ រឡូកិនដី រអិលបុកចូលផ្ទះប្រជាពលរដ្ឋបណ្ដាលឲ្យកិនកុមារាម្នាក់ស្លាប់យ៉ាងអាណោចអាធ័ម។
ហេតុការណ៍នេះបានកើតឡើងកាលពីវេលាម៉ោង៧និង១៥នាទីព្រឹក ថ្ងៃទី២១ ខែមីនា ឆ្នាំ២០១៦ នៅលើកំណាត់ផ្លូវជាតិលេខ៥៥ ត្រង់ចំណុចភ្នំអូរ១៧ ស្ថិតក្នុងភូមិដីក្រហម ឃុំអន្លង់រាប ស្រុកវាលវែង ខេត្តពោធិ៍សាត់ ។
លោក អនុសេនីយ៍ឯក ពុធ ប៊ុនឈឿន មេបញ្ជាការដ្ឋានកងរាជអាវុធហត្ថស្រុកវាលវែងបានឲ្យដឹងថា កុមារារងគ្រោះឈ្មោះ លី សៀវល័យ អាយុ ២ឆ្នាំ រស់នៅភូមិឃុំកើតហេតុ ក្នុងបន្ទុកគ្រួសារឪពុកម្ដាយឈ្មោះ ពេជ ឆាយតេង អាយុ៤០ឆ្នាំ មុខរបរយោធាសឹករងស្រុក។
លោកមេបញ្ជាការបន្តថា ហេតុការណ៍នេះបង្កឡើងដោយគ្រឿងចក្រ អាឡូ បង្ហាប់ដីមួយគ្រឿង ពណ៍លឿង បើកបរដោយឈ្មោះ សៅ ឌី ភេទប្រុស អាយុ ២១ ឆ្នាំ រស់នៅភូមិត្រពាំងត្រោក ឃុំប្រាំបីមុំ ស្រុកថ្ពង ខេត្តកំពង់ស្ពឺ ។
លោកអនុសេនីយ៍ឯកបន្តទៀតថា ករណីខាងលើនេះតាមការបញ្ជាក់ពី សាក្សីឃើញហេតុការណ៏នៅទីនោះត្រូវបានគេសង្ស័យអាចគ្រឿងចក្រនេះ មានបញ្ហាផ្នែកម៉ាស៊ីន រឺអ្នកបញ្ជាក៏ថាបាន ព្រោះសុខៗស្រាប់តែគេឃើញរអិលបុកចូលក្នុងផ្ទះ បណ្ដាលឲ្យស្លាប់កុមារាម្នាក់បែបនេះ ហើយវត្ថុតាងគ្រឿងចក្របង្កត្រូវបានសមត្តកិច្ចនគរបាលយកទៅរក្សាទុក រងចាំ ដោះស្រាយគ្នាតាមផ្លូវច្បាប់ នៅអធិការដ្ឋាននគរស្រុកវាលវែង ៕ ប៉ឹម ពិន
