ខេត្តស្វាយរៀង:ស្ត្រីម្នាក់បានរងរបួសធ្ងន់សន្លប់ស្តូកស្តឹងនឹងកន្លែង ខណ:ជួបករណីគ្រោះថ្នាក់ចរាចរណ៍រវាងម៉ូតូនិងម៉ូតូ បុកគ្នាយ៉ាងពេញទំហឹងបង្កការភ្ញាក់ផ្អើល ដល់អ្នកភូមិ និងអ្នកធ្វើដំណើរទាំងព្រឹក។

ហេតុការណ៍នេះបានកើតឡើងកាលពីវេលាម៉ោង១១និង៥០នាទីថ្ងៃទី៨ ខែកញ្ញា ឆ្នាំ២០២១ លើផ្លូវជាតិលេខ១៣ក្រាលកៅស៊ូ នៅចំណុចផ្សារកំពង់ត្រាច ភូមិកំពង់ត្រាច ឃុំកំពង់ត្រាច ស្រុករមាសហែក ខេត្តស្វាយរៀង។

យោងតាមសមត្ថកិច្ចនគរបាលស្រុកបានឲ្យដឹងថាស្ត្រីដែលរងរបួសធ្ងន់មានឈ្មោះ ហែម សារ៊ី  អាយុ ៥១ឆ្នាំ មុខរបរកសិករ រស់នៅភូមិត្រពាំងពពេល  ឃុំអម្ពិល ស្រុករមាសហែក ខេត្តស្វាយរៀង ជិះម៉ូតូម៉ាកហុងដាសេ១២៥ពណ៌-ខ្មៅ ស៊េរី ២០១៤ ពាក់ស្លាកលេខ ស្វាយរៀង ១D ៩៦៩៤។

ចំណែកភាគីបង្កហេតុមិនត្រូវបានស្គាល់អត្តសញ្ញាណនោះទេ ក្រោយពីឃើញសភាពការណ៍មិនស្រួលក៏បានរត់គេចខ្លួនបាត់ស្រមោលបន្សល់តែម៉ូតូម៉ាកហុងដាសេ១២៥ស៊េរី ២០២១

ពាក់ស្លាកលេខ ព្រៃវែង១S៧៦៦៤នៅនឹងកន្លែង។

តាមសាក្សីបានឲ្យដឹងថាមុនកើតហេតុមានស្ត្រីម្នាក់បានជិះម៉ូតូមួយគ្រឿងម៉ាកហុងដាសេ១២៥ពណ៌ខ្មៅសេរី ២០១៤ ពាក់ស្លាកលេខ ស្វាយរៀង ១D ៩៦៩៤លើផ្លូវជាតិលេខ១៣ក្រាលកៅស៊ូ

នៅចំណុចផ្សារកំពង់ត្រាចក្នុងទិសដៅពីត្បូងទៅជើងស្រាប់តែមានបុរសម្នាក់ជិះម៉ូតូមួយគ្រឿងម៉ាកហុងដាសេ១២៥ស៊េរី ២០២១ ពាក់ស្លាកលេខ ព្រៃវែង១S៧៦៦៤

ក្នុងទិសដៅពីជើងទៅត្បូងមិនប្រកាន់ស្ដាំបុកយ៉ាងពេញទំហឹងបង្កការភ្ញាក់ផ្អើលតែម្ដង។

ក្រោយមកស្ត្រីដែលរងរបួសធ្ងន់ត្រូវបានក្រុមគ្រួសារបញ្ជូនទៅសម្រាកព្យាបាលនៅមន្ទីរពេទ្យ ខេត្តស្វាយរៀងករណីនេះសមត្ថកិច្ចបានវាស់វែងអូសយកវត្ថុតាងម៉ូតូទាំង២គ្រឿងមករក្សាទុកនៅអធិការដ្ឋាននគរបាលស្រុករមាសហែកដើម្បីដោះស្រាយពេលក្រោយតាមច្បាប់៕

ដោយ យឹម សុថាន