ខេត្តសៀមរាប៖ កម្លាំងនគរបាលនៃអធិការដ្ឋាននគរបាលក្រុងសៀមរាប បានធ្វើការស្ទាក់ឃាត់ខ្លួនបានជនសង្ស័យកាច់កសោម៉ូតូ២នាក់ជាបន្តបន្ទាប់ ក្រោយពីជនសង្ស័យបានធ្វើសកម្មភាពកាច់សោម៉ូតូ០១គ្រឿងនៅបរិវេណតំបន់អង្គរ។
ហេតុការណ៍ឃាត់ខ្លួនជនសង្ស័យធ្វើឡើងកាលពីវេលាម៉ោង៩ និង៣០នាទីយប់ថ្ងៃទី២៦ ខែមីនា ឆ្នាំ២០១៦ នៅធ្វើចំណុចបរិវេណតំបន់ អង្គរឃ្យុងយូ ក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប។
សមត្ថកិច្ចនគរបាលបានឲ្យដឹងនៅថ្ងៃទី២៨ខែមីនានេះថា បន្ទាប់ពីមានព័ត៌មានពីប្រជាពលរដ្ឋថា មានករណី ចោរលួចកាច់សោ.កម៉ូតូរបស់ជនរងគ្រោះនៅម្តុំអង្គរឃ្យុងយូ ក្នុងក្រុងសៀមរាប ទើបកម្លាំងជំនាញបានសហការជាមួយនគរបាលការិយាល័យអន្តរាគមន៍នៃស្នងការដ្ឋាននគរបាលខេត្ត ស្ទាក់ចាប់បានជនសង្ស័យចំនួន២នាក់ជាបន្តបន្ទាប់។
ប្រភពបានបន្តថា ជនសង្ស័យមានឈ្មោះ ស៊ួត សង់ ភេទប្រុស អាយុ២០ឆ្នាំ រស់នៅភូមិគោកចាស់ ឃុំស្រែខ្វាវ ស្រុកអង្គរជុំ ខេត្តសៀមរាប រូបគេបានសារភាពថា ធ្លាប់បានធ្វើសកម្មភាពលួចកាច់សោ.កម៉ូតូបានចំនួន០២ដង រួចមកហើយ នៅក្នុងក្រុងសៀមរាប និងជាច្រើនដងទៀតនៅក្នុងស្រុកមួយចំនួនដូចជា ស្រុកអង្គរជុំ ស្រុកស្រីស្នំ និងស្រុកក្រឡាញ់ លើកចុងក្រោយនៅអង្គរឃ្យុងយូ ក៏ត្រូវបានកម្លាំងនគរបាលក្រុងសៀមរាបយើងធ្វើការឃាត់ខ្លួនបានក្នុងក្រុងសៀមរាបតែម្តង ព្រមទាំងដកហូតបានម៉ូតូរបស់ជនរងគ្រោះមកវិញ។ ចំណែកជនសង្ស័យម្នាក់ទៀតឃាត់ខ្លួនបាននៅថ្ងៃទី២៧ ខែមីនា ឆ្នាំ២០១៦មានឈ្មោះ ចាន់ សុបិន្ត ភេទប្រុស អាយុ២៣ឆ្នាំ រស់នៅស្រុកអង្គរជុំ និងដកហូតម៉ូតូបានចំនួន០២គ្រឿង បន្ថែមទៀតនៅក្នុងផ្ទះរបស់ជនសង្ស័យ។
ជនរងគ្រោះមាន ឈ្មោះប៉ិច ប្រុស ភេទប្រុស អាយុ៤៩ឆ្នាំ រស់នៅភូមិស្វាយដង្គំ សង្កាត់ស្វាយដង្គំ ក្រុង-ខេត្តសៀមរាប ដែលត្រូវបានចោរលួចកាច់សោ.ក នៅចំណុចបរិវេណតំបន់ អង្គរឃ្យុងយូ ក្រុងសៀមរាប កាលពីវេលាម៉ោង៩ និង៣០នាទីយប់ថ្ងៃទី២៦ ខែមីនា ឆ្នាំ២០១៦។
បច្ចុប្បន្ន ជនសង្ស័យចំនួន០២នាក់ រួមនិងវត្ថុតាងម៉ូតូរបស់ជនរងគ្រោះចំនួន០៣គ្រឿង ត្រូវបាននគរបាលព្រហ្មទណ្ឌនៃអធិការដ្ឋាននគរបាលក្រុងសៀមរាបកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធីច្បាប់៕
ដោយ៖ ជានិរន្ដរ៍
