ខេត្តកំពង់ឆ្នាំង៖ នៅព្រឹកថ្ងៃទី១០ ខែឧសភា លោកនាយឧត្តមសេនីយ៍ គន់ គីម អគ្គមេបញ្ជាការង និងជានាយសេនាធិការចម្រុះ នៃកងយោធពលខេមរភូមិន្ទ អមដំណើរដោយ លោកនាយឧត្តមសេនីយ៍ ជា តារា អគ្គមេបញ្ជាការរង រួមនឹង នាយទាហានជាន់ខ្ពស់ជាច្រើនរូបទៀត បានអញ្ជើញជាអធិបតីភាពក្នុងកិច្ចប្រជុំបូកសរុបលទ្ធផលការងារ និងលើកទិសដៅបន្ត របស់កងពលតូចអន្តរាគមន៏ លេខ១ ដែលមានមូលដ្ឋានឈរជើងក្នុងស្រុកកំពង់ត្រឡាច ខេត្តកំពង់ឆ្នាំង។
ក្នុងខ្លឹមសារដែលបានគូសបញ្ជាក់ដោយលោកឧត្តមសេនីយ៍ឯក ព្រំ ផេង នាយរងសេនាធិការចម្រុះ និងជាមេបញ្ជាការកងពលតូចអន្តរាគមន៏លេខ១ បានឲ្យដឹងថា៖ អនុវត្តតាមបទបញ្ជាដ៏ខ្ពង់ខ្ពស់របស់ប្រមុខរាជរដ្ឋាភិបាល ក៏ដូចជារបស់ក្រសួងការពារជាតិ និងអគ្គបញ្ជាការ កងពលតូចអន្តរាគមន៏លេខ១ បានយកចិត្តទុកដាក់ក្តាប់ជាប់រាល់សភាពការណ៏នៅតាមខ្សែបន្ទាត់ព្រំដែន សភាពការណ៏នយោបាយជាតិ អន្តរជាតិ និងបានសហការជាមួយអាជ្ញាធរមានសមត្ថកិច្ច ដើម្បីពង្រឹងសន្តិសុខសណ្តាប់ធ្នាប់នៅមូលដ្ឋាន។ ជាមួយនេះ អង្គភាពនៅបានយកចិត្តទុកដាក់ដល់ការងារហ្វឹកហ្វឺនជាប្រចាំ ដោយបានធ្វើការហ្វឹកហ្វឺន បំប៉នបណ្តុះបណ្តាលជំនាញជាច្រើនប្រភេទ ដើម្បីពង្រឹងសមត្ថភាពដល់ជួរនាយទាហាន និងពលទាហាន។
លោកនាយឧត្តមសេនីយ៍ គន់ គីម បានថ្លែងការវាយតម្លៃខ្ពស់ចំពោះលទ្ធផល ដែលសម្រេចបាន ដោយចាត់ទុកលទ្ធផលនេះថា ជាការខិតខំពុះពារប្រកប ដោយស្មារតីទទួលខុសត្រូវពីសំណាក់មេបញ្ជាការ មេបញ្ជាការរង និងនាយ ទាហាន ពលទាហានទាំងអស់ នៅក្នុងកិច្ចការបំរើជាតិ។ លោកនាយឧត្តមសេនីយ៍ គន់ គីម បានផ្តាំផ្ញើដល់ថ្នាក់ដឹកនាំ នាយទាហាន ពលទាហាន នៃ អង្គភាពកងពលតូចអន្តរាគមន៏លេខ១ ត្រូវបង្កើនការប្រុងប្រយ័ត្នជាប់ជានិច្ច ចំពោះសភាពការណ៏កើតឡើងនានា ហើយប្រឆាំងដាច់ខាតចំពោះជនទាំង ឡាយណា ដែលមានល្បិចកល និង បង្ករចលាចល ប៉ុនប៉ងផ្តួលរំលំរាជរដ្ឋា ភិបាលស្របច្បាប់៕
ដោយ៖ ចន្ថា
