ក្រុងប៉ោយប៉ែត៖ ស្ត្រីមេម៉ាយម្នាក់បានជម្លៀសកូនស្រីចេញពីផ្ទះអស់រយៈពេល៣ឆ្នាំ ព្រោះតែរឿងទំនាស់ឆ្កែស៊ីមាន់ ហើយម្ចាស់មាន់ប៉ុនប៉ងសម្លាប់កូនស្រី។
ស្ត្រីឈ្មោះសួន សុភាព អាយុ៥២ឆ្នាំ មានទីលំនៅភូមិរស្មីសាមគ្គី សង្កាត់និមិត្ត ក្រុងប៉ោយប៉ែត ខេត្តបន្ទាយជ័យ នៅព្រឹកថ្ងៃទី៧ ខែមេសា ឆ្នាំ២០១៦ បានលើកដៃសំពោះនិងអំពាវនាវសូមឲ្យស្ថានប័នពាក់ព័ន្ធជួយរកយុត្តិធម៌ចំពោះកូនស្រីដែលត្រូវបានទារុណកម្មប៉ុនប៉ងសម្លាបជាច្រើនលើកតែនៅពុំទាន់ទទួលបានយុត្តិធម៌ បើទោះជារូបគាត់បានដាក់ពាក្យបណ្ដឹងតាមរយៈអាជ្ញាធរមូលដ្ឋានគ្រប់លំដាក់ថ្នាក់រហូតដល់ប្រព័ន្ធតុលាការរួចហើយក៏ដោយ ។
ស្ត្រីមេម៉ាយដែលអះអាងថារូបគាត់មានផ្ទុកមេរោគអេដស៍ផងនោះបានឲ្យដឹងទៀតថា កូនស្រីដែលគេប៉ុនប៉ងសម្លាប់ព្រោះតែរឿងកំប៉ិកកំប៉ុកនេះឈ្មោះសៀក គុណណាង អាយុ១១ឆ្នាំ។ រីឯស្ត្រីដែលបានប៉ុនប៉ងសម្លាប់កូនស្រីគាត់នោះឈ្មោះណុន គន្ធា អាយុ៣៩ឆ្នាំ ជាអ្នករស់នៅក្បែរខាងនិងគ្នា។ ការដែលស្ត្រីឈ្មោះណុន គន្ធា ព្យាយាមប៉ុនប៉ងធ្វើបាបមកលើកូនស្រីរបស់គាត់នេះដោយសារតែស្ត្រីខាងលើអាងប្ដីធ្វើជាទាហាន។
ស្ត្រីមេម៉ាយសួន សុភាព បានរំលឹកថាកាលពីថ្ងៃទី៥ ខែឧសភា ឆ្នាំ២០១៣ ឆ្កែមួយក្បាលជា របស់ស្ត្រីឈ្មោះណុន គន្ធា បានមកស៊ីមាន់របស់គាត់អស់ចំនួន២ក្បាល។ ពេលនោះកូនស្រីរបស់គាត់ឈ្មោះ សៀក គុណណាង បានទៅដេញឆ្កែកុំឲ្យស៊ីមាន់បន្តទៀតស្រាប់តែស្ត្រីរូបនេះព្រមទាំងកូនរបស់ស្ត្រីនេះផងបាននាំគ្នាវាយមកលើកូនស្រីរបស់គាត់បណ្តាលឲ្យសន្លប់ធ្លាក់ឈាមចេញពីមាត់។
ស្ត្រីរូបនេះបានបញ្ជាក់ថា ទង្វើនិងសកម្មភាពដែលបានវាយមកលើកូនស្រីរបស់គាត់នោះមិនមែនកើតមាន១លើក២លើកប៉ុណ្ណោះទេ គឺកើតមាន៥-៦ដងមកហើយគ្រាដែលរូបគាត់ជាម្តាយចេញក្រៅផ្ទះរវល់ទៅធ្វើការឬទៅផ្សារ។ ស្ត្រីមេម៉ាយរូបនេះបានបន្តថា ក្រោយពីមានរឿងកើតឡើងគាត់បានទៅដាក់ពាក្យបណ្ដឹងទៅអាជ្ញាធរគ្រប់លំដាប់ថ្នាក់រហូតដល់ប្រព័ន្ធតុលាការតែរហូតមកដល់ពេលបច្ចុប្បន្ននេះនៅពុំទាន់ទទួលបានយុត្តិធម៌នៅឡើយទេ។ ការមិនទទួលបានយុត្តិធម៌នេះធ្វើឲ្យក្រុមគ្រួសារជនដៃដល់ដែលប៉ុនប៉ងសម្លាប់កូនស្រីរបស់គាត់នោះគឺរឹងរឹតតែបញ្ចើចបញ្ចើរថែមទៀត។ មានពេលខ្លះស្ត្រីឈ្មោះណុន គន្ធា បាននិយាយនិងស្រែកចំអកមកដាក់គ្រួសាររបស់គាត់ថា”អញមិនខ្លាចអ្នកណាទេ ចង់ទៅប្ដឹងដល់ណាក៏ទៅៗ ព្រោះអញមានខ្នងធំ”។
ស្ត្រីខាងលើនេះបានឲ្យដឹងដែរថា កន្លងទៅតុលាការបានកោះហៅរូបគាត់ចូលទៅរកដំណោះស្រាយម្តងដែរ ប៉ុន្តែមិនទទួលបានលទ្ធផលអ្វីនោះទេ រហូតមកទល់បច្ចុប្បន្ននេះហើយករណីនេះកាន់តែធ្វើឲ្យជនដៃដល់ធ្វើសកម្មភាពគំរាមកំហែងមកលើកូនស្រីគាត់ថែមទៀត។
ស្ត្រីសួន សុភាព បានឲ្យដឹងទៀតថា ព្រោះតែការគំរាមកំហែងពីក្រុមគ្រួសារខាងលើនេះគាត់បានជម្លៀសកូនចំនួន៤នាក់ចេញពីលំនៅដ្ឋាននៅភូមិរស្មីសាមគ្គី សង្កាត់និមិត្ត មករស់នៅជាមួយនិងផ្ទះកូនដែលពិការនៅភូមិសាមគ្គីមានជ័យ សង្កាត់-ក្រុងប៉ោយប៉ែត អស់រយៈពេល៣ឆ្នាំ ហើយកូនចៅខកខានមិនបានរៀនសូត្រព្រោះតែការគំរាមកំហែងពីស្ត្រី ណុន គន្ធា និងកូនៗដែលអាងប្ដីជាមន្ត្រីយោធានោះ។
ទាក់ទិននឹងការលើកឡើងរបស់ស្ត្រីមេម៉ាយ សួន សុភាព នេះនគរវត្តមិនអាចរកការបកស្រាយពីស្ត្រីឈ្មោះណុន គន្ធា រស់នៅភូមិរស្មីសាមគ្គី សង្កាត់និមិត្ត ក្រុងប៉ោយប៉ែតបានទេ នៅព្រឹកថ្ងៃទី៧ ខែមេសា ឆ្នាំ២០១៦ថា តើការចោទប្រកាន់របស់ស្ត្រី សួន សុភាពនោះពិតដែរឬទេ?៕
ដោយ៖ វណ្ណា
