ភ្នំ​ពេញ៖ គ្រោះអគ្គិភ័យមួយបានឆាបឆេះបន្ទប់ជួលប្រជាពលរដ្ឋមួយកន្លែងយ៉ាងសន្ធោសន្ធៅបង្កការភ្ញាក់ផ្អើលដល់បងប្អូនប្រជាពលរដ្ឋដែលរស់នៅក្បែរនាំគ្នាដងទឹកជះពន្លត់និងរាយការណ៍ទៅសមត្ថកិច្ចហៅរថយន្តពន្លត់អគ្គិភ័យចុះមកជួយធ្វើអន្តរាគមន៍ភ្លាមៗ។ ហេតុការណ៍​នេះបានកើតឡើងកាលពីវេលាម៉ោង៥និង៥០នាទីល្ងាចថ្ងៃទី២៣​ ខែវិច្ឆិកា​ ឆ្នាំ២០២១​ នៅចំណុចបន្ទប់ជួលលេខ២​ ក្នុងភូមិចំការឪឡឹក១​ សង្កាត់កាកាបទី១​ ខណ្ឌពោធិ៍សែនជ័យ​  រាជធានីភ្នំពេញ​។ 

តាមប្រភពព័ត៌មានបានឱ្យដឹងថា​ មុនពេលកើតហេតុអ្នកជួលបន្ទប់ស្នាក់នៅបានចាក់សោខាងក្រៅចាកចេញទៅធ្វើការបាត់​។ លុះមកដល់វេលាកើតហេតុខាងលើស្រាប់តែមានផ្សែងហុយចេញពីបន្ទប់លេខ២នោះ​យ៉ាងសន្ធោសន្ធៅនិងបង្កជាអណ្តាតភ្លើងចេញមកក្រៅ​។ ភ្លាមៗនោះប្រជាពលរដ្ឋដែលនៅក្បែរក៏នាំគ្នាវាយសោទម្លុះចូលយកទឹកជះពន្លត់តែគ្រប់គ្រងមិនបានព្រោះអណ្តាតភ្លើងឆេះឡើងខ្លាំងនិងគ្មានឧបករណ៍គ្រប់គ្រាន់សម្រាប់ពន្លត់អគ្គិភ័យខាងលើក៏រាយការណ៍ទៅសមត្ថកិច្ចមូលដ្ឋានហើយសមត្ថកិច្ចមូលដ្ឋានក៏រាយការណ៍បន្តទៅសមត្ថកិច្ចពន្លត់អគ្គិភ័យរាជធានីភ្នំពេញចុះមកធ្វើអន្តរាគមន៍ភ្លាមៗ។ ប្រភពដដែលបានបន្តថា​ បន្ទាប់មកគេឃេីញរថយន្តពន្លត់អគ្គិភ័យចំនួន៥គ្រឿងរបស់ស្នងការដ្ឋាននគរបាលរាជធានីមកដល់និងបានប្រេីប្រាស់អស់ទឹកចំនួន៤គ្រឿងទើបភ្លើងរលត់ទៅវិញទាំងស្រុងដោយមិនបណ្តាលឱ្យមានមនុស្សរងរបួសនោះទេ​ ហេីយក៏មិនរាលដាលដល់ផ្ទះបងប្អូនប្រជាពលរដ្ឋដទៃទៀតដែរ​ គឺខូចខាតតែសម្ភារក្នុងផ្ទះមួយចំនួនតែប៉ុណ្ណោះ។ សមត្ថកិច្ចបានសន្និដ្ឋានថា គ្រោះអគ្គិភ័យខាងលើបណ្តាលមកពីឆ្លងចរន្តអគ្គិសនី៕

ដោយ៖សុខាសែនជ័យ