កំពង់ឆ្នាំង៖ សម្តេចចៅហ្វាវាំង វ​រវៀងជ័យ អធិបតីស្រឹង្គារ៍ គង់ សំអុល និងលោកស្រី ថាយ ​វ៉ា គង់ សំអុល បានជួយឧបត្ថម្ភថវិកាចំនួន ៥ម៉ឺនដុល្លារ រួមទាំងសប្បុរជនជិតឆ្ងាយបានឧបត្ថម្ភ ថវិកាសរុបចំនួនជិត១៧ម៉ឺនដុល្លារអាម៉េរិក នៅក្នុងមិទ្ទិញអបអរសាទរខួបលើកទី១៥៣ ទិវាពិភពលោក ៨ ឧសភា ឆ្នាំ ២០១៦ នៅឯខេត្តកំពង់ឆ្នាំង ដែលបានប្រារព្ធធ្វើឡើង កាលពីព្រឹកថ្ងៃទី០១ ខែឧសភា ឆ្នាំ ២០១៦ នៅសាលាខេត្តកំពង់ឆ្នាំង។
ក្រោមប្រធានបទ «កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា» ក្នុងគោលបំណង ពង្រឹងភាពជា ម្ចាស់របស់សាខា អនុសាខា កាកបាទក្រហមទាំង ២៥ រាជធានី -ខេត្ត តាមរយៈការពង្រឹង បណ្តាះយុវជន អ្នកស្ម័គ្រចិត្ត ប្រកបដោយ សមត្ថភាព មានឆន្ទៈ និងការលះបង់ ក្នុងការផ្តល់សេវាមនុស្សធម៌ និងចលនាកៀងគររកមូលនិធិ គ្រប់មជ្ឈដ្ឋានទាំងក្នុង និងក្រៅប្រទេស ទោះតិច ឬ ច្រើន ដើម្បីចូលរួមចំណែកផ្តល់ ជំនួយមនុស្សធម៌ ជួយដល់មនុស្សជាតិដែលរងគ្រោះដោយគ្រោះធម្មជាតិ និងឧបទ្ទេវហេតុផ្សេងៗ។
​ពិធីនេះស្ថិតក្រោមអធិបតីភាពដ៏ខ្ពស់ខ្ពស់របស់សម្តេចចៅហ្វាវាំង វ​រវៀងជ័យ អធិបតីស្រឹង្គារ៍ គង់ សំអុល ឧបនាយករដ្ឋមន្រ្តី រដ្ឋមន្រ្តីក្រសួងព្រះបរមរាជវាំង និងជាអនុ ប្រធានអចិន្ត្រៃយ៍កាកបាទក្រហមកម្ពុជា ។

តាម​សេចក្តីថ្លែងការណ៍ខួបលើកទី១៥៣ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០១៦ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទ ក្រហមកម្ពុជាបានបញ្ជាក់ថា ស្របតាមចក្ខុវិស័យរបស់ចលនាកាកបាទក្រហម អឌ្ឍចន្ទក្រហមអន្តរជាតិ ដែលបានដាក់ចេញនូវប្រធានបទ«កាកបាទក្រហមកម្ពុជា មាន គ្រប់ទីកន្លែង សម្រាប់គ្រប់ៗគ្នា » កាកបាទក្រហមកម្ពុជាបានឈានឆ្ពោះទៅមុខរួចស្រេច ដោយឆ្លុះបញ្ចាំងអំពីការបំពេញតួនាទីដ៏មានសារៈសំខាន់ទៅតាមបរិបទជាតិ-អន្តរជាតិ ដើម្បីនឹងទទួលបានជោគជ័យថ្មីៗបន្ថែមទៀត ក្នុងការបម្រើនូវសកម្មភាពមនុស្សធម៌ និងដោយប្រកាន់យ៉ាងខ្ជាប់ខ្ជួននូវគោល ការណ៍គ្រឹះទាំង ៧ របស់​ចលនាកាកបាទក្រហម អឌ្ឍចន្ទក្រហម និងទៅតាមវិស័យស្នូលទាំង ៤ នៃយុទ្ធសាស្រ្ត របស់ កាកបាទក្រហមកម្ពុជា នោះគឺការគ្រប់គ្រងគ្រោះមហន្តរាយ ការអប់រំថែទាំ សុខភាពតាមសហគមន៍ ការលើកកម្ពស់គោលការគ្រឹះតម្លែមនុស្សធម៌ សេចក្តីថ្លៃថ្នូររបស់មនុស្សជាតិ និងវប្បធម៌អហិង្សានិងការអភិវឌ្ឍស្ថាប័ន អភិវឌ្ឍធនធាន ដើម្បីរួមចំណែជាមួយរាជរដ្ឋា ភិបាល ក្នុងការ កាត់បន្ថយភាពក្រីក្រនិងជួយដល់ជនរងគ្រោះ និងជនងាយរងគ្រោះ នៅគ្រប់ទីកន្លែងក្នុងគ្រប់កាលៈទេសៈ តាមទិសស្លោកទីណាមានទុក្ខលំបាក ទីនោះមានកាកបាទក្រហមកម្ពុជា រួមកម្លាំងគ្នាដើម្បីមនុស្សធម៌ និងវប្បធម៌
ចែករំលែកចាប់ផ្តើមពីខ្ញុំ។
​ លោក ឈួរ ច័ន្ទឌឿន អភិបាលខេត្តកំពង់ឆ្នាំង បានបានបញ្ជាក់ថា៖ សម្រាប់ខេត្តកំពង់ឆ្នាំងឃើញថា ការរៀបចំទិវាកាកបាទ ក្រហម អឌ្ឍចន្ទក្រហម គឺជាការងារមួយ បានធ្វើ និងមានបទពិសោធន៍ច្រើនណាស់មកហើយ កត្តាសំខាន់គ្រប់មន្ទីរ អង្គភាព និងបងប្អូនអាជីវករយើងនៅក្នុងខេត្ត មានទឹកចិត្តចូលរួមទាំងកម្លាំងកាយ និងធនធាន ជួយគាំទ្រ និង ទ្រទ្រង់ដល់ចលនាកាកបាទក្រហម ខេត្តកាន់ តែមានភាពរលូន។
​ លោកឈួរ ច័ន្ទឌឿន បានបន្តថា៖ បញ្ហាប្រឈម ចំពោះមុខ ដែលត្រូវក្រុមការ ងារចុះទៅតាមមូលដ្ឋានជនបទដឹកទឹក ចែកជូនប្រជាពលរដ្ឋដែល កំពុងខ្វះខាត កន្លងមកនេះ បានធ្វើជាបន្តបន្ទាប់ ហើយមានភាពធូរស្រាលផងដែរ។
​លោក ស្រី កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង បានអានសេចក្តីថ្លែង ការរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានការបាទក្រហមកម្ពុជា ដោយបាន ពាំនាំនូវព្រះរាជទានសេចក្តីនឹករលឹក និងព្រះរាជបន្ទួលផ្តាំផ្ញើសួរសុខទុក្ខប្រកបដោយ ព្រះរាជហឫទ័យស្រឡាញ់យ៉ាងជ្រាលជ្រៅបំផុតអំពី ព្រះករុណាព្រះបាទ សម្តេចព្រះបរមនាថ នរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយស កាកបាទប្រហមកម្ពុជា ជូនចំពោះអង្គមិទ្ទិញទាំងមូល និងប្រជាពលរដ្ឋក្នុងខេត្តកំពង់ឆ្នាំង។
​សម្តេចចៅហ្វាវាំង គង់ សំអុល អនុប្រធានអចិន្ត្រៃយ៍កាកបាទក្រហមកម្ពុជា បានមាន ប្រសាសន៍ថា លទ្ធផលដែលកាកបាទក្រហមកម្ពុជា សម្រេចបាន គឺមិនអាចកាត់ផ្តាច់បាន ពីការឧបត្ថម្ភគាំទ្រដ៏ថ្លៃថ្លា ទាំងស្មារតី សម្ភារថវិកា រយៈពេលកន្លងមក ក៏ដូចជាបច្ចុប្បន្នរបស់ លោកឧកញ៉ា ថ្នាក់ដឹកនាំគ្រប់លំដាប់ថ្នាក់ លោក លោកស្រី អ្នកនាងកញ្ញា សប្បុរសជននានា សម្រេចជាមធ្យោបាយក្នុងសកម្មភាបមនុស្សធម៌ដ៏មានប្រសិទ្ធភាព ស្របតាមពាក្យស្លោក ទីណាមានប្រជាពលរដ្ឋជួបការលំបាក ទីនោះមានកាកបាទក្រហមកម្ពុជា៕

ដោយ៖ សំរិត