ខេត្តត្បូងឃ្មុំ៖ ជនសង្ស័យចំនួន៣នាក់ត្រូវបាន កម្លាំងនគរបាលជំនាញនៃអធិការដ្ឋាននគរបាលក្រុងសួងធ្វើការចាប់ឃាត់ខ្លួន ពីបទជាប់ពាក់ពន្ធ័ករណី រក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀន ។
ប្រតិបត្តការនេះ ធ្វើឡើងកាលពីវេលាម៉ោង១និង៣០នាទីរសៀល ថ្ងៃទី១០ ឧសភា ២០១៦ នៅចំណុច បារុងយាមកៅស៊ូ ឡូលេខ ០១១B ស្ថិតនៅក្នុងភូមិទី១៨ សង្កាត់សួង ក្រុងសួង ខេត្តត្បូងឃ្មុំ ។
លោក ឈន សុធន អធិការ នគរបាលក្រុងសួងបានឲ្យដឹងថា ជនសង្ស័យ ក្នុងករណីនេះ ទី១ ឈ្មោះ យ៉ុន ឃុនទ្រី ភេទប្រុស អាយុ ២៧ឆ្នាំ នៅភូមិជ្រៃបិទមាស សង្កាត់សួង ទី២ ឈ្មោះ ហោ វ៉ាង ភេទប្រុស អាយុ ១៩ឆ្នាំ នៅភូមិធ្លក សង្កាត់សួង ទី៣ ឈ្មោះ ភាព វល័ក្ខ ភេទប្រុស អាយុ ២៨ឆ្នាំ នៅភូមិ៣១០ សង្កាត់សួង ក្រុងសួង ក្នុងការឃាត់ខ្លួនជនសង្ស័យខាងលើ សមត្ថកិច្ចបានធ្វើការដកហូត នូវវត្ថុតាងថ្នាំញៀន ប្រភេទម្សៅក្រាមពណ៌សចំនួន២កញ្ចប់តូច និងឧបករណ៍ប្រើប្រាស់គ្រឿងញៀនមួយចំនួនទៀត ។
បច្ចុប្បន្ន ជនសង្ស័យទាំង៣នាក់ រួមជាមួយវត្ថុតាង ត្រូវបានសមត្ថកិច្ចនគរបាលជំនាញធ្វើការសាកសួរ និងចងក្រង សំណំុរឿងបញ្ជូនទៅតុលាការចាត់ការតាមនីតិវិធីច្បាប់ ៕
ដោយ៖ វណ្ណះ
