ភ្នំពេញ ៖ យុវជនម្នាក់រងរបួសធ្ងន់ធ្ងរ ហើយត្រូវបានរថយន្តសាមុយមកយកដឹកទៅសង្គ្រោះនៅមន្ទីរពេទ្យ បន្ទាប់ពីរូបគេស្រវឹងស្រា ជិះម៉ូតូធុនធំមួយគ្រឿងម៉ាកDUCK យ៉ាងលឿន ជ្រុលទៅបុករថយន្តLANCRUISER ស៊េរីទំនើបមួយគ្រឿង ចំពីក្រោយយ៉ាងពេញទំហឹង បណ្ដាលឲ្យ ផ្លោងបោកផ្ទប់នឹងកញ្ចក់រថយន្តតែម្តង ។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១នឹង២០នាទីរំលងអាធ្រាតឈានចូលថ្ងៃទី១៩ ខែកក្កដា ឆ្នាំ២០១៥ នៅមុខភោជនីយដ្ឋាន តាយតាយ តាមបណ្តោយផ្លូវព្រះមុនីវង្ស សង្កាត់បឹងរំាង ខណ្ឌដូនពេញ ។
តាមប្រភពពីកន្លែងកើតហេតុបានឱ្យដឹងថា មុនពេលកើតហេតុគេបានឃើញយុវជនម្នាក់បានជិះម៉ូតូធុនធំមួយគ្រឿងម៉ាក DUCK ពាក់ស្លាកលេខភ្នំពេញ1CA-9797 ដោយធ្វើដំណើរតាមណ្តោយផ្លូវព្រះមុន្នីវង្ស ក្នុង ទិសដៅពីត្បូងទៅជើងយ៉ាងលឿន លុះបើកមកដល់ចំណុចកើតហេតុខាងលើ ស្រាប់តែជ្រុលទៅបុករថយន្ត ស៊េរីទំនើបមួយគ្រឿងម៉ាក់ LANCRUISER ពណ៍ស ពាក់ស្លាកលេខភ្នំពេញ 2AE-9316 បើកបរក្នុងទិសដៅស្របគ្នាចំពីក្រោយយ៉ាងពេញទំហឹង បណ្តាលឱ្យអ្នកជិះម៉ូតូផ្លោងបោកក្បាលផ្ទប់ជាមួយនឹងកញ្ចក់រថយន្ត រងរបួសធ្ងន់តែម្តង ។
ប្រភពព័ត៌មានដដែរ បានបន្តទៀតថាក្រោយកើតហេតុនគរបាលជំនាញបានចុះមកដល់កន្លែងកើតហេតុធ្វើការវាស់វែងរួចយកម៉ូតូនិងរថយន្តទៅរក្សាទុកនៅការិយាល័យចរាចរណ៍ជើងគោកដើម្បីដោះស្រាយតាមក្រោយ ៕ស ដារ៉ា
