ភ្នំពេញ៖ នៅព្រឹកថ្ងៃទី២៤ ខែ មីនា ឆ្នាំ ២០១៦នេះ ក្រុមការងារអនុសាខាកាកបាទក្រហមកម្ពុជា ខណ្ឌសែនសុខ លោក លី សាវេត ប្រធានកិត្តិយសអនុសាខា បានចុះសាកសួរសុខទុក្ខ និងនាំយកអំណោយមនុស្សធម៌របស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ទៅចែកជូនដល់ប្រជាពលរដ្ឋមានជីវភាពខ្វះខាត និងជនងាយរងគ្រោះចំនួន២០គ្រួសារ មកពី៤ភូមិ នៅក្នុងសង្កាត់ទឹកថ្លា។
ទន្ទឹមនឹងការពាំនាំនូវសេចក្តីផ្តាំផ្ញើសាកសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់លោកតាលោកយាយបងប្អូនទាំងអស់ លោកប្រធានកិត្តិយសអនុសាខា ក៏សូមលើកទឹកចិត្តឲ្យគ្រួសារទាំងអស់បន្តខិតខំប្រកបរបររកទទួលទានទៅតាមលទ្ធភាពជាបន្តទៀត ដើម្បីឲ្យជីវភាពបានប្រសើរឡើង។
អំណោយមនុស្សធម៌ដែលបានចែកជូនក្នុង១គ្រួសារៗទទួលបាន អង្ករ៣០គីឡូក្រាម មី១កេស ត្រីខ១យួរ ឃីត១ក្នុងនោះមាន(មុង១ ភួយ១ ក្រម៉ា១ សារុង១) និងថវិកាមួយចំនួន។
ដោយឡែកនាថ្ងៃដដែល លោក ថេង សុថុល ប្រធានគណៈកម្មាធិការអនុសាខាកាកបាទក្រហមកម្ពុជា ខណ្ឌសែនសុខ បាននាំយកអំណោយមនុស្សធម៌របស់សម្ដេចកិត្តិព្រឹទ្ធបណ្ឌិតរួមមាន អង្ករ៣០គីឡូក្រាម មី១កេស ត្រីខ១យួរ ឃីត១ក្នុងនោះមាន(មុង១ ភួយ១ ក្រម៉ា១ សារុង១) និងថវិកាមួយចំនួន ទៅផ្តល់ជូនប្រជាពលរដ្ឋទីទ័លក្រមានជំងឺចំនួន១គ្រួសារ ដល់លំនៅដ្ឋាន ស្ថិតនៅក្នុងភូមិត្រពាំងឈូក សង្កាត់ទឹកថ្លាផងដែរ៕
ដោយ៖ សុខ ខេមរា
