ភ្នំពេញៈ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានបង្ហាញនូវការគិតគូរផងដែរ ពាក់ព័ន្ធសំណុំរឿងមន្រ្តីសិទ្ធិមនុស្សអាដហុក៤រូប និងមន្រ្តីគណៈកម្មាធិការជាតិរៀបចំការបោះឆ្នោតមួយរូប ដែលកំពុងជាប់ឃុំនៅពន្ធនាគារព្រៃស សម្តេចនឹងមានការស្នើសុំ ទៅព្រះមហាក្សត្រ ដើម្បីលើកលែង ឬបន្ធូបន្ថយទោសដល់ពួកគេ ពេលសាលក្រមចូលជាស្ថាពរ ។ មិនតែប៉ុណ្ណោះសម្តេចតេជោ បានជំរុញឲ្យស្វែងរកមេធាវី ដើម្បីការពារក្តីដល់ពួកគេ ប្រសើរជាងការដាក់សម្ពាធ។ សម្តេចបានមានប្រសាសន៍ែបបនេះក្នុងឱកាសអញ្ជើញជាអធិបតីចែកសញ្ញាបត្រដល់និស្សិតវិទ្យាស្ថានវ៉ាន់ដារ នាព្រឹកថ្ងៃអង្គារ ទី១០ ខែឧសភា ឆ្នាំ២០១៦នេះ ។
សម្តេចតេជោ ហ៊ុន សែន បានបញ្ជាក់យ៉ាងដូច្នេះថា «ខ្ញុំបញ្ជាក់អ្នកឯងស្លូត ខ្ញុំក៏ត្រូវគិតដែរ បើអ្នកឯងព្រហើន ខ្ញុំក៏ត្រូវគិតដែរ ព្រោះអីចេះ ឥឡូវដំណើរការរបស់តុលាការ ខ្ញុំអត់មានសិទ្ធិលូកលាន់ទេ ប៉ុន្តែរួចពីដំណើរការរបស់តុលាការ ពេលសាលក្រមចូលជាស្ថាពរវាស្ថិតនៅក្នុងដៃរបស់នាយករដ្ឋមន្រ្តីវិញ ព្រោះច្បាប់ពន្ធនាគារ គេអនុញ្ញាតឲ្យនាយករដ្ឋមន្រ្តី ធ្វើការស្នើសុំទៅព្រះមហាក្សត្រ ដើម្បីលើកលែងទោស ឬបន្ធូរបន្ថយទោសនៅពេលណា ក៏បាន។ ប៉ុន្តែបើអ្នកឯងធ្វើបែបហ្នឹង គឺរុញឲ្យខ្លោចរោចឲ្យឆៅ ហើយធ្វើឲ្យអ្នកដែលជាប់នោះ កាន់តែមានបញ្ហាទៅវិញទេ ហើយរដ្ឋបាលមិនអនុញ្ញាតទេ ព្រោះនេះជាបញ្ហាសន្តិសុខមនុស្សរាប់លាននាក់ មិនបញ្ហាបុគ្គល ៤-៥នាក់ទេ ហើយបុគ្គល ៤-៥នាក់ហ្នឹង បើមិនខុសទេ ក៏គេមិនយកទៅធ្វើស្អីដែរ»។
សម្តេចបានបន្ថែមថា «ឥឡូវដំណើរការតាមផ្លូវច្បាប់រកវិធីដោះបន្ទុក តាមរយៈការផ្តល់មេធាវី រកមេធាវីឲ្យពូកែ រកមេធាវីដោះស្រាយបន្ទុកទើប ជាបញ្ហាត្រឹមត្រូវតាមផ្លូវច្បាប់ មិនអាចមកដាក់សម្ពាធតាមរយៈពណ៌នេះ ពណ៌នោះ ថ្ងៃនេះ ថ្ងៃនោះ អត់ទេ អាហ្នឹងនិយាយឲ្យច្បាស់»។
សូមបញ្ជាក់ថា កាលពីម្សិលមិញមនុស្សយ៉ាងតិចចំនួន៨នាក់ត្រូវបានឃាត់ខ្លួននាំមកសាកសួរ ខណៈប្រើរូបភាពស្លៀកពាក់ខ្មៅមកតវ៉ាទាមទារអោយដោះលែងជនជាប់ចោទ៥នាក់កំពុងជាប់ឃុំ ប៉ុន្តែទង្វើនេះបានបំពានទៅនឹងសេចក្តីណែនាំរបស់ក្រសួងមហាផ្ទៃដែលបានចេញកាលពីថ្ងៃទី៨ ខែឧសភា ឆ្នាំ២០១៦ ក៏ដូចជាច្បាប់រដ្ឋ។ ពួកគេត្រូវបានដោះលែងវិញនៅរសៀលថ្ងៃ៩ ឧសភា បន្ទាប់ពីបានធ្វើកិច្ចសន្យាត្រឹមត្រូវ៕
ដោយ សុខ ខេមរា
