កម្លាំងសន្តិសុខរាប់ពាន់នាក់បានធ្វើការហ្វឹកហាត់សម្រាប់ការពារសន្តិសុខនៅក្នុងកិច្ចប្រជុំប្រទេសដែលមានសេដ្ឋកិច្ចខ្ពស់ទាំង៧ «G7» ដែលត្រូវធ្វើឡើងនៅថ្ងៃទី២៦ ខែឧសភា ឆ្នាំ២០១៦ នៅក្នុងទីក្រុង Ise Shima ភាគកណ្តាលនៃប្រទេសជប៉ុន។
តាមកម្លាំងប៉ូលិសជប៉ុនបានឲ្យដឹងថា មានប៉ូលិសរហូតដល់ទៅ ៧ម៉ឺននាក់ បានដាក់ពង្រាយការពារសន្តិសុខនៅទីតាំងសំខាន់ៗ ដែលត្រូវរៀបចំកិច្ចប្រជុំកំពូលខាងលើ។ ប៉ូលិសរាប់ពាន់នាក់ក៏បានដាក់ពង្រាយនៅទីក្រុង ហីរ៉ូស៊ីម៉ា ជាទីតាំងដែលប្រធានាធិបតី អូបាម៉ា មានដំណើរទស្សនកិច្ចជាប្រវត្តិសាស្ត្រនៅទីនោះនាថ្ងៃទី២៧ ខែឧសភា ឆ្នាំ២០១៦ ខាងមុខនេះ ។ មន្ត្រីជប៉ុនបានឲ្យដឹងថា ក្រុមប៉ូលិសបានយាមល្បាតយ៉ាងតឹងតែងនៅដំបន់ខាងលើដោយខ្លាចមានពលរដ្ឋធ្វើបាតុកម្មប្រឆាំងលោក អូបាម៉ា ។
ជប៉ុនជាប្រទេសមានសន្តិសុខបំផុតនៅក្នុងតំបន់ ប៉ុន្តែជប៉ុនចាប់បាច់ត្រូវតែពង្រឹងការការពារសន្តិសុខជៀសវាងហេតុការអាក្រក់កើតឡើង ខណៈដែលក្រុមភេរវកម្មបានបង្កប់ខ្លួននៅជុំវិញពិភពលោករងចាំឱកាសវាយប្រហារទៅលើមេដឹកនាំសំខាន់ៗរបស់ពិភពលោក។
កន្លងមកមន្ត្រីហិរញ្ញវត្ថុនិងសន្តិសុខ G7 បានបញ្ចប់កិច្ចប្រជុំនក្នុងទីក្រុង សេនដាយ ប្រទេសជប៉ុន ដោយបានសន្យានិងវិធានការមួយចំនួនដែល G7 បានចែងនៅក្នុងសេចក្តីប្រកាសព័ត៌មានរួម។ ការសន្យា និងវិធានការទាំងនោះមានការពង្រឹងយុទ្ធនាការប្រឆាំងនឹងប្រភពហិរញ្ញវត្ថុរបស់អង្គការភេរវនិយម ការបង្កើតមូលនិធិជំនួយសកលសម្រាប់ប្រឆាំងនឹងជម្ងឺឆ្លង ឬមួយការមិនលូកដៃនៅក្នុងនយោបាយអត្រាប្តូរប្រាក់ជាដើម។ តែអ្វីដែល G7 មិនអាចលាក់កំបាំងពីក្តីបារម្ភរបស់ខ្លួនគឺការចាកចេញជាយថាហេតុរបស់ប្រទេសអង់គ្លេសពីសមាជិកសហភាពអឺរ៉ុប។
ក្រុមប្រទេសមហាអំណាចឧស្សាហកម្មទាំង៧ ក្នុងលោកហៅកាត់ថា G7 បានព្រមានទុកជាមុនពីផលវិបាកសេដ្ឋកិច្ចជាយថាហេតុក្នុងករណីណាដែលប្រទេសអង់គ្លេសចាកចេញពីសមាជិកសហភាពអឺរ៉ុប។ ផលវិបាកសេដ្ឋកិច្ចដែល G7 យល់ឃើញថា មិនមែនកើតមានតែលើប្រទេសអង់គ្លេស ឬសហភាពអឺរ៉ុបប៉ុណ្ណោះទេ តែវានឹងបង្កហានិភ័យដល់សេដ្ឋកិច្ចពិភពលោកដែលកំពុងផុយស្រួយស្រាប់នាពេលបច្ចុប្បន្ន។ សូម្បីតែរូបលោករដ្ឋមន្រ្តីក្រសួងហិរញ្ញវត្ថុអង់គ្លេស George Osborne ដែលមិនចង់ឃើញអង់គ្លេសចេញពីអឺរ៉ុបក៏បានយល់ស្របតាម G7 ដែរ។
