ភ្នំពេញ៖ បេីយោងតាមប្រភពព័ត៍មានពីក្រសួងបរិស្ថាន បានឱ្យដឹងនៅរសៀលថ្ងៃចន្ទទី០១ ខែសីហា ឆ្នាំ២០២២នេះថា៖ សត្វត្មាត ក្នុងសហគមន៍តំបន់ការពារធម្មជាតិព្រៃអណ្តូងដងផ្លឹត ស្ថិតនៅដែនជម្រក សត្វព្រៃឆែប នៃភូមិដងផ្លឹត ឃុំឆែបពីរ ស្រុកឆែប ខេត្តព្រះវិហារ ដែលមានផ្ទៃដីព្រៃសរុបចំនួន ២,៤២៨ហិកតា គ្របដណ្តប់ភាគ ច្រើនដោយព្រៃល្បោះ និងព្រៃពាក់កណ្តាលស្រោង។
ក្រសួងបរិស្ថាន បានឱ្យដឹងទៀតថា ប្រទេសកម្ពុជា យើងមានសត្វត្មាត៣ ប្រភេទ គឺត្មាតភ្លើង ត្មាតត្នោត និងត្មាតផេះ មានវត្តមានសរុបចំនួនជាង ១៤០ ក្បាល ក្នុងព្រៃតំបន់ការពារធម្មជាតិ។
សូមជម្រាបថា កាលពីថ្ងៃទី ២៩ និងទី៣០ ខែកក្កដា ឆ្នាំ២០២២ អគ្គនាយកដ្ឋានចំណេះដឹងនិងព័ត៌មានបរិស្ថាននៃក្រសួងបរិស្ថាន សហការជាមួយរដ្ឋបាលខេត្តឧត្តរមានជ័យ មន្ទីរបរិស្ថានខេត្តឧត្តរមានជ័យ អង្គការ WCS និងអង្គការដៃគូដទៃទៀត បានរៀបចំ «យុទ្ធនាការផ្សព្វផ្សាយសក្តានុពលនៃធនធានធម្មជាតិ និងសត្វស្លាបក្នុងប្រទេសកម្ពុជា» នៅក្រុងសំរោង ខេត្តឧត្តរមានជ័យ។
យុទ្ធនាការនេះបានរៀបចំធ្វើឡើងក្រោមអធិបតីភាពឯកឧត្តម ខ្វៃ អាទិត្យា អនុរដ្ឋលេខាធិការក្រសួងបរិស្ថាន និងឯកឧត្តម ឌី រ៉ាដូ អភិបាលរងខេត្តឧត្តរមានជ័យ ព្រមទាំងមានការអញ្ជើញចូលរួមពីតំណាងក្រសួង មន្ទីរពាក់ព័ន្ធ មន្ត្រីឧទ្យានុរក្ស អង្គការដៃគូ លោកគ្រូ អ្នកគ្រូ និងសិស្សានុសិស្ស។
យុទ្ធនាការនេះរៀបចំឡើងក្នុងគោលបំណង៖ ១- ទាក់ទាញដល់វិស័យទេសចរណ៍នៅតាម តំបន់ការពារធម្មជាតិដោយរួមបញ្ចូលសកម្មភាពមើលសត្វស្លាប ដើម្បីលើកកម្ពស់ជីវភាពប្រជាសហគមន៍។
២- ផ្សព្វផ្សាយពីសក្ដានុពលសត្វស្លាបកម្ពុជានៅតាមតំបន់ការពារធម្មជាតិក្នុងប្រទេសកម្ពុជាដល់សាធារណៈ ជន តាមរយៈការរៀបចំដាក់បង្ហាញរូបភាពនៅក្នុងកម្មវិធី។
៣- បង្កើនចំណេះដឹងដល់សាធារណជនអំពីសារៈ សំខាន់នៃសត្វស្លាបនិងការអភិរក្សជីវៈចម្រុះនៅកម្ពុជាតាមរយៈការធ្វើបទបង្ហាញជាសាធារណៈពីអ្នកជំនាញសត្វស្លាបនិងអ្នកអនុវត្តការងារផ្ទាល់ និង ៤- បណ្ដុះទឹកចិត្តស្រលាញ់និងការចូលរួមពីសាធារណៈជនជាពិសេស ស្រទាប់យុវជនក្នុងការថែរក្សានិងអភិរក្សធនធានធម្មជាតិនិងសត្វស្លាបនៅក្នុងប្រទេសកម្ពុជា។
យុទ្ធនាការនេះ បានរៀបចំឡើងក្រោមការគាំទ្រថវិកាពីសហភាពអឺរ៉ុបតាមរយៈគម្រោងទន្លេសាបយើង អង្គការ WCS និងដៃគូផ្សេងទៀត៕
ដោយ៖សហការី
