កូរ៉េខាងជើងបានបង្កើតសកម្មភាពផលិតសារធាតុ Plutonium ជាសារធាតុសំខាន់សម្រាប់ការផលិតគ្រាប់បែកបរមាណូ ក្នុងពេលដែលស្ថានភាពនៅក្នុងតំបន់កាន់តែតានតឹងពីមួយថ្ងៃទៅមួយថ្ងៃ។
រូបភាពថតតាមប្រព័ន្ធផ្កាយរណបានឲ្យឃើញថា រោងចក្រនៅតំបន់Yongbyon បានចាប់ផ្តើមដំណើរការ ផលិតសារធាតុសម្រាប់បរមាណូ ។ អ្នកឯកទេស ស្តីអំពីគ្រាប់បែកបរមាណូអាមេរិកបានបញ្ជាក់កាលពីថ្ងៃទី៤ខែមេសាថារោងចក្របានចាប់ផ្តើមដំណើរការ ដោយមានផ្សែងចេញពីរោងចក្រYongbyon។នៅក្នុងរបាយការណ៍ដែលបានផ្សាយនៅលើគេហទំព័រ38 North បញ្ជាក់ថា ក្នុងរយៈពេល៥សប្តាហ៍ចុងក្រោយនេះ គេឃើញមានផ្សេងចេញពីរោងចក្របរមាណូរបស់កូរ៉េខាងជើង។
សកម្មភាពរបស់កូរ៉េខាងជើងកើតឡើងក្នុងពេលដែលស្ថានភាពនៅក្នុងតំបន់កាន់តែតានតឹងពីមួយថ្ងៃទៅមួយថ្ងៃ ដោយសារតែការធ្វើសមយុទ្ធរបស់កូរ៉េខាងត្បូងនិងអាមេរិក ដែលជាហេតុជម្រុញឲ្យកូរ៉េខាងជើងធ្វើការសាកល្បងបាញ់គ្រាប់មីស៊ីលឥតឈប់ឈរ។
បច្ចុប្បន្ន កូរ៉េខាងជើងមានគ្រាប់បែកបរមាណូប្រមាណ 10-16គ្រាប់ ហើយប្រទេសនេះនឹងផលិតបន្ថែមរហូតដល់១០០គ្រាប់ក្នុងរយៈពេល៥ឆ្នាំខាងមុខ។
នៅក្នុងព្រឹត្តការណ៍មួយផ្សេងទៀតដែលពាក់ព័ន្ធនោះដែរ សារព័ត៌មានកូរ៉េខាងត្បូងបានផ្សាយថាកូរ៉េខាងជើងបានស្នើរចចារជាមួយអាមេរិកទ្វេភាគីស្តីពីបញ្ហាបរមាណូ និងបញ្ហាផ្សេងៗដែលពាក់ព័ន្ធក្នុងនោះមានការដាក់ទណ្ឌកម្មទៅលើកូរ៉េខាងជើងពីអាមេរិកនិង អង្គការសហប្រជាជាតិ។
រដ្ឋាភិបាលទីក្រុងព្យុងយ៉ាង បានបញ្ជូនលិខិត របស់គណកម្មាធិការការពារជាតិកូរ៉េខាងជើង ស្នើរសុំអាមេរិក ចចារដើម្បីបញ្ចៀសការប៉ះទង្គិចគ្នាដោយយោធា។ នៅក្នុងលិខិតនោះ បានបញ្ជាក់ថាកូរ៉េខាងជើង ចង់មានស្ថេរភាពនៅក្នុងទំនាក់ទំនងប្រទេសទាំងពីរជាជាងដាក់ទណ្ឌកម្ម និងការដាក់សម្ពាធផ្នែកយោធា។
កន្លងមកអាមេរិក ជប៉ុន និងកូរ៉េខាងត្បូង បានសន្យាសហការគ្នាស្អិតល្មួតជាងនេះក្នុងការអនុវត្ដ ច្បាប់ដាក់ទណ្ឌកម្មរបស់ អ.ស.ប ប្រឆាំង កូរ៉េខាងជើង ក្រោយពេលដែលប្រទេស នេះមានសកម្មភាពឌឺដងបង្កឱ្យតានតឹងកាន់តែខ្លាំងពីមួយថ្ងៃទៅមួយ ថ្ងៃ ។
