ភ្នំពេញ ៖ រថយន្តស៊េរីទំនេីបម៉ាក BMW បានបេីកបុករថយន្តកូរ៉េដឹកពោះត្រីពីក្រោយពេញទំហឹងហេីយរុញទៅបុករបាំងថ្មបាក់អស់២កង់ធ្វេីឱ្យរថយន្តកូរ៉េក្រឡាប់ផ្ងារជេីង រងការខូចខាតទាំងសងខាងយ៉ាងដំណំ។ ហេតុការណ៍នេះបង្កការភ្ញាក់ផ្អេីលនិងធ្វើឱ្យកកស្ទះចរាចរណ៍ដល់អ្នកដំណេីរកាលពីវេលាម៉ោង១០និង១០នាទីយប់ថ្ងៃទី១១ ខែកុម្ភៈ ឆ្នាំ២០២២ ស្ថិតនៅលេីស្ពានអាកាសក្បាលថ្នល់ ក្នុងសង្កាត់ទន្លេបាសាក់ ខណ្ឌចំការមន ជាប់ព្រំប្រទល់សង្កាត់ចាក់អង្រែលេី ខណ្ឌមានជ័យ រាជធានីភ្នំពេញ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុគេឃេីញរថយន្តកូរ៉េ១តោនកន្លះ ពណ៌ខៀវ ពាក់ស្លាកលេខភ្នំពេញ 2Z-2776 ដឹកពោះត្រីឡេីងពេញរថយន្ត និងធ្វេីដំណេីរតាមបណ្ដោយផ្លូវព្រះនរោត្ដមក្នុងទិសដៅពីជេីងទៅត្បូងហេីយឡេីងលេីស្ពានអាកាសក្បាលថ្នល់បំណងឆ្ពោះទៅផ្លូវជាតិលេខ២ តែពេល
បេីកដល់កណ្ដាលស្ពានស្រាប់តែមានរថយន្តស៊េរីទំនេីបម៉ាក BMW ពណ៌ស គ្មានស្លាកលេខ បេីកបរដោយបុរសម្នាក់ធ្វេីដំណេីរមកពីក្រោយក្នុងល្បឿនលឿននិងមិនប្រយ័ត្នបានជ្រុលទៅបុករថយន្តកូរ៉េពីក្រោយពេញទំហឹងបណ្តាលឱ្យរថយន្តកូរ៉េរេចង្កូតទៅបុករបាំងថ្មបាក់អស់២កង់រាបដល់ដី និងក្រឡាប់ផ្ងារជេីងម្ខាងចាក់ពោះត្រីពេញផ្លូវ ។
ក្នុងករណីគ្រោះថ្នាក់ចរាចរណ៍ខាងលេីនេះមិនបណ្ដាលឱ្យមនុស្សណាម្នាក់រងរបួសនោះឡេីយ តែរថយន្តបង្កហេតុនិងរថយន្តរងគ្រោះបានរងការខូចខាតយ៉ាងដំណំដូចគ្នា។
ក្រោយកេីតហេតុភ្លាមៗ គេសង្កេតឃេីញថា នៅត្រង់ចំណុចកេីតហេតុមានការកកស្ទះចរាចរណ៍ដល់អ្នកដំណេីរខ្លាំងមែនទែន ទេីបសមត្ថកិច្ចមូលដ្ឋានចុះមកជួយសម្រួលចរាចរណ៍ និងទាក់ទងទៅផ្នែកជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ មកធ្វេីការវាស់វែង និងស្ទួចយករថយន្តទាំងពីរគ្រឿងទៅរក្សាទុក រង់ចាំដោះស្រាយគ្នាតាមក្រោយ ៕
ដោយ ៖ ភារ៉ា ដង្កោ
