សៀមរាប៖កម្លាំងសមត្ថកិច្ចចំរុះមាននគរបាលការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្ត កម្លាំងនគរបាលបុស្តិ៍រដ្ឋបាលសង្កាត់ស្លក្រាម អធិការដ្ឋាននគរបាលក្រុងសៀមរាប និងកម្លាំងប៉េអឹមខេត្តបានចុះប្រតិបត្តិការបង្ក្រាបករណីគ្រឿងញៀនឃាត់ខ្លួនបានក្រុមញៀនថ្នាំ ប្រុស ស្រី ចំនួន៧នាក់ ក្នុងថ្ងៃតែមួយនៅ ចំណុច ២កន្លែងផ្សេងគ្នា ក្នុងខេត្តសៀមរាប បញ្ជូនមកកាន់ការិយាល័យជំនាញ ដើម្បីសួរនាំ។
ហេតុការឃាត់ខ្លួនបានជនសង្ស័យប្រុសស្រីទាំង៧នាក់ខាងលើក្នុងថ្ងៃទី៣០ខែមេសាឆ្នាំ២០១៦ នៅ២ចំនុចផ្សេងគ្នា ចំនុចទី១ ការិយាល័យនគរបាលប្រឆាំងគ្រឿងញៀនខេត្តឃាត់ខ្លួនបានជនសង្ស័យប្រុសស្រីចំនួន៣នាក់ ស្ថិតនៅក្រុមទី៣ ភូមិបន្ទាយចាស់ សង្កាត់ស្លក្រាម ក្រុងសៀមរាប និងចំនុចទី២ ធ្វើការឃាត់ខ្លួនបានជនសង្ស័យចំនួន៤នាក់នៅចំនុចភូមិភូមិព្រៃជ្រូក ឃុំព្រៃជ្រូក ស្រុកពួក ខេត្តសៀមរាប។
លោកវរសេនីយទោ អ៊ុំ សាអាត នាយការិយាល័យនគរបាលប្រឆាំងគ្រឿងញៀនខេត្ត បានប្រាប់ថា កម្លាំងសមត្ថកិច្ចចំរុះបានឃាត់ខ្លួនជនសង្ស័យប្រុស ស្រី ចំនួន ៣ នាក់ មាន៖ ទី១/ឈ្មោះ ណៃ សុខឌី ភេទប្រុសអាយុ៣៦ឆ្នាំ មុខរបររត់ម៉ូតូឌុប (ជួញដូរ) ទី២/ឈ្មោះ ណៃ តារា ហៅទូច ភេទប្រុសអាយុ៣២ឆ្នាំ មុខរបររត់ម៉ូតូឌុប (ជួញដូរ) និងទី៣/ឈ្មោះ គឹម សុផា ភេទស្រីអាយុ៣២ឆ្នាំមុខរបរលក់ឥវ៉ាន់ចាប់ហួយនៅផ្ទះ (ជួញដូរ)ហើយ អ្នកទាំង៣នាក់រស់នៅក្រុមទី៣ ភូមិបន្ទាយចាស់ សង្កាត់ស្លក្រាម ក្រុងសៀមរាប ។ ក្រោយពីធ្វើការឃាត់ខ្លួនកម្លាំងជំនាញបានដកហូតវត្ថុតាងរួម មាន៖ថ្នាំប្រភេទ មេតំហ្វេតាមីនចំនួន៣២កញ្ចប់(ធំ៥ តូច២៧)ទម្ងន់សរុបចំនួន២៣.៩ក្រាម និងទូរស័ព្ទដៃចំនួន៤គ្រឿងទៀត។
និងលោកវរសេនីយទោ ថា ដាលុច ប្រធានយុត្តិធម៌នៃកងរាជអាវុធហត្ថខេត្ត បានចុះបង្រ្កាប ករណីគ្រឿងញៀនរហូតឈានដល់ធ្វើការ ឃាត់ខ្លួនជនសង្ស័យចំនួន៤នាក់នៅចំនុចភូមិព្រៃជ្រូក ឃុំព្រៃជ្រូក ស្រុកពួក ខេត្តសៀមរាប មានទី១/ឈ្មោះ ថន សុភាព ភេទប្រុសអាយុ២៦ឆ្នាំ មុខរបរកម្មករសំណង់ ទីលំនៅភូមិត្រឡោកលិច ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ទី២/ឈ្មោះ រឿត ភារុន ភេទប្រុសអាយុ២០ឆ្នាំមុខរបរកម្មករសំណង់ រស់នៅភូមិស្រយោង ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ទី៣/ឈ្មោះ អ៊ាន ប៊ុនកាយ ភេទប្រុសអាយុ២០ឆ្នាំមុខរបរកម្មករស្នាក់នៅភូមិភ្នំលៀប ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ និងទី៤/ឈ្មោះ កង ធា ភេទប្រុសអាយុ១៨ឆ្នាំ មុខរបរកម្មករមានទីលំនៅភូមិភ្នំលៀប ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ។ចំណែកវត្ថុតាង ជនសង្ស័យទាំង៤នាក់ ត្រូវបានធ្វើការបោះចោល ខណៈពេលដែលកម្លាំងសមត្ថកិច្ចកងរាជអាវុធហត្ថខេត្តយើងចុះទៅដល់ ដូច្នេះវត្ថុតាងគ្មានទេ។
បច្ចុប្បន្នជនសង្ស័យប្រុសស្រីទាំង៧នាក់ នឹងវត្ថុតាង ត្រូវបានកម្លាំងជំនាញរបស់ ការិយាល័យប្រឆាំងគ្រឿងញៀនខេត្ត កសាងសំណុំរឿងបញ្ជូនទៅតុលាការនៅរសៀលថ្ងៃទី០១ខែឧសភាឆ្នាំ២០១៦ ដើម្បីចាត់ការតាមនីតិវិធីច្បាប៕
ប៊ុន រិទ្ធី
