ក្រុងប៉ោយប៉ែត៖ រដូវចូលឆ្នាំខ្មែរប្រពៃណីជាតិជិតគៀកចូលមកដល់ទៅហើយតែនៅច្រកទ្វារអន្តរជាតិប៉ោយប៉ែតគេសង្កេតឃើញមានភាពស្ងាត់ជ្រងំខុសប្លែកពីឆ្នាំមុនៗដែលពលករចំណាកស្រុកតែងតែបានសម្រុកត្រឡប់មកលេងឪពុកម្ដាយនៅស្រុកកំណើតនិងជួបជុំមិត្តភក្តិបងប្អូន។
មន្ត្រីប្រចាំការនៅច្រកមួយនេះបានប្រាប់ឲ្យដឹងថា នៅក្នុងឆ្នាំ២០១៦នេះពលករខ្មែរមានការថយចុះទាំងស្របច្បាប់និងមិនស្របច្បាប់មកលេងស្រុកកំណើត ខុសពីឆ្នាំ២០១៥ កន្លងទៅឲ្យតែមុនរដូវចូលឆ្នាំខ្មែរជិតចូលមកដល់ចាប់ពីថ្ងៃទី១-២-៣ ខែមេសា ពលករចំណាកស្រុកតែងតែនាំគ្នាត្រឡប់មកឲ្យរពុយចូលមកប្រទេសកម្ពុជាតាមច្រកទ្វារអន្តរជាតិប៉ោយប៉ែតដើម្បីទៅកាន់ស្រុកកំណើតចូលរួមពីធីបុណ្យចូលឆ្នាំប្រពៃណីខ្មែរជួបជុំឪពុកម្ដាយ បងប្អូន និងមិត្តភក្តិក្នុងស្រុកភូមិ។ មន្ត្រីដដែលបានបន្តថា កាលពីចូលឆ្នាំ ឆ្នាំ២០១៥ មកដល់ថ្ងៃទី៣-៤-៥ គឺនៅតាមផ្លូវជាតិលេខ៥ ចំណុចម្ដុំរង្វង់មូលមានការកកស្ទះដោយរថយន្តនិងអ្នកដំណើរជាពលករចំណាកស្រុកដែលបានវិលត្រឡប់ពីធ្វើការងារនៅប្រទេសថៃទៅលេងស្រុកកំណើតក្នុងឱកាសបុណ្យចូលឆ្នាំខ្មែរ។ ក៏ប៉ុន្តែសម្រាប់ឆ្នាំ២០១៦នេះ រហូតមកដល់ថ្ងៃទី៤-៥ទៅហើយនៅមានភាពស្ងាត់ជ្រងំដែលនេះបង្ហាញថា មានចំនួនថយចុះប្រមាណ៥០ភាគរយនៃពលករទៅលេងស្រុកកំណើត។
បើតាមប្រភពពីមន្ត្រីសមត្ថកិច្ចនៅច្រកដដែលនេះបង្ហើបឲ្យដឹងដែរថា ការដែលចំនួនពលករថយចុះមិនទៅលេខស្រុកកំណើតនេះអាចបណ្ដាលមកពីកម្លាំងសមត្ថកិច្ចនិងតម្រួតថៃរឹតបន្តឹងព្រមទាំងគៀបយកប្រាក់ពីពលករហូសកំរិតដែលសូម្បីបង្វេចខោអាវនិងវ៉ាលីក៏រាប់ចំនួនគិតលុយដែរ។ បញ្ហានេះអាចធ្វើឲ្យពលករមួយចំនួនបង្វែទិសពីការឆ្លងកាត់ច្រកទ្វារដោយស្របច្បាប់ទៅរកច្រករបៀងដើម្បីគេចពីការបង់ប្រាក់ពិសេសតាមច្រករបៀងក្នុងស្រុកម៉ាឡៃ ស្រុកកំរៀង សំពៅលូន ស្ថិតក្នុងខេត្តបាត់ដំបង។
អភិបាលក្រុងប៉ោយប៉ែតលោក ង៉ោ ម៉េងជ្រួន បានឲ្យដឹងថា ការថយចុះពលករមកលេងស្រុកកំណើតនេះយើងមិនអាចទាន់កំណត់បាននៅឡើយទេព្រោះទើបតែថ្ងៃទី១-២-៣ ។ ដូច្នេះយើងរង់ចាំមើលរហូតដល់ថ្ងៃទី៨-៩-១០ នោះទើបអាចកំណត់ថា ពលករមកលេងស្រុកកំណើតច្រើនឬក៏តិច៕
ដោយ៖ វណ្ណា
