ភ្នំពេញ ៖ ប្ដីប្រពន្ធពីរនាក់បានឈ្លោះប្រកែកគ្នាហេីយបែកគំនិតទៅដុតចង្ក្រានចោលធ្វេីឲ្យឆេះរាលដាលផ្ទះខ្លួនឯង និងផ្ទះអ្នកជិតខាងអស់ចំនួន២ខ្នង បង្កការភ្ញាក់ផ្អេីលដល់អ្នកភូមិ និងអាជ្ញាធរមានសមត្ថកិច្ចចុះធ្វើអន្តរាគមន៍ កាលពីវេលាម៉ោង២៣និង១០នាទីយប់ ថ្ងៃអង្គារ ទី២៣ ខែវិច្ឆិកា ឆ្នាំ២០២១ នៅចំណុចផ្ទះគ្មានលេខ ផ្លូវBT ភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ។
សមត្ថកិច្ចបានឱ្យដឹងថា ម្ចាស់ផ្ទះទី១-ឈ្មោះ ស៊ុត ពិសិដ្ឋ ភេទប្រុស អាយុ ២៧ឆ្នាំ មុខរបរយោធា រស់នៅទីតាំងខាងលើ (ត្រូវសមត្ថកិច្ចឃាត់ខ្លួនយកទៅសួរនាំនៅប៉ុស្ដិ៍នគរបាលរដ្ឋបាលដង្កោ) ។
*មូលហេតុ: ប្ដីប្រពន្ធឈ្លោះគ្នាដុតចង្ក្រានចោល ហើយក៏រាលឆេះផ្ទះតែម្ដង ។
*ប្រភេទសំណង់ : ថ្មក្រោមឈើលើ ប្រក់ស័ង្កសី ទំហំ ៥ម៉ែត្រ x ១៥ម៉ែត្រ ។
ចំពោះសម្ភារត្រូវភ្លើងឆេះខូចខាតអស់ទាំងស្រុង ។
ចំណែកម្ចាស់ផ្ទះទី២ឈ្មោះ ហ៊ុន ឡាង អាយុ ៤៨ ឆ្នាំ មុខរបរកងរាជអាវុធហត្ថខណ្ឌដូនពេញ រស់នៅទីតាំងកើតហេតុ ។
ផ្ទះរបស់គាត់ដែលឆេះជាប្រភេទសំណង់ ថ្មក្រោមឈើលើ ប្រក់ស័ង្កសី ទំហំ ៧ម៉ែត្រ x ១៦ម៉ែត្រ។
*មូលហេតុ: រាលឆេះមកពីផ្ទះទី១
ចំពោះសម្ភារក្នុងផ្ទះត្រូវបានខូចខាតទាំងស្រុង។
ក្នុងករណីអគ្គិភ័យខាងលេីនេះមិនមានមនុស្សរងរបួស ឬគ្រោះថ្នាក់ដល់អាយុជីវិតនោះទេ ដោយរថយន្តពន្លត់អគ្គិភ័យមកដល់ចំនួន ៦គ្រឿង ប្រេីប្រាស់ទឹកអស់ ៦ឡានស្មេីនឹង២៧ម៉ែត្រគូប ហេីយពន្លត់ចប់នៅវេលាម៉ោង២៣និង៣៤នាទីថ្ងៃខែឆ្នាំដដែល ៕
ដោយ ៖ ភារ៉ា ដង្កោ
