ខេត្តបាត់ដំបង៖ ផ្លូវជាតិលេខ៥៧ ចាប់ពីស្រុកបវេល រហូតដល់ស្រុកសំពៅលូន ខេត្តបាត់ដំបង ដែលគេប៉ានប្រមាណមានប្រវែងប្រហែល៥០គីឡូម៉ែត្រ ត្រូវគេមើលឃើញថា បាននិងកំពុងប្រឈមការខូចខាត គ្រាដែលកំណាត់ផ្លូវជាតិមួយខ្សែនេះ មានស្នាមហែក ប្រេះ និងស្រុតជាអន្លើៗ ដោយគេមិនទាន់ឃើញអាជ្ញាធរខេត្ត ជាពិសេសមន្ទីរសាធារណការ និងជញ្ជូនខេត្តបាត់ដំបងមិនទាន់ប្រញាប់ ទៅជួសជុលឡើងនៅឡើយនោះទេ ។
ការមិនអើពើ និងមិនយកចិត្តទុកដាក់ជួសជុលផ្លូវឡើងវិញនោះ ត្រូវបានប្រជាពលរដ្ឋនាំគ្នារិះគន់យ៉ាងធ្ងន់ ដល់មន្ទីរសាធារណការខេត្តបាត់ដំបង ហាក់បីដូចជាមានការស្ពឹកស្រពន់ មិនបានយកចិត្តទុកដាក់ពីការខូចខាតផ្លូវ ហើយគេទំនងទុកឱ្យកំណាត់ផ្លូវមួយខ្សែនេះ រងការខូចខាតទាំងស្រុង ទើបគេភ្ញាក់រលឹកមកជួសជុលតែម្តង គ្រាដែលផ្លូវជាតិមានការខូចខាត់តិចតួចមិននាំគ្នាកសាងរជួសជុលនោះ ។ បែកស្នាម ប្រេះ នៃកំណាត់ផ្លូវជាតិលេខ៥៧ ត្រូវគេដាក់ការសង្ស័យថា បណ្តាលមកពីរថយន្តដឹកទំនិញផ្ទុកធ្ងន់លើសចំណុះ និងផ្លូវកសាងមិនសូវមានគុណភាព ។
បើតាមប្រភពព័ត៌មានពីប្រជាពលរដ្ឋ ដែលរស់នៅអមសងខាងផ្លូវជាតិលេខ៥៧ បានប្រាប់ឱ្យដឹងថា កំណាត់ផ្លូវជាតិលេខ៥៧មួយខ្សែខាងលើ បានរងការហែកប្រេះស្រុតជិតមួយឆ្នាំមក ហើយកំណាត់ផ្លូវមួយខ្សែនេះ បានរងការដឹកធ្ងន់ពីរថយន្តដឹកទំនិញឆ្លងកាត់ចេញពីច្រកព្រំដែន កម្ពុជា-ថៃយ៉ាងគគ្រឹកគគ្រេង និងរថយន្តដឹកដំឡូងមី ដែលគេដឹកឆ្លងកាត់យកមកលក់នៅព្រំដែនកម្ពុជា-ថៃ ក្នុងស្រុកភ្នំព្រឹក សំពៅលូន និងស្រុកកំរៀងជាដើមនោះ ។
សូមរំលឹកថា កន្លងមកសម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជាធ្លាប់លើកឡើង ឱ្យអាជ្ញាធរខេត្ត ឬក្រសួង ត្រូវយកចិត្តទុកដាក់មើលថែទាំផ្លូវឱ្យបានល្អ បើផ្លូវណាខូចខាតតិចតួច ប្រញាប់ទៅកសាងជួសជុលឡើងវិញ កុំទុកឱ្យខូចធ្ងន់ទៅៗ ។ មិនតែប៉ុណ្ណោះ សម្តេចតេជោ ហ៊ុន សែន ក៏បានធ្លាប់ស្តីបន្ទោសក្រសួងសាធារណការ និងដឹកជញ្ជូនថា ជាក្រសួងស្ពឹកជាងគេ ផងដែរ ៕
ដោយ៖ សំ វិច្ឆិកា
