ភ្នំពេញ៖ លោកប៉ា សុជាតិវង្ស អភិបាលរាជធានីភ្នំពេញ និងមន្ដ្រីរាជការ ក្រោមឱវាទ បានរាប់បាត្រ ព្រះសង្ឃ ២១៥ អង្គ ដើម្បីរំលឹកវិញ្ញាណខក្ខន្ធជូនអ្នកស្លាប់ ក្នុងរបបប្រល័យពូជសាសន៍ប៉ុលពត នៅមជ្ឈមណ្ឌល ប្រល័យពួជសាសន៍ជើងឯក ស្ថិតក្នុងសង្កាត់ជើងឯក ខណ្ឌដង្កោ រាជធានីភ្នំពេញ កាលពីថ្ងៃទី២០ ឧសភា ឆ្នាំ២០១៦។
លោក ប៉ា សុជាតិវង្ស បានបញ្ជាក់ដែរថា៖ ប្រជាពលរដ្ឋខ្មែរនៅតែចងចាំមិនអាចបំភ្លេចបាន នោះគឺរបប៣ឆ្នាំ ៨ខែ និង២០ថ្ងៃ ដែលបង្កវិនាសកម្មយ៉ាងសាហាវឃោរឃៅព្រៃផ្សៃ ធ្វើឲ្យប្រជាពលរដ្ឋខ្មែរ និរាសព្រាត់ប្រាស់បែកបាក់ក្រុមគ្រួសារ ឳពុក ម្តាយព្រាត់កូន ប្រពន្ធព្រាត់ប្តី បងព្រាត់ប្អូនរហូតមកដល់សពថ្ងៃនេះ។ ទោះជាមានរយៈពេលយូរយ៉ាងនេះក្ដី តែបើយើងនឹកគិតហើយគ្រាន់តែបិទភ្នែកស្រម័យបន្តិចនោះ យើងនឹកឃើញភ្លាមហាក់នៅនឹងភ្នែកស្រស់ៗនូវភាពឈឺចាប់ទាំងនោះ គឺនៅតែដិតជាប់ក្នុងបេះដូងខ្មែរតែម្តង ដែលមិនអាចបំភ្លេចបាន។
លោកបន្ដថា៖ មជ្ឈមណ្ឌលឧក្រិដ្ឋកម្មនេះ ជាទីពិឃាដដ៏ធំមួយ ក្នុងចំណោមទីពិឃាដជាង៣០០កន្លែងនៅទូទាំងប្រទេសកម្ពុជាក្នុងរបបកម្ពុជាប្រជាធិបតេយ្យខ្មែរក្រហម ហើយមជ្ឈមណ្ឌលនេះ មានជនរងគ្រោះដែលបានស្លាប់ចំនួន៨.៩៨៥នាក់ រណ្តៅសរុប១២៩រណ្តៅ រណ្តៅជីករួចមានចំនួន៨៦រណ្តៅ និងមានជនបរទេស៩នាក់ទៀតផង ។ ថ្ងៃ២០ ឧសភា ជាទិវាចងចាំមិនអាចបំភ្លេចបាន នូវសោកនាដកម្មខ្លោចផ្សា ក្នុងរបបខ្មែរក្រហម ដែលបានសម្លាប់ប្រជាពលរដ្ឋខ្មែរ ជិត ៣លាននាក់ ក្នុងរយៈពេល៣ឆ្នាំ ៨ខែ ២០ថ្ងៃ។
ក្រុមនិស្សិត បានចូលរួមផ្ដល់នូវវិយោគកថា ៖ ថ្ងៃនេះ គឺជាថ្ងៃ២០ឧសភា ជាប្រវត្តិសាស្ត្រ ដែលប្រជាជនកម្ពុជាយើង នៅតែចងចាំទុក មិនអាចបំភ្លេចបានឡើយ នូវសម័យកាលនរកអវិចី ដែលបានកើតឡើង យ៉ាងស្រស់ៗ នៅលើទឹកដីនៃ មាតុភូមិកម្ពុជា អស់រយៈពេល ៣ឆ្នាំ ៨ខែ ២០ថ្ងៃ នោះគឺរបបកម្ពុជាប្រជាធិបតេយ្យ ប្រល័យពូជសាសន៍។ ការជួបជុំគ្នារបស់យើងនៅទីនេះ គឺដើម្បីរំលឹកនូវគុណូបការៈ របស់បញ្ញវ័ន្ត អ្នកស្នេហាជាតិ និងប្រារព្ធពិធីបង្សុកូលរាប់បាត្រ ប្រគេនព្រះសង្ឃ ឧទ្ទិសមហាកុសល ជូនដល់ដួងវិញ្ញាណរបស់ លោកអ្នកទាំងនោះ នៅទីនេះ ក៏ដូចជានៅទូទាំងប្រទេស។ សូមដួងវិញ្ញាណលោកអ្នកទាំងនោះ អនុមោទនាទទួលយក និងសូមបានស្ថិតនៅក្នុងសុគតិភព ជារៀងរហូតតទៅ។
តាមសក្ខីកម្មជាក់ស្តែង បានបញ្ជាក់ថា ក្រុមជនដែលបានធ្វើការប្រទូស្តរាយ នឹងព្រះត្រៃសរណគមន៍ ពេលស្លាប់វិញ មិនបានទទួលកិត្តិយសទេ មានជាអាទិ៍ ខ្មោច ប៉ុលពត សុនសេន តាម៉ុក អៀងសារី ជាដើម។ ចំណែកមេដឹកនាំជាន់ខ្ពស់របស់ពួកគេ ទោះបីមានវ័យចាស់ជរាយ៉ាងណាក្ដី ក៏ត្រូវរងនូវអកុសល ពិបាកកើតជាសត្វប្រែត សត្វនរកក្នុងអបាយភូមិ យ៉ាងលំបាកវេទនា ទាំងក្នុងជាតិនេះ និងបណ្តាជាតិ តៗទៅមុខទៀត។ កន្លងមក តុលាការខ្មែរក្រហម បានបញ្ចប់សំណុំរឿង លេខ០០១ ដែលទណ្ឌិត កាំង ហ្គេចអ៊ាវ ហៅ ឌុច ត្រូវបានផ្តន្ទាទោស ដាក់គុកអស់មួយជីវិត។
