ភ្នំពេញ៖ កាកបាទក្រហមកម្ពុជា បានផ្តល់អំណោយមនុស្សធម៌ជូនប្រជាពលរដ្ឋរងគ្រោះដោយខ្យល់កន្ត្រាក់ចំនួន២៧៤ គ្រួសារ ក្នុងនោះ ខេត្តបន្ទាយមានជ័យ ចំនួន៩០គ្រួសារ ខេត្តសៀមរាប ចំនួន ៩១គ្រួសារ និងខេត្តក្រចេះ ចំនួន ៩៣គ្រួសារ កាលពីថ្ងៃទី២៧ ខែឧសភា ឆ្នាំ២០១៦ ។
សូមជម្រាបថា គិតចាប់ពីថ្ងៃទី១ ខែមករា ដល់ថ្ងៃទី២៧ ខែឧសភា ឆ្នាំ២០១៦ កាកបាទក្រហមកម្ពុជា ទាំងថ្នាក់កណ្តាល និងសាខាកាកបាទក្រហមកម្ពុជាទាំង២៥ រាជធានី-ខេត្ត បានផ្តល់ជំនួយមនុស្សធម៌ជូនប្រជាពលរដ្ឋរងគ្រោះដោយខ្យល់កន្ត្រាក់បានសរុប ចំនួន ៦,៨១៧គ្រួសារ មកពី ៦៩០ភូមិ ក្នុងឃុំចំនួន៣៨០ ស្រុកចំនួន១៥៣ និងខេត្តចំនួន២៣ ។
ខេត្តដែលរងគ្រោះ មានខេត្តចំនួន៨ ដែលបានទទួលរងផលប៉ះពាល់ធ្ងន់ជាងគេ ( លើសពី៣០០គ្រួសារ )
– ខេត្តសៀមរាប ចំនួន៩៣៣គ្រួសារ ។
– ខេត្តបាត់ដំបង ចំនួន៩១០គ្រួសារ ។
– ខេត្តកំពង់ចាម ចំនួន៨៧៩គ្រួសារ ។
– ខេត្តបន្ទាយមានជ័យ ចំនួន៦២៤គ្រួសារ ។
– ខេត្តកំពង់ធំ ចំនួន៤៤៩គ្រួសារ ។
– ខេត្តព្រះវិហារ ចំនួន៣៩០គ្រួសារ ។
– ខេត្តឧត្តរមានជ័យ ចំនួន៣៧០គ្រួសារ ។
– ខេត្តប៉ៃលិន ចំនួន៣១១គ្រួសារ ។
កាកបាទក្រហមកម្ពុជាដឹកនាំដោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចប្រធានតែងតែគិតគូរ ពីសុខទុក្ខពលរដ្ឋរងគ្រោះដោយយថាហេតុស្ទើរគ្រប់ច្រកល្ហកនៅតំបន់ដាច់ស្រយាល ដោយមិនប្រកាន់ពូជសាសន៍ ពណ៌សម្បុរ និន្នាការនយោបាយឡើយ ៕
ដោយ៖ សុខ ខេមរា
