កាលពីថ្ងៃទី២៤ ខែកក្កដា ឆ្នាំ២០១៥ មន្ត្រីប្រទេសឥណ្ឌាបានថ្លែងថា មនុស្ស៩នាក់បានបាត់បង់ជីវិត ២៣នាក់បានរងរបួស និង៣១នាក់ផ្សេងទៀតនៅបាត់ខ្លួនបន្ទាប់ពីរថយន្តក្រុងដឹកអ្នកទេសចរណ៍បើកបរធ្លាក់ផ្លូវ ហើយជ្រុលធ្លាក់ទៅក្នុងទន្លេមួយក្នុងប្រទេសឥណ្ឌា ។
សេចក្តីរាយការណ៍បានបន្តថា ហេតុការណ៍គ្រោះថ្នាក់បានកើតឡើងកាលពីល្ងាចថ្ងៃព្រហស្បតិ៍ ស្ថិតនៅភាគខាងជើងរដ្ឋ Himachal Pradesh ស្រុក Kullu ។
លោក Rakesh Kanwar មន្ត្រីទទួលបន្ទុកនៅក្នុងតំបន់បានថ្លែងថា ក្រុមជួយសង្គ្រោះបានរកឃើញសាកសព៩នាក់ ហើយក្នុងចំណោមពួកគេ៣នាក់គឺស្គាល់អត្តសញ្ញាណរួចហើយ ដោយឡែក អ្នករងរបួស២៣នាក់ផ្សេងទៀតត្រូវបញ្ជូនទៅកាន់មន្ទីរពេទ្យ ។
មន្ត្រីដដែលបានបន្តថា មូលហេតុនាំឲ្យគ្រោះថ្នាក់កើតឡើងកំពុងស្ថិតក្រោមការស៊ើបអង្កេត ហើយមិនទាន់អាចបញ្ជាក់ប្រាប់បណ្តាញផ្សព្វផ្សាយព័ត៌មានបានឡើយ។ គ្រោះថ្នាក់ចរាចរណ៍សម្លាប់មនុស្សតែងតែកើតមានជារឿងធម្មតាទៅហើយនៅក្នុងប្រទេសឥណ្ឌា ។ ហេតុការណ៍គ្រោះថ្នាក់កើតឡើង មួយចំនួនដោយសារតែកត្តាផ្ទុកមនុស្សច្រើនពេក កត្តាផ្លូវក៏ជាចំណុចបង្កឲ្យមានគ្រោះថ្នាក់ផងដែរ ក្រៅពីនេះគឺកត្តាធ្វេសប្រហែសរបស់អ្នកបើកបរ ៕