នៅក្នុងសេចក្តីប្រកាសព័ត៌មានមួយចេញផ្សាយថ្ងៃទី២៥ ខែឧសភា នេះ លោក George បានព្រមានថា នៅក្នុងករណីដែលអង់គ្លេសចេញពីអឺរ៉ុប អង់គ្លេសពិបាកនឹងចរចាជាមួយសហភាពអឺរ៉ុប ឬមួយជាមួយនឹងប្រទេសមិនមែនសមាជិកអឺរ៉ុបផ្សេងទៀតក្នុងការស្វែងរកកិច្ចព្រមព្រៀងថ្មីក្នុងវិស័យផ្សេងៗ ពិសេសវិស័យពាណិជ្ជកម្ម។ ចំណែកសមភាគីបារាំងលោក Michel Sapin ក៏បានព្រមានទុកជាមុនថា ផលវិបាកសេដ្ឋកិច្ចធ្ងន់ធ្ងរនឹងធ្លាក់លើអង់គ្លេសនៅក្នុងករណីដែលអង់គ្លេសចាកចេញពីសហភាពអឺរ៉ុប។
យ៉ាងណាក៏ដោយគេត្រូវរង់ចាំលទ្ធផលបោះឆ្នោតប្រជាមតិក្នុងប្រទេសអង់គ្លេសនាថ្ងៃទី២៣ ខែមិថុនា ឆ្នាំ២០១៦ខាងមុខ ទើបដឹងច្បាស់ពីការសម្រេចចិត្តរបស់ប្រជាជនអង់គ្លេស។ តែលទ្ធផលស្ទង់មតិចុងក្រោយឲ្យដឹងថា សម្លេងចង់ទុកអង់គ្លេសក្នុងអឺរ៉ុបកំពុងមានច្រើនជាងសម្លេងចង់ឲ្យដកអង់គ្លេសចេញពីអឺរ៉ុប។ នៅក្នុងសេចក្តីប្រកាសព័ត៌មានរួមចេញផ្សាយថ្ងៃទី២៤ ខែឧសភា នេះ G7 បានសន្យាវាយប្រហារលើគ្រប់បណ្តាញហិរញ្ញវត្ថុរបស់គ្រប់អង្គការ ភេរវនិយម ពិសេសអង្គការរដ្ឋអ៊ីស្លាម និងអង្គការអាល់កៃដា។ បណ្តាញហិរញ្ញវត្ថុដែល G7 យល់ឃើញថា ជាអ្នកផ្គត់ផ្គង់លុយកាក់ និងមធ្យោបាយផ្សេងៗទៀតដល់ពួកភេរវជនឲ្យបង្កភេរវកម្ម ឬមួយក៏ចិញ្ចឹមបណ្តាញរបស់ពួកវាក្នុងការសាបព្រោះនូវមនោគមវិជ្ជាជ្រុលនិយម។
នៅក្នុងន័យនេះ G7 បានស្នើឲ្យមានកិច្ចសហប្រតិបត្តិការរវាងប្រទេសនិងប្រទេសដោយមានជំនួយពីស្ថាប័នហិរញ្ញវត្ថុអន្តរជាតិក្នុងការផ្តោះប្តូររាល់ព័ត៌មានទាំងឡាយដែលទាក់ទងនឹងការដោះដូរ និងការផ្ទេរទឹកប្រាក់នៅតាមបណ្តាញធនាគារ។ កម្មវត្ថុ គឺដើម្បីចង់ដឹងពីប្រភព និងគោលដៅនៃការដោះដូរ និងការផ្ទេរលុយទាំងនោះដោយធ្វើយ៉ាងណាកុំឲ្យធ្លាក់ទៅក្នុងកណ្តាប់ដៃអង្គការភេរវនិយម។
ទន្ទឹមគ្នានេះ G7 ក៏បានអំពាវនាវឲ្យមានការពង្រឹងបន្ថែមលើវិធានការហិរញ្ញវត្ថុដែលមានស្រាប់សព្វថ្ងៃក្នុងការប្រយុទ្ធប្រឆាំងនឹងការលាងលុយកខ្វក់។ នៅក្នុងន័យនេះ G7 បានស្នើឲ្យមានការដាក់ទ័ណ្ឌកម្ម ឬមួយក៏ផ្អាប់លុយនៅក្នុងគណនីយណាដែលម្ចាស់មិនព្រមប្រាប់អត្តសញ្ញាណពិតប្រាកដ។
និយាយពីស្ថានភាពសេដ្ឋកិច្ចទូទៅនៅក្នុងលោកវិញ G7 បានគូសបញ្ចាក់ពីភាពចាំបាច់ដែលប្រទេសនីមួយៗមិនគួរលូកដៃចូល អន្តរាគមន៍នៅក្នុងទីផ្សារប្តូរប្រាក់ ពោលរដ្ឋាភិបាលមិនត្រូវចេញមុខជាអ្នកកំណត់តម្លែអត្រាប្តូរប្រាក់របស់ខ្លួនទេ។ G7 បានយល់ឃើញថា គេគួរតែទុកឲ្យតម្លៃអត្រាប្តូរប្រាក់ឡើងចុះទៅតាមហាងឆេងនៅលើទីផ្សារអន្តរជាតិ។ ប្រតិកម្មរបស់ G7 ដូចនេះបានធ្វើឡើងបន្ទាប់ពីជប៉ុនបានចូលអន្តរាគមន៍ទម្លាក់តម្លៃប្រាក់យេនធៀបនឹងដុល្លារក្នុងគោលដៅជំរុញការនំាចេញរបស់ខ្លួន៕
ប្រែសម្រួល៖ មែវ សាធី
