តាមតួលេខថ្មីបំផុតរបស់មជ្ឈមណ្ឌលគ្រប់គ្រងនិងបង្ការជំងឺឆ្លងអាមេរិក (CDC) បានបញ្ជាក់ថា មានករណីកើតជំងឺអុតស្វាកើនឡើងដល់ទៅ ១៧ ពាន់នាក់ នៅទូទាំងសហរដ្ឋអាមេរិក។

តំបន់ដែលរងគ្រោះច្រើនជាងគេនោះគឺ ទីក្រុងញូវយ៉កមាន៣១២៤នាក់ ។ បន្ទាប់មកគឺរដ្ឋកាលីហ្វ័រនីញ៉ាមានករណីឆ្លង ៣២៩១ នាក់ និងរដ្ឋផ្លរីដា មានមនុស្សឆ្លង ១៧៣៩ នាក់ …។ អាមេរិកគឺជាប្រទេសដែលមានករណីកើតជំងឺអុតស្វាច្រើនជាងគេ បំផុត។

អគ្គនាយក CDC អាមេរិក លោក Rochelle Walensky បានវាយតម្លៃថា បើទោះបីករណីកើតជំងឺអុតស្វាកើនឡើងនៅទូទាំងប្រទេសក្តី ប៉ុន្តែល្បឿននៃការឆ្លង ដូចជាថយចុះជាងមុន។ ការប្រកាសខាងលើ ក្នុងពេលដែលអាមេរិកទទួលរងការថ្កោលទោសយ៉ាងខ្លាំងពីការប្រតិកម្មយឺតយ៉ាវក្នុងការទប់ស្កាត់ការឆ្លងជំងឺអុតស្វា ក៏ដូចជាព្យាបាលឱ្យទាន់ពេលវេលា។

ក្នុងពេលជាមួយគ្នានេះដែរ នៅថ្ងៃទី២៩ខែសីហាក្រសួងសុខាភិបាលអាមេរិកបានឱ្យដឹងថា ប្រធានាធិបតីបៃឌិន បានចំណាយប្រាក់ ១១ លានដុល្លារ ដើម្បីផលិតវ៉ាក់សាំងបង្ការជំងឺអុតស្វា JYNNEOS នៅចុងឆ្នាំនេះ៕ ដោយធីរីណា

រូប​ថត​ :​ TTXVN-VNA