ភ្នំពេញ៖ បុរសជាកម្មករជាងដែក ម្នាក់បានរងរបួសបាក់ជើងឆ្វេង៣កង់ និងបែកក្បាលរងរបួសធ្ងន់ សង្ស័យថា ខ្យល់គរ ព្រោះបន្ទាប់ពីចប់ការងារពីម៉ោង ៦ល្ងាច រហូតមកដល់ម៉ោងកើតហេតុ ជនរងគ្រោះនៅមិនទាន់ហូបបាយនៅឡើយទេ ហើយបានរលិលជើងធ្លាក់ពីផ្ទះជាន់ទី៣ ។
ហេតុការណ៍ភ្ញាក់ផ្អើល នេះបានកើតឡើងកាលពីវេលាម៉ោង១០ និង១០នាទីយប់ ថ្ងៃទី ៣ ខែមេសា ឆ្នាំ២០១៦ នៅចំណុចផ្ទះល្វែងគេអោយជួលជុល ក្នុងបុរីញ៉ូថោន ស្ថិតក្នុងភូមិក្បាលដំរី សង្កាត់កកាប ខណ្ឌពោធិសែនជ័យ ។
បុរសរងគ្រោះមានឈ្មោះ ហ៊ន ហឿន អាយុ ៤០ឆ្នាំមុខរបរកម្មករជាងដែក ស្នាក់នៅកន្លែងកើតហេតុ មានទីលំនៅភូមិពាលទូល ឃុំលើកដែក ស្រុកកោះធំ ខេត្តកណ្តាល ។
តាមប្រភពពីប្អូនថ្លៃដែលធ្វើការជាមួយគ្នា បានប្រាប់អោយដឹងថា នៅមុនពេលកើតហេតុ បន្ទាប់ពីចប់ការងារនៅម៉ោង៦ល្ងាច ហើយគាត់ជាប្អូនថ្លៃបានទៅទិញបាយម្ហូប យកមកហូបជុំគ្នា តែជនរងគ្រោះមិនបានហូបបាយនោះទេព្រោះថាអត់ស្រួលខ្លួនសុំឡើងទៅងូតទឹក សំរានមុនហើយ លុះដល់ម៉ោងកើតហេតុ ក៏ស្រាប់តែមានការឮថា មានមនុស្សធ្លាក់ពីលើផ្ទះ ដល់ពេលគាត់ចេញមកមើល ទើបដឹងថាជាបងថ្លៃខ្លួនឯងសោះ បង្កអោយមានការភ្ញាក់ផ្អើលដល់ប្រជាពលរដ្ឋទូរស័ព្ទទាក់ទងទៅសមត្ថកិច្ចមូលដ្ឋានចុះមកមើលនៅកន្លែងតែម្តង ។
ក្រោយពេលកើតហេតុ កើតហេតុជនរងគ្រោះត្រូវរថយន្តក្រុមសង្គ្រោះ អង្គភាព ៧១១ មកដឹកទៅសង្គ្រោះបន្ទាន់នៅមន្ទីរពេទ្យព្រះកុសុមៈ ៕
ដោយ៖ សុខា សែនជ័យ
