ស្ទឹងត្រែង : នៅថ្ងៃទី ០៩ ខែ កក្កដា ឆ្នាំ២០២២ នេះ ដែលរដ្ឋបាលខេត្តស្ទឹងត្រែងនាំយកគ្រាប់ត្នោតដាំតាមបណ្តោយព្រំដែនកម្ពុជា-ឡាវ ក្នុងគោលបំណងរក្សាបាននូវបូរណៈភាពទឹកដី ជាប្រយោជន៍សម្រាប់កូនចៅជំនាន់បានដឹង បានស្គាល់ និងចេះស្រឡាញ់អ្វីដែលជាអត្តសញ្ញាណជាតិ។
លោក ព្រំ ចន្ថា ប្រធានមន្ទីរអភិវឌ្ឍន៍ជនបទខេត្តស្ទឹងត្រែងបានឲ្យដឹងថា ការដាំដើមត្នោតនេះ គឺ ដោយ មានការចង្អុលបង្ហាញពីឯកឧត្តម ស្វាយ សំអ៊ាង អភិបាលនៃគណៈអភិបាលខេត្តស្ទឹងត្រែង និងផ្តួចផ្តើមគំនិតដោយមន្ទីរអភិវឌ្ឍន៍ជនបទបានសហការជាមួយរដ្ឋបាលខេត្ត និងមន្ទីរអង្គភាពនានាជុំវិញខេត្ត កងកម្លាំងប្រដាប់ទាំងបីប្រភេទ។
លោក បញ្ជាក់ថា÷ គ្រាប់ត្មោតដាំតាមបណ្តោយសងខាងផ្លូវក្រវ៉ាត់ព្រំដែនកម្ពុជា-ឡាវ មានចំនួន ០៦លើក ដោយលើកទី១ ឆ្នាំ២០១៦ ដាំគ្រាប់ពូជត្នោត ១១.៥០០ គ្រាប់, លើកទី២ ឆ្នាំ ២០១៧ ចំនួន ១០.០០០ គ្រាប់ និងលើកទី៣ ឆ្នាំ២០១៨ មានគ្រាប់ពូជត្នោត ២៥.០០០គ្រាប់ និងលើកទី៤ ឆ្នាំ២០១៩ មានចំនួន ៣០.០០០ គ្រាប់ និង លើកទី៥ មានចំនួន ១០០.០០០គ្រាប់ និង លើកទី៦ នេះ មានគ្រាប់ពូជត្នោត ចំនួន ៣០.០០០ គ្រាប់ ។
លោក ស្វាយ សំអ៊ាង អភិបាលនៃគណៈអភិបាលខេត្តស្ទឹងត្រែងបានលើកឡើងថា ដើមត្នោតជារុក្ខជាតិដែលផ្តល់នូវគុណ សម្បត្តិច្រើនយ៉ាងដល់ប្រជាជនខ្មែរតាំងពីសម័យបុរាណកាលមក និងជានិមិត្ត សញ្ញាតំណាងអត្តសញ្ញាណជាតិដួងប្រលឹងជាតិ ដែលប្រជាជនខ្មែរសម្គាល់ភាពទឹកដីរបស់ខ្លួនពីបុរាណកាលរហូតមកដល់បច្ចុប្បន្ន ។
លោកអភិបាលខេត្តបានបន្តទៀតថា សកម្មភាពដាំដើមត្នោតនាថ្ងៃនេះ គឺជាសកម្មភាពប្រវត្តិសាស្ត្ររបស់ខេត្ត ដើម្បីថែរក្សាអត្តសញ្ញាណជាតិ ដួងប្រលឹងជាតិ ការពារអធិបតេយ្យភាពជាតិ និងបំផុសផ្នត់គំនិតដល់អ្នកជំនាន់ក្រោយឲ្យស្រលាញ់នូវអ្វីដែលជាអត្តសញ្ញាណជាតិ និងដួងព្រលឹងជាតិរបស់ខ្លួន ពិសេសបំផុសផ្នត់គំនិតដល់អ្នកជំនាន់ក្រោយឲ្យស្រលាញ់នូវអ្វីដែលជាអត្តសញ្ញាណជាតិ និងដួងព្រលឹងជាតិរបស់ខ្លួន។
សូមបញ្ជាក់ថាការដាំគ្រាប់ពូជត្នោតលើកទី០៦នេះ ត្រូវបានរដ្ឋបាលខេត្តស្ទឹងត្រែង សម្រេចដាំ តាមបណ្តោយសងខាងផ្លូវក្រវ៉ាត់ព្រំដែនកម្ពុជា-ឡាវ ចាប់ពីចំណុចបង្គោលព្រំដែនលេខ0៤២ ទៅបង្គោលព្រំដែនលេខ០៤៩ ៕
