ភ្នំពេញ ៖ បុរសម្នាក់បែកថ្នាំខឹងទិញស្រាផឹកអត់បាន ទាញកាំបិតបុ័ងតោដេញកាប់អ្នករត់ម៉ូតូឌុប រត់ចោលម៉ូតូស្ទើរលួសព្រលឹង ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង១១និង៣០នាទីយប់ថ្ងៃទី២៣ ខែកក្តដា នៅតាមបណ្តោយផ្លូវលេខ១៣៤ ស្ថិតនៅក្បែរមន្ទីរពេទ្យសម្ភពក្រុងស្ថិតក្នុង សង្កាត់មិត្តភាព ខណ្ឌ៧មករា ។
បុរសបែកថ្នាំនោះមានឈ្មោះ សឿន សុថៃ ភេទប្រុស អាយុ ២៧ឆ្នាំ មុខរបរមិនពិតប្រាកដ មានទីលំនៅផ្លូវលំ ១៣៤ក្រោយមុន្ទីរពេទ្យសម្ភពក្រុង សង្កាត់វាលវង់ ខណ្ឌ៧មករា ចំណែក. អ្នករត់មូ៉តូដែលត្រូវគេដេញកាប់ នោះមានឈ្មោះ ស៊ីវ ឌីណាម៉ូ ភេទប្រុស អាយុ២៨ឆ្នាំ មុខរបរអ្នករត់ម៉ូតូឌុប មានទីលំនៅផ្ទះជួល ក្នុងបូរីកីឡា សង្កាត់វាលវង់ ខណ្ឌ៧មករា។
បើតាមសម្តីពីអ្នករត់មូ៉តូឌុបបានអោយដឹងថា មុនពេលកើតហេតុរូបលោកបានជិះម៉ូតូឆ្វែលដើររកម៉ូយតាមផ្លូវលេខ១៣៩បត់ស្តាំតាមផ្លូវ១៣៤ ដែលជាកន្លែងកើតហេតុ ក៏ស្រាប់តែឃើញបុរសម្នាក់ក្នុងស្ថានភាពស្រវឹងស្រាហើយបែកថ្នាំផងនោះបានកាន់កាំបិតបុ័ងតោបានដើរមកជិតហើយសួរថា ឯងមានលុយអត់សុំទិញ្ញស្រាផឹក គ្រាន់តែឆ្លើយថាអត់មាន ក៏ស្រាប់តែជនបង្កលើកកាំបិតបំរុងកាប់តែត្រូវគាត់រត់ចោលម៉ូតូ ធ្វើឲ្យជនបង្កកាប់ម៉ូតូខូច ខាតក្បាលខាងមុខ ប៉ុន្តែឃើញមនុស្សចោមរោមមើលច្រើនពេកក៏ទម្លាក់កាំបិតចោលឈប់កាប់ ។ ជនរងគ្រោះបានរត់ទៅប្តឹងនគរបាលប៉ុស្តិ៍មិត្តភាពដើម្បីជួយអន្តគមន៍ ។
ក្រោយពេលកំលាំងសមត្ថកិច្ចមកដល់ក៏បាននាំទាំងជនបង្កនិងវត្ថុតាំងកាំបិតបុ័ងតោយកទៅប៉ុស្តិ៍ដើម្បីសាកសួរភ្លាមៗផងដែរ ។ ពេលដែលទៅដល់ប៉ុស្តិ៍ជនបង្កនិយាយគ្នាស្តាប់មិនបានទេហើយគិតតែនិយាយតែម្នាក់ឯងធ្វើអោយសមត្ថកិច្ចវិលមុខពិបាកក្នុងការសួរ ។
ប្រភពព័ត៌មានបានឲ្យដឹងថា ជនបង្កជាមនុស្សញៀនថ្នាំធ្លាប់ទៅមណ្ឌលកែប្រែ និងធ្លាប់ជាប់ពន្ធនាគារផងដែរ ។ ដោយសារជនបង្កជាបែកថ្នាំខ្លាំងពេកពិបាកក្នុងការសួរនាំ ក៏ត្រូវបានសមត្ថកិច្ចទូរស័ព្ទហៅម្តាយមកធ្វើកិច្ចសន្យា និងទទួលយកកូនត្រឡប់ទៅវិញ ចំណែកម្ចាស់ម៉ូតូមិនបានដាក់ពាក្យបណ្តឹងទេ ពេលដែលឃើញម្តាយជនបង្កជាស្រ្តីមេម៉ាយហើយគ្មានប្រាក់ទៀត ៕