សូមបញ្ជាក់ថា៖ បច្ចុប្បុន្ន សាលាក្តី បានបញ្ចប់កិច្ចដំណើរការ នីតិវិធីលើសំណុំរឿង លេខ០០២-០១ ដែលកំពុងរង់ចាំការចេញសាលក្រុម ដោយអង្គជំនុំជម្រះសាលាដំបូង ហើយកំពុងរៀងចំដំណើរការ ដើម្បីជំនុំជម្រះ ក្នុងសំណុំរឿង០០២-០២ ប្រឆាំងនឹងជនជាប់ចោទពីររូបគឺ នួនជា និង ខៀវសំផន ជាបន្តទៀត។ មជ្ឈមណ្ឌលប្រល័យពូជសាសន៍ ជើងឯក គឺជាទិវាចងចាំ មិនអាចបំភ្លេចបាន នៃរបបប៉ុលពត ដែលបានសម្លាប់ប្រជាពលរដ្ឋខ្មែរ យ៉ាងសាហាវឃោរឃៅ។
តាមរយៈការសម្តែងសិល្បៈ បង្ហាញពីទិដ្ឋភាពខ្លោចផ្សារ នៃការកាប់សម្លាប់ ប្រជាពលរដ្ឋខ្មែរ ក្នុងរបបខ្មែរក្រហម គឺដូចគ្នាទៅនឹងអ្វី ដែលកើតឡើងនៅក្នុងរបប ប៉ុល ពត យើងមិនអាចបំភ្លេចបាន ថ្ងៃ២០ឧសភា នោះទេ យើងចង់ឲ្យអ្នកទាំងអស់គ្នា ទាំងប្រជាពលរដ្ឋកម្ពុជា និងបរទេស បានឃើញនូវទុក្ខសោកខ្លោចផ្សា ដែលប្រជាពលរដ្ឋ បានឆ្លងកាត់កន្លងមក។
នៅក្នុងឱកាសនេះដែរ មានសារជាច្រើន បានសម្តែងចេញពីទឹកចិត្ត ប្រជាពលរដ្ឋដោយ ស្នើសុំឲ្យអន្តរជាតិទាំងអស់ មេត្តាផ្តល់យុត្តិធម៌ ដល់ប្រជាជនកម្ពុជាទាំងមូល មានន័យថា សុំឲ្យពន្លឿនតុលាការអន្តរជាតិ ដែលកំពុងដំណើរការ បច្ចុប្បន្ននេះក្នុងប្រទេសកម្ពុជា ដើម្បីកាត់ទោសពួកអតីត មេដឹកនាំខ្មែរក្រហម ឲ្យបានចប់ឆាប់ៗ និងដើម្បីជាមេរៀន ទុកឲ្យមនុស្សជំនាន់ក្រោយ ដោយមិនត្រូវឲ្យរបបបែបនេះ កើតឡើងសារជាថ្មីទេ។
នៅព្រឹកថ្ងៃទី២០ ខែឧសភា ឆ្នាំ២០១៦ នៅមជ្ឈមណ្ឌលប្រល័យពូជសាសន៍ជើងឯកនោះ មានការសម្តែងល្ខោន បង្ហាញពីការចូលកាន់កាប់អំណាច នៃរបបកម្ពុជាប្រជាធិបតេយ្យ ដែលពួកកងទ័ពអាវខ្មៅ បានជម្លៀសប្រជាពលរដ្ឋ ចេញពីទីក្រុងភ្នំពេញ កាលពីថ្ងៃទី១៧ ខែមេសា ឆ្នាំ១៩៧៥ និងបានកាន់កាប់របបវាលពិឃាដ អស់រយៈពេល ៣ឆ្នាំ ៨ខែ ២០ថ្ងៃ ហើយបានកាប់សម្លាប់ប្រជាពលរដ្ឋជិត ២ លាននាក់។ ផ្ទាំងទស្សនីយភាពនោះ បានបង្ហាញពីការដួលរលំទៅវិញ នៃរបបខ្មែរក្រហម នាថ្ងៃទី៧ ខែមករា ឆ្នាំ១៩៧៩ ព្រមទាំងចាប់អតីតមេដឹកនាំខ្មែរក្រហម យកទៅកាត់ទោស តាមច្បាប់ផងដែរ។
លោកយាយម្នាក់ ដែលជាអ្នកធ្លាប់រងគ្រោះក្នុងរបបខ្មែរក្រហម ហើយបច្ចុប្បន្នរស់នៅក្នុងសង្កាត់ដង្កោ ខណ្ឌដង្កោ រាជធានីភ្នំពេញ ដែលបានមកចូលរួមក្នុងទិវាចងចាំមិនអាចបំភ្លេចបាន ២០ ឧសភា បានមានប្រសាសន៍សម្តែងនូវទុក្ខវេទនាក្នុងរបបខ្មែរក្រហមថា និងគាំទ្រការអភិវឌ្ឍប្រទេសមានការរីកចម្រើន ដែលដឹកនាំដោយសម្តេចអគ្គមហាទាំងបី និងគាំទ្រការកាត់ទោសពួកអតីតមេដឹកនាំខ្មែរក្រហម៕
ដោយ៖ សំរិត
...
