ក្រុមហង្សក្រហម Liverpool នឹងប្រកួតជាមួយក្រុមមេឃខៀវManchester City ក្នុងការប្រកួត FA Cup វគ្គពាក់កណ្ដាលផ្ដាច់ព្រ័ត្រនៅកីឡដ្ឋាន Wembley បន្ទាប់ពីបានយកឈ្នះលើក្រុម Nottingham Forest ក្នុងលទ្ធផល១ទល់០ ក្នុងការជួបគ្នាដ៏ស្វិតស្វាញនៅកីឡដ្ឋាន City Ground កាលពីរំលងអធ្រាត្រឈានចូលថ្ងៃទី២១ ខែមីនា ឆ្នាំ២០២២។

១គ្រាប់ជ័យជម្នះរបស់ក្រុម Liverpool រកបានដោយកីឡាករ​ Diogo Jota ដែលស៊ុតបាល់បញ្ចូលទីនៅនាទីទី៧៨ ពីការបញ្ជូនបាល់របស់ Konstantinos Tsimikas ។ចំណែកក្រុមមេឃខៀវ Manchester City បានយកឈ្នះក្រុមម្ចាស់ផ្ទះSouthampton ក្នុងលទ្ធផល៤ទល់១ ក្នុងការប្រកួតជម្រុះ FA Cup ជាមួយគ្នានេះដែរ។ លោក Pep Guardiola គ្រូបង្វឹករបស់ក្រុម Manchester City បាននិយាយថា មិនមានកីឡាករជាច្រើននៅក្នុងពិភពបាល់ទាត់អាចស៊ុតបញ្ចូលទីបានគ្រាប់បាល់របស់ Phil Foden ក្នុងជ័យជម្នះនេះលើទឹកដីក្រុម Southampton នៅឡើយទេ។ការប្រកួតក្នុងតង់ទី១ ក្រុម Man City មានឱកាសរកបាន១គ្រាប់នាំមុខមុនដោយកីឡាករ Raheem Sterling នៅនាទីទី១២ ប៉ុន្តែនៅនាទីទី៤៥+២ ជិតចប់ការប្រកួតក្នុងតង់ទី១ កីឡាករ Aymeric Laporte ភ្លាត់ស្នៀតស៊ុតចូលទីខ្លួនឯងធ្វើឲ្យក្រុមម្ចាស់ផ្ទះតាមស្មើវិញ១ទល់១។ចូលដល់ការប្រកួតក្នុងតង់ទី២ ក្រុមភ្ញៀវ Man City នៅតែបន្តសម្រុកទៅលើក្រុមម្ចាស់ផ្ទះ Southampton នៅនាទីទី៦២ ក្រុមភ្ញៀវមានឱកាសស៊ុតបាល់ពិន័យ១១ម៉ែត្រ១គ្រាប់ដែលរ៉ាប់រងដោយខ្សែបម្រើ Kevin de Bruyne ។ មិនយូរប៉ុន្មានក្រុម Man City បន្តដាក់សម្ពាធទៅលើក្រុមSouthampton ដោយនៅនាទីទី៧៥ ខ្សែប្រយុទ្ធFoden បានចេញពីកៅអីបម្រុងរកគ្រាប់បាល់ទី៣ដ៏អស្ចារ្យ ហើយ Riyad Mahrez បានស៊ុតបញ្ចូលទីគ្រាប់ទី៤ នៅនាទីទី៧៨ ធ្វើឲ្យចប់ការប្រកួត Man City យកឈ្នះ Southampton ៤ទល់១។លោក Guardiola គ្រូបង្វឹក Man City បានអះអាងថា Foden និង Mahrez បានបង្កើតភាពខុសគ្នាក្នុងការជួយឲ្យក្រុមយកឈ្នះSouthampton នៅពានរង្វាន់ FA Cup នេះ។ និយាយអំពីការស៊ុតបញ្ចូលទីរបស់កីឡាករជម្រើសជាតិអង់គ្លេសវ័យ២១ឆ្នាំ គ្រូបង្វឹករូបនេះបាននិយាយថា “គាត់គឺជាម្នាក់ក្នុងចំណោមពួកគេដែលមានសមត្ថភាពស៊ុតបញ្ចូលទីពីទីនោះ។ គាត់​មាន​ការ​ស៊ុត​បាល់​បញ្ចូល​ទី​មិន​គួរ​ឱ្យ​ជឿ គាត់​រហ័ស គាត់​ជា​កីឡាករ​ដ៏​អស្ចារ្យ​ម្នាក់យើង​ដឹង​ហើយ។

ក្រុមខ្លាំង Man City នឹងត្រូវជួប Liverpool ដើម្បីដណ្តើមយកកៅអីមួយនៅវគ្គផ្តាច់ព្រ័ត្រ FA Cup ខណៈក្រុមតោខៀវ Chelsea ត្រូវប៉ះក្រុមCrystal Palace នៅវគ្គពាក់កណ្តាលផ្តាច់ព្រ័ត្រដូចគ្នា។ ការប្រកួតទាំង៤ក្រុមក្នុងវគ្គពាក់កណ្តាលផ្តាច់ព្រ័ត្រនេះនឹងធ្វើឡើងនៅថ្ងៃទី១៦ ខែមេសាខាងមុខ ៕ (រូបភាព ៖ BBC Sport)