ប្រភពខ្សឹបខ្សៀវថា សសរគ្រឹះប្រភេទមូល ទំហំអង្កត់ផ្ចិត៦០០មីល្លីម៉ែត្រ ត្រូវបានឈ្មួញនាំចូលពីប្រទេសវៀតណាមតាមទូក, សាឡង់ធំៗ ឆ្លងកាត់ព្រំដែនទឹក ច្រកក្អមសំណរ រួចបន្តតាមទន្លេមេគង្គចតនៅម្តុំអតីតផែភ្នំពេញចាស់ រួច ផ្ទេរទំនិញពីសាឡង់ឡើងទៅលើរថយន្ត ដឹកជញ្ជូនទៅការដ្ឋានសាងសង់ផ្សារទំនើបអ៊ីអនទី២ ។
ជាធម្មតា ទូកដឹកទំនិញតាមផ្លូវទឹក ត្រូវចូលកំពង់ផែស្វយ័តភ្នំពេញ ដែលស្ថិតនៅតាមបណ្តោយផ្លូវជាតិលេខ១ ក្នុងស្រុកកៀនស្វាយ ដើម្បីផ្ទេរទំនិញ និងត្រួតពិនិត្យ ។ ប៉ុន្តែសសរគ្រឹះដែលនាំចូលយកមកផ្គត់ផ្គង់គម្រោងសាងសង់ផ្សារទំនើបអ៊ីអនទី២ សម្រាប់បុកគ្រឹះមិនបានផ្ទេរទំនិញនៅកំពង់ផែស្វយ័តភ្នំពេញ ។ ពួកឈ្មួញបាននាំទំនិញចូលគេចពន្ធ ដើម្បីយកមកផ្គត់ផ្គង់គម្រោងផ្សារនេះ ដោយមិនបង់អាករបន្ថែមនោះឡើយ ។
ដូច្នេះអ្នកទិញគួរត្រួតពិនិត្យទំនិញដែលបានទិញថា តើបាននាំចូលដោយស្របច្បាប់បង់ពន្ធត្រឹមត្រូវហើយឬនៅ ។
ប្រភពបានឲ្យដឹងថា គម្រោងផ្សារទំនើបអ៊ីអនទី២នេះ គឺបានប្រគល់ការសាងសង់ទៅឲ្យក្រុមហ៊ុនកូរ៉េមួយឈ្មោះ Huyandai ហើយក្រុមហ៊ុននេះបានទិញសសរគ្រឹះគេចពន្ធនាំចូលពីប្រទេសវៀតណាម ។ គេនិយាយថា ផ្សារទំនើបបែបនេះមិនគួរនាំទំនិញគេចពន្ធមកសាងសង់នោះឡើយ ។
អ្នកទទួលខុសត្រូវគម្រោងសាងសង់ផ្សារទំនើបអ៊ីអនទី២ គួរសិក្សាលើសម្ភាររបស់ខ្លួន៖
-រាល់សម្ភារប្រើប្រាស់ក្នុងការសាងសង់ទាំងអស់ត្រូវបានបង់អាករបន្ថែម VAT 10% ចំពោះការទិញក្នុងស្រុក ។
-រាល់សម្ភារប្រើប្រាស់ក្នុងការសាងសង់ដែលនាំចូលពីប្រទេសវៀតណាម ត្រូវធានាថា បានបង់ពន្ធនាំចូលត្រឹមត្រូវតាមច្បាប់ និងបានបង់ពន្ធអាករបន្ថែម VAT10% ត្រឹមត្រូវ ៕
