ភ្នំពេញ៖ មន្ត្រីអង្គការសហប្រជាជាតិបាននិយាយថា ខ្លួនបានផ្តល់ផែនទីជិត២០ផ្ទាំងដល់ប្រទេសកម្ពុជាហើយ ដែលជាការឆ្លើយតបមួយផ្នែករបស់អង្គការសហប្រជាជាតិ(អ.ស.ប.) ក្រោយពេលដែលសម្តេចនាយករដ្ឋមន្ត្រីហ៊ុន សែន បានស្នើសុំឲ្យអ.ស.ប.ផ្តល់ផែនទីដែលកម្ពុជាតម្កល់ទុកនៅអ.ស.ប.ជូនដល់កម្ពុជាដើម្បីប្រើប្រាស់ដោះស្រាយបញ្ហាព្រំដែនកម្ពុជានិងវៀតណាមដែលកំពុងក្លាយជារឿងចម្រូងចម្រាស។
បន្ទាប់ពីសម្តេចតេជោនាយករដ្ឋមន្ត្រី ហ៊ុន សែន បានស្នើសុំខ្ចីផែនទីកម្ពុជាដែលបានតម្កល់ទុកនៅឯអ.ស.ប.ដើម្បីដោះស្រាយបញ្ហា ព្រំដែនកម្ពុជា វៀតណាម ដែលកំពុងក្លាយជាបញ្ហាដ៏រសើបនោះ មន្ត្រីនាំពាក្យលោកអគ្គលេខាធិការអ.ស.ប.ម្នាក់គឺអ្នកស្រី Eri Kaneko បានថ្លែង ថា អ.ស.ប.បានផ្តល់ផែនទីចំនួន១៨ផ្ទាំងដែលកម្ពុជាបានស្នើសុំហើយ។ អ្នកស្រីថ្លែងថា «ជាការឆ្លើយតបទៅនឹងសំណើរបស់រាជរដ្ឋាភិបាលកម្ពុជា អ.ស.ប.បានផ្តល់ផែនទីចំនួន១៨ផ្ទាំងដែលយើងបានរកឃើញក្នុងកន្លែងតម្កល់ឯកសាររបស់យើង នោះ ជូនដល់ស្ថានបេសកកម្មអចិន្ត្រៃយ៍នៃប្រទេសកម្ពុជាក្នុងបូរីញូវយ៉ក»។ មន្ត្រីស្ថានបេសកកម្មអចិន្ត្រៃយ៍កម្ពុជានៅអ.ស.ប.ក្នុងបូរីញូវយ៉កដែលធ្វើកិច្ចការជាមួយអ.ស.ប.រឿងផែនទីនេះ បានអះអាងថា ខ្លួនមិនអាចធ្វើអត្ថាធិប្បាយអ្វីបានទេ ដោយគ្រាន់តែអះអាងថា កម្ពុជាមិនទាន់បានទទួលផែនទីទាំងស្រុងដែលកម្ពុជាស្នើសុំពីអ.ស.ប.នោះទេ។
ក្នុងសារលិខិតមួយកាលពីថ្ងៃទី៦ ខែកក្កដា ឆ្នាំ២០១៥ សម្តេចតេជោនាយករដ្ឋមន្ត្រីហ៊ុន សែននៃប្រទេសកម្ពុជាបានសរសេរលិខិតទៅលោកអគ្គលេខាធិការអ.ស.ប. បាន់គីម៊ូន ដើម្បីស្នើសុំខ្ចីផែនទីខ្នាត១/១០០.០០០ ដែលកម្ពុជាបានយកទៅតម្កល់ទុកនៅឯអ.ស.ប.កាលពីឆ្នាំ១៩៦៤។ ការស្នើសុំនេះកើតឡើងប៉ុន្មានថ្ងៃប៉ុណ្ណោះបន្ទាប់ពីពលរដ្ឋ កម្ពុជា និងពលរដ្ឋវៀតណាមហើយនឹងឆ្នាំព្រំដែនវៀតណាមមានការប៉ះទង្គិចគ្នា ដែលបណ្តាលឲ្យមានមនុស្សជាង១០នាក់របួសក្នុងខេត្តស្វាយរៀង ៕ ហេង សូរិយា
–
