ភ្នំពេញ៖ កម្លាំងនគរបាលប៉ុស្តិ៍ផ្សារកណ្ដាលទី១សហការជាមួយកម្លាំងសណ្តាប់ធ្នាប់ផ្សារកណ្តាល នៅរសៀលថ្ងៃទី៦ ខែមេសា ឆ្នាំ២០១៦នេះបានចុះទៅបង្ក្រាប និងចាប់ខ្លួនក្រុមជក់គ្រឿងញៀន និងក្រុមអនាថាចំនួន២២នាក់ ក្នុងនោះស្រី១១នាក់នៅសង្កាត់ផ្សារកណ្តាលទី១។ ប្រតិបត្តិការខាងលើនេះ កម្លាំងសមត្ថកិច្ច និងកម្លាំងសណ្តាប់ធ្នាប់របស់ផ្សារ បានធ្វើការដកហូតថ្នាំញៀន ឧបករណ៍សម្រាប់ជក់ និងអាវុធដូចជាដាវសាំម៉ូរ៉ៃ មួយចំនួនផងដែរ។

លោក ចាប ឌីណា ប្រធានផ្សារកណ្តាលបានឲ្យដឹងថា ក្រោមការណែនាំពីអភិបាលខណ្ឌដូនពេញលោក គួច ចំរើន លើការចុះរៀបចំសណ្តាប់តាមមូលដ្ឋានក៏ដូចជាប្រមូលជនអនាថានោះ លោកបានដឹកនាំកម្លាំងសណ្តាប់ធ្នាប់សហការជាមួយនគរបាលប៉ុស្តិ៍ ចុះទៅត្រួតពិនិត្យនៅទឹកដីផ្សារកណ្តាលទី១ ស្រាប់តែប្រទះឃើញពួកគេជក់គ្រឿងញៀន ក៏ធ្វើការឃាត់ខ្លួនជាបន្តបន្ទាប់តែម្តង។

បច្ចុប្បន្នជនសង្ស័យទាំងនេះ និងវត្ថុតាងត្រូវបានបញ្ជូនទៅសួរនាំ នៅអធិការដ្ឋាននគរបាលខណ្ឌដូនពេញ ដើម្បីចាត់ការបន្តតាមនីតិវិធីច្បាប់៕

ដោយ៖ ស ដារ៉ា