រថភ្លើងមួយខ្សែបានធ្លាក់កង់ចេញពីផ្លូវចំនួន៤ទូ ផ្នែកខាងមុខនៃរថភ្លើងនៅវេលាម៉ោង៣និង៤១នាទីទៀបភ្លឺ ថ្ងៃទី២២ ខែមេសាបណ្តាលឲ្យវិស្វកររថភ្លើងម្នាក់ស្លាប់និងអ្នកដំណើរ៨នាក់ទៀតរងបួស ។
សារព័ត៌មានយុនហាប់បានផ្សាយថា រថភ្លើង Mugunghwa បានដឹកអ្នកដំណើរ ២៧នាក់រួមមានវិស្វកររថភ្លើង២នាក់បានធ្លាក់កង់ចេញពីផ្លូវដែកនៅជិតស្ថានីយYulchon ក្នុងទីក្រុងកំពង់ផែ Yeosu ចម្ងាយពីទីក្រុងសេអ៊ូល៣៥០គីឡូម៉ែត្រនៅភាគខាងត្បូង ។
តាមមន្ត្រីប៉ូលិសនៅក្នុងតំបន់បានឲ្យដឹងថា អ្នកបើកបរមិនបានបញ្ជាឲ្យរថភ្លើងបើកយឺតៗនៅចំណុចផ្លូវកោងទើបជាហេតុនាំឲ្យរថភ្លើងបណ្តាលឲ្យធ្លាក់ផ្លូវជាហេតុនាំឲ្យរថភ្លើងដូច្នេះ។ នៅត្រង់ចំណុចនោះគេអនុញ្ញាតឲ្យបើកបរបើកត្រឹមតែ៥០គីឡូម៉ែត្រក្នុងមួយម៉ោងប៉ុណ្ណោះ ប៉ុន្តែរថភ្លើងខាងលើបានបើកក្នុងល្បឿនរហូតដល់ទៅ១២៧គីឡូម៉ែត្រទើបធ្លាក់ផ្លូវបែបនេះ ។
ក្រុមហ៊ុនផ្លូវដែកកូរ៉េខាងត្បូង Koraiបានប្រកាសផ្អាកការធ្វើចរាចរណ៍ផ្លូវរថភ្លើង ពីSuncheon ទៅYeosu ដើម្បីជួសជុលផ្លូវដែកខាងលើ ។ ចំណែកអ្នកដំណើរក្រុមហ៊ុននឹងជួលរថយន្តក្រុងសម្រាប់ដឹកទៅកាន់គោលដៅ។
តាមតួលេខរបស់ក្រសួងសន្តិសុខសុវត្ថិ ភាពចរាចណ៍កូរ៉េខាងត្បូងបានឲ្យដឹងថា ជាមធ្យមមានពី៣ទៅ៥រថភ្លើងធ្លាក់កង់ចេញពីផ្លូវក្នុងមួយឆ្នាំៗ ហើយនៅក្នុងឆ្នាំ២០១៦នេះមានករណីរថភ្លើងធ្លាក់កង់ចេញ ពីផ្លូវដែល៤លើករួចមកហើយគិតទាំងលើកនេះ៕
ប្រែសម្រួល៖ ម៉ែវ សាធី
