ខេត្តបាត់ដំបង៖ បុគ្គលិករបស់ក្រុមហ៊ុនកូបូតាលក់ត្រាក់ទ័រនិងគោយន្តសាខាស្រុកមោងប្ញស្សីចំនួន៣នាក់រងការឆក់ខ្សែភ្លើងស្លាប់១នាក់និងរងរបួសធ្ងន់២នាក់ខណៈដែលជនរងគ្រោះបានឡើងទៅជួសជុលពិដានកន្លែងក្រុមហ៊ុនហើយប៉ះនិងតំណខ្សែភ្លើង។ អ្នករងរបួស២នាក់ បន្ទាប់មកត្រូវបានគេដឹកយកទៅសង្រ្គោះជីវិតនៅមន្ទីរពេទ្យដោយឡែកសម្រាប់អ្នកស្លាប់វិញ ត្រូវបានក្រុមហ៊ុនដឹកសពចេញទាំងយប់យកទៅប្រគល់ជូនគ្រួសារធ្វើបុណ្យតាមប្រពៃណីយ៉ាងស្ងៀមដោយមានការលាក់បាំងពីសមត្ថកិច្ចនិងអាជ្ញាធរមូលដ្ឋាន។ ថ្វីត្បិតហេតុការណ៍មានការបិទបាំងក៏ពិតមែនប៉ុន្តែសមត្ថកិច្ចកំពុងនៅបន្តស្រាវជ្រាវនិងស៊ើបអង្កេត។ ក្រុមហ៊ុនក៏បានបិទទ្វារចាក់សោរចោលទោះបីសមត្ថកិច្ចទៅទំនាក់ទំនងសាកសួរនាំក៏គ្មានអ្នកចេញមកទទួលខុសត្រូវនោះឡើយ។
ហេតុការណ៍បានកើតឡើងកាលពីវេលាម៉ោង៤និង៣០នាទីល្ងាចថ្ងៃទី៨ ខែឧសភា ឆ្នាំ២០១៦ នៅចំណុចទីប្រជុំជនផ្សារមោងប្ញស្សី ស្ថិតក្នុងភូមិពោធិ៍១ ឃុំគារ ស្រុកមោង ប្ញស្សី ខេត្តបាត់ដំបង។
បើតាមប្រភព័ត៌មានពីសមត្ថកិច្ចមូលដ្ឋានប្រាប់ឱ្យដឹងថា ជនរងគ្រោះទាំង៣នាក់ ត្រូវបានគេស្គាល់ឈ្មោះ១,ពេជ្រ ភេទប្រុស អាយុ២៨ឆ្នាំ រស់នៅខេត្តប៉ៃលិនស្លាប់ ២,តេង វ៉ាន់ដា ភេទប្រុស អាយុ២២ឆ្នាំ អ្នរងរបួស ៣,លី សេងលីម ភេទ ប្រុស អាយុ៣០ឆ្នាំអ្នករងរបួសជនរងគ្រោះទាំង២នាក់ រស់នៅភូមិសួស្តី ឃុំតាលាស់ ស្រុកមោងប្ញស្សី។
បើតាមប្រភពព័ត៌មានដដែលឱ្យដឹងទៀតថា មុនពេលកើតហេតុមានមេឃភ្លៀងធ្លាក់យ៉ាងខ្លាំង ហើយជនរងគ្រោះទាំង៣នាក់បាននាំគ្នាឡើងធ្វើពិដានក្រុមហ៊ុនដែលលិចធ្លាយ។ ជនរងគ្រោះស្លាប់ឈ្មោះ,ពេជ្រ ដែលជាអ្នកឡើងមុនគេតាមជញ្ជើធ្វើពីអាលុយមីញ៉ូម ចំណែកជនរងគ្រោះ២នាក់ទៀតជាអ្នកកាន់ជញ្ជើ។ នៅពេលនោះជនរងគ្រោះឈ្មោះពេជ្រ បានឡើងទៅប៉ះនិងតំណខ្សែភ្លើងគេរត់លើពិដានក្រុមហ៊ុនក៏បណ្តាលឱ្យឆក់ធ្លាក់មកក្រោមវិញបណ្តាលឱ្យស្លាប់មួយរំពេចនៅកន្លែងកើតហេតុចំណែក២នាក់ដែលកាន់ជញ្ជើក៏ឆ្លងចរន្តភ្លើងឆក់ដូចគ្នានោះដែរក៏ប៉ុន្តែត្រូវបានគេជួយសង្រ្គោះទាន់ពេលវេលា។
បើតាមប្រភពព័ត៌មានដដែលឱ្យដឹងទៀតថា ករណីនេះសមត្ថកិច្ចកំពុងតែទំនាក់ទំនងឱ្យភាគីខាងក្រុមហ៊ុនចូលខ្លួនមកកន្លែងសមត្ថកិច្ចដើម្បីធ្វើការសួរនាំដោះស្រាយ៕
ដោយ៖ សំ វិច្ឆិកា