មានប្រសាសន៍ក្រោយជំនួបពិភាក្សាត្រីភាគី ប្រធានាធិបតីអាមេរិកលោក បារ៉ាក់ អូបាម៉ា ប្រធានាធិបតីកូរ៉េខាងត្បូង លោកស្រី ផាក គឿនហេ និងនាយករដ្ឋ មន្ដ្រីជប៉ុនលោក ស៊ីនហ្សូ អាបេ បញ្ជាក់ ថា ការអនុវត្ដច្បាប់ទណ្ឌកម្មគឺជាគន្លឹះ ដ៏សំខាន់ក្នុងការទប់ស្កាត់កូរ៉េខាងជើង បន្ដសកម្មភាពឌឺដងគំរាមកំហែងសន្ដិសុខនៅក្នុងតំបន់ ។
ប្រធានាធិបតីកូរ៉េខាងត្បូងលោកស្រីផាក គឿនហេ បញ្ជាក់ថា មេដឹកនាំ ប្រទេសទាំងបី បានពិភាក្សាពិវិធីសាស្ដ្រ ទប់ទល់នឹងកូរ៉េខាងជើងដែលបានបង្កើនកម្មវិធីបរមាណូ និងកាំជ្រួចមីស៊ីល។ ទីក្រុងព្យុងយ៉ាងនឹងទទួលរងការដាក់ទណ្ឌ កម្មច្រើនជាងនេះប្រសិនបើកូរ៉េខាងជើងនៅតែបន្ដឌឺដងនោះ ។
យ៉ាងណាក៏ដោយទង្វើថ្មីរបស់ក្រុងព្យុង យ៉ាងពេលនេះមិនមែនជារឿងគួរឱ្យត្រេក ត្រអាលឡើយ ព្រោះវានឹងធ្វើឱ្យស្ថានការណ៍នៅក្នុងឧបទ្វីបកូរ៉េដែលកំពុងតានតឹងស្រាប់រឹតតែឡើងកម្ដៅ ខ្លាំងមួយកម្រិតទៀត។ សូមជម្រាបជូនថា គ្រាន់តែនៅ ៣ខែដើមឆ្នាំ២០១៦ នេះរបបក្រុងព្យុងយ៉ាងបានធ្វើការសាកល្បងនុយក្លេអ៊ែរ និងបាញ់គ្រាប់មីស៊ីលចំនួន៤ដង។ ម្យ៉ាង ទៀតការប្រកាសរបស់លោកគីម ជុងអ៊ុន ថ្ងៃនេះបានកើតមានឡើងចំពេលដែល លោកស្រីប្រធានាធិបតីកូរ៉េខាងត្បូង ផាក គឿនហេ បានបញ្ជាឱ្យកងទ័ពប្រុង ប្រយ័ត្នកម្រិតខ្ពស់និងត្រៀមជើងព្រួលទប់ ស្កាត់រាល់ការគំរាមរបស់កូរ៉េខាងជើង។ ដោយឡែកចំពោះការបន្ថែមទណ្ឌកម្ម របស់បស្ចិមប្រទេស និងសហគមន៍ អន្ដរជាតិនាពេលកន្លងមកក្រុមប្រឹក្សាសិទ្ធិមនុស្សរបស់ អង្គការសហប្រជាជាតិបានកោះហៅក្រុមអ្នកជំនាញឯករាជ្យ មានសមាជិក៤៧នាក់ឱ្យអនុម័តលើ សេចក្ដីសម្រេចចិត្ដមួយអូសថ្នាក់ដឹកនាំ កំពូលៗរបស់កូរ៉េខាងជើងទៅកាត់ទោសក្នុងបទឧក្រិដ្ឋកម្មប្រឆាំង មនុស្សជាតិ ដែលជាសេចក្ដីសម្រេចចិត្ដមួយទទួល បានការគាំទ្រពីសហភាពអឺរ៉ុបនិងប្រទេស ជប៉ុន ៕
ដោយ មែវ សុធី
