អាល់កៃដាបានចាប់កំណើតឡើងនៅឆ្នាំ១៩៨៨ នៅក្នុងខេត្តប៉េហ្សាវ៉ា ប្រទេស ប៉ាគីស្ថាន ក៏ប៉ុន្តែឫសគល់នៃចលនាអ៊ិស្លាម ស៊ុននីតជ្រុលនិយមនេះបានចាប់ពន្លកដំបូង ចេញពីចលនា “ភាតរអ៊ិស្លាម” (Muslim Brotherhood) នៅក្នុងប្រទេសអេហ្ស៊ីប ដោយមានមេដឹកនាំឈ្មោះថា អាប់ដាឡា អាហ្សាំ (AbdallahAzzam)។

ក្រុមភេរវកម្មនៅលើពិភពលោកបានកើតឡើងជាយូរណាស់មកហើយ ប៉ុន្តែមិនមានសកម្មភាពវាយប្រហារសម្លាប់ពលរដ្ឋស្លូតត្រង់ច្រើន ទើបពិភពលោកទាំងមូល ពិសេសសារព័ត៌មានមិនបានផ្សព្វផ្សាយពីក្រុមភេរវកម្ម។ រហូតដល់ការវាយប្រហារនៅអាមេរិកដែលជាមហាអំណាចផុត លេខត្រួតត្រាពិភពលោកអស់រយៈពេលជាច្រើនទសវត្សរ៍មកហើយនោះត្រូវទទួលរងការវាយប្រហារដល់ក្នុងទឹកដីរបស់ខ្លួនគឺការវាយប្រហារភេរវកម្មនៅទីក្រុងញូវយ៉ក និងវ៉ាស៊ីនតោន។ ភេរវកម្ម១១ ខែ កញ្ញា ឆ្នាំ២០០១ ត្រូវបានប្រវត្តិសាស្រ្ត ចារទុកថាជាចំណុចរបត់ដ៏សំខាន់មួយនៃភូមិសាស្រ្តនយោបាយពិភពលោកក្នុង សម័យកាលក្រោយសង្រ្គាមត្រជាក់ ហើយ តួអង្គថ្មីមួយបានចាប់លេចមុខ និងល្បីឈ្មោះនៅក្នុងយុគសម័យថ្មីនេះ គឺក្រុមភេរ វជនអាល់កៃដា និងមេដឹកនាំអូសាម៉ាប៊ីន ឡាឌិន។

អាប់ដាឡា អាហ្សាំ មានដើមកំណើតនៅប៉ាឡេស្ទីនបានចូលជាសមាជិកអង្គការភាតរអ៊ិស្លាម នៅក្នុងអំឡុងទសវត្សរ៍ឆ្នាំ ៥០ហើយជាអ្នកប្រាជ្ញអ៊ិស្លាមដំបូងគេនៅក្នុងសម័យទំនើបដែលមានគំនិតចង់បង្កើត ឲ្យមានចលនាជីហាដអន្តរជាតិមួយដើម្បីប្រយុទ្ធប្រឆាំងនឹងមហាអំណាចអាណា និគមលោកខាងលិចនិងរដ្ឋាភិបាលប្រទេស អ៊ិស្លាមដែលរណបលោកខាងលិច។ តាម គោលគំនិតរបស់អាប់ដាឡា អាហ្សាំ គោល ​ដៅចុងក្រោយនៃចលនាជីហាជនេះគឺ ឈាន​ទៅបង្កើតរដ្ឋអ៊ិស្លាមមួយដែលមាន វិសាលភាពជាសកល ហើយនឹង​គោល ដៅនេះអាចសម្រេចបានតាមរយៈ អំ​ពើហិង្សាដែលគេហៅថា “សង្រ្គាម ជីហាដ”។

ចំណែកអូសាម៉ា ប៊ីនឡាឌិន កើត នៅឆ្នាំ១៩៥៧ (ឯកសារខ្លះដាក់ថាកើត នៅឆ្នាំ១៩៥៨) នៅក្នុងទីក្រុងរីយ៉ាដ ប្រទេសអារ៉ាប៊ីសាអ៊ូឌីត។ ប៊ីនឡាឌិន គឺជាកូនទី១៧ក្នុងចំណោមកូនទាំង៥២ នាក់របស់មហាសេដ្ឋីដែលត្រួតត្រាមុខ ជំនួញខាងវិស័យសំណង់នៅអារ៉ាប៊ីសាអ៊ូឌីត។ ប៊ីនឡាឌិនបានរៀនសូត្ររហូតដល់ថ្នាក់ឧត្តមសិក្សាខាងផ្នែកសេដ្ឋកិច្ច និង ខាងវិស្វករសំណង់ ក៏ប៉ុន្តែប៊ីនឡាឌិនមិនមានចិត្តចង់ប្រកបអាជីពអ្វីមួយនោះទេ ដោយជាប់ចិត្តតែនឹងរឿងសាសនា ជា ពិសេសគឺមនោគមន៍វិជ្ជាអ៊ិស្លាមជ្រុលនិយម របស់អាប់ដាឡា អាហ្សាំ។

នៅឆ្នាំ១៩៧៩ ប៊ីនឡាឌិនបានបញ្ចប់ការសិក្សានៅសាកលវិទ្យាល័យត្រូវចំពេល ដែលសូវៀតចូលឈ្លានពានប្រទេសអាហ្វហ្គានីស្ថាន។ ប៊ីនឡាឌិនក៏បានចាកចេញពីអារ៉ាប៊ីសាអ៊ូឌីត ទៅចូលរួមជាមួយអាប់ ដាឡាអាហ្សាំ បោះទីតាំងនៅក្នុងខេត្តប៉េ ហ្សាវ៉ា ប្រទេសប៉ាគីស្ថានហើយបង្កើត បណ្តាញមួយដើម្បីជ្រើសរើសយុវជនអ្នកកាន់សាសនាអ៊ិស្លាមពីគ្រប់ទីកន្លែងឲ្យទៅចូលរួមក្នុងចលនាឧទ្ទាមមូចាហ៊ីឌីនដើម្បីប្រយុទ្ធប្រឆាំងនឹងកងទ័ពសូវៀតនៅអាហ្វហ្គានីស្ថាន។

នៅឆ្នាំ១៩៨៨នៅពេលដែលសង្រ្គាមនៅអាហ្វហ្គានីស្ថានឈានជិតចូលដល់ទីបញ្ចប់ប៊ីនឡាឌិនបានផ្តាច់ខ្លួនចេញពីក្រុមឧទ្ទាមមូចាហ៊ីឌីនហើយទៅបង្កើតជាចលនាថ្មីមួយទៀតរួមជាមួយនឹងអៃម៉ាន់អាល់ហ្សាវ៉ាហ៊ីរី ដោយដាក់ឈ្មោះក្រុមថ្មីនេះ “អាល់កៃដា” ដែលជាភាសាអារ៉ាប់មាន ន័យថា “មូលដ្ឋាន”។ តាមរយៈការបង្កើតក្រុមថ្មីនេះអូសាម៉ា ប៊ីនឡាឌិនមានគោលដៅពង្រីកសង្រ្គាមជីហាដចេញពីអាហ្វហ្គានីស្ថានទៅកាន់កន្លែងផ្សេងៗទៀតនៅ ទូទាំងពិភពលោក៕