ខេត្តព្រះសីហនុ៖ ក្រុមសហគមន៍ការពារព្រៃធម្មជាតិ រួមជាមួយមន្ត្រីជំនាញក្នុងខេត្តព្រះសីហនុបានសម្តែងនូវការព្រួយបារម្មណ៍យ៉ាងខ្លាំងគ្រាដែលព្រៃធម្មជាតិជំរកត្រីពងជាច្រើនកន្លែងត្រូវបានក្រុមអ្នកមានអំណាចនិងអ្នកមានទ្រព្យធនបានរំលោភកាន់កាប់ទន្ទ្រានជាបន្តបន្ទាប់ ជាក់ស្តែងនាពេលថ្មីៗនេះព្រៃកោងកាង និងដើមក្រញឹម រាប់រយហិចតា កំពុងរងការឈូសឆាយដោយពួកគេទាំងនោះអះអាងថាមានការអនុញ្ញាត្តិពីអាជ្ញាធរថ្នាក់ស្រុក ថ្នាក់ខេត្ត។
ជុំវិញបញ្ហានេះប្រជាពលរដ្ឋរស់នៅក្នុងភូមិព្រែកទាល់ ឃុំទឹកថ្លា ស្រុកព្រៃនប់ ជាច្រើនគ្រួសារបានសម្តែងទស្សនៈថា ទីតាំងព្រៃកោងកាង ដែលកំពុងត្រូវបានឈួសឆាយនេះគឺជាទីផ្តល់ស្បៀងអាហារប្រចាំថ្ងៃសំរាប់ផ្គត់ផ្គង់ជីវភាពប្រជាពលរដ្ឋភូមិព្រែកទាល់ និងភូមិក្បែៗនោះជាច្រើនគ្រួសារ ប៉ុន្តែនាពេលនេះត្រូវបានមនុស្សមួយក្រុមមកធ្វើការឈួសឆាយ ហ៊ុំព័ទ្ឋ ធ្វើជាកម្មសិទ្ឋ ដោយសំអាងថា ជាដីមានប័ណ្ណកម្មសិទ្ឋត្រឹមត្រូវ (ប្លង់រឹង) នឹងមានចំណាអនុញ្ញាត្តិពីអាជ្ញាធរខេត្តទៅវិញ បង្ករឲ្យពួកគាត់មានការភ្ញាក់ផ្អើលយ៉ាងខ្លាំងដោយពុំដឹងថា ទីតាំងដីព្រៃលិចទឹកនេះ (ព្រៃកោងកាង) គេធ្វើប្លង់ពីពេលណាមកនោះទេពួកគាត់គ្រាន់តែដឹងថា ទីនោះជាកន្លែងដែលពួកគាត់រកបរបរចឹញ្ចឹមជិវិតទាំងពីពួកគាត់នៅពុំទាន់មានប្តីប្រពន្ឋមកម្លេះ។
ប្រភពដ៏ដែលបានបន្តថា បើព្រៃលិចទឹកទាំងអស់សុទ្ឋតែមានប្លង់កម្មសិទ្ឋពិតមែននោះ ធនធានធម្មជាតិនៅក្នុងស្រុកព្រៃនប់និងនៅក្នុងស្រុកដ៏ទៃទៀតពិតជាត្រូវវិនាសបាត់បង់អស់ជាក់ជាពុំខានហើយពិតណាស់ក្មេងជំនាន់ក្រោយនឹងលែងបានស្គាល់ព្រៃកោងកាងជាក់ជាពុំខាន។ អាស្រ័យហេតុនេះមានតែមន្ត្រីពាក់ព័ន្ឋថ្នាក់ជាតិ លោករដ្ឋមន្ត្រីរៀបចំដែនដីនគររូបនីយកម្ម សំណង់ និង សុរិយោដី រដ្ឋមន្ត្រីបរិស្ថាន និង រដ្ឋមន្ត្រីក្រសួងកសិកម្ម សូមមេត្តាពិនិត្យទៅលើប្លង់កម្មសិទ្ឋដីមួយចំនួន ដែលកំពុងពាក់ព័ន្ឋទៅនឹងព្រៃធម្មជាតិជំរកត្រីពងដែលមានតម្លៃមហាសាលមិនអាចកាត់ថ្លៃបានសម្រាប់កូនចៅជំនាន់ក្រោយ។
លោក នេន ចំរើន ប្រធានរដ្ឋាបាលជលផលកំពង់សោម ខេត្តព្រះសីហនុ ក៏បានបញ្ចាក់ផងដែរថា ជុំវិញការឈួសឆាយនេះ លោកបានធ្វើរបាយការណ៏៍ទៅប្រតិភូរាជរដ្ឋាភិបាល ទទួលបន្ទុកប្រធានរដ្ឋបាលជលផលរួចហើយដើម្បីផ្តល់អនុសាសន៍អនុវត្តបន្តព្រោះ បើតាមការចុះអង្កេតរបស់រដ្ឋាបាលជលផលកំពង់សោម ឃើញថា ដីព្រៃលិចទឹក (ព្រៃកោងកាង) នៅឃុំទឹកថ្លា ជិត១០០០ហិចតា សុទ្ឋតែមានប័ណ្ណកម្មសិទ្ឋ។
ដោយឡែក លោក ទិត្យ វុទ្ឋី អភិបាលស្រុកព្រៃនប់ បានគូសបញ្ជាក់ថា ចំពោះទីតាំងដែលកំពុងធ្វើការឈូសឆាយនាពេលនេះ គឺជាដីមានកម្មសិទ្ឋទាំងអស់ ហើយម្ចាស់ទីតាំងដីបានធ្វើការស៊ុំការអនុញ្ញាត្តិពីថ្នាក់ស្រុក និងបានចំណាឯកភាពពីថ្នាក់ខេត្តដើម្បីឈូសឆាយធ្វើកសិកម្មចំនួន៤០ហិចតា ដូចនេះការឈូសឆាយគឺមានច្បាប់ត្រឹមត្រូវ៕
ដោយ៖ វុទ្ធឦសាន
