ខេត្តបន្ទាយមានជ័យ ៖ គ្រោះថ្នាក់ចរាចរណ៍ដ៏រន្ធត់មួយបណ្ដាលឲ្យប្ដីប្រពន្ធនិងកូន២នាក់ស្លាប់យ៉ាងអាណោមអាធ័ម ខណៈរថយន្ត១គ្រឿងបើកកៀរម៉ូតូជនរងគ្រោះឲ្យដួល ហើយត្រូវរថយន្ត១គ្រឿងផ្សេងទៀតបើកកិនពីលើស្លាប់រដូករណែលតែម្តង ។
ករណីគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៩និង៥០នាទីយប់ថ្ងៃទី២៧ ខែឧសភា ឆ្នាំ២០១៦ នៅតាមបណ្ដោយផ្លូវជាតិលេខ៥ ចន្លោះចន្លោះគីឡូម៉ែត្រ៣៨២-៣៨៣ ស្ថិតនៅភូមិម៉ក់ហ៊ឺន ឃុំកូប ស្រុកអូរជ្រៅ ខេត្តបន្ទាយមានជ័យ ។
នគរបាលស្រុកអូរជ្រៅបានឲ្យដឹងថា ជនរងគ្រោះដែលត្រូវរថយន្តកិនស្លាប់ទាំង៤នាក់ទី១- ឈ្មោះ នៅ សុធី អាយុ៣៨ឆ្នាំ(ប្ដី) ទី២-ឈ្មោះ ឆេង ស៊ីណៃ អាយុ៣១ឆ្នាំ(ប្រពន្ធ) ទី៣-ឈ្មោះ នៅ ស៊ីនិច ភេទស្រី អាយុ៦ឆ្នាំ(កូនទី២) និងទី៤-ឈ្មោះ នៅ ស៊ីនិល ភេទប្រុស អាយុ៤ឆ្នាំ (ជាកូនពៅ) បច្ចុប្បន្នរស់នៅភូមិថ្មបាំង ឃុំបឹងបេង ស្រុកម៉ាឡៃ ខេត្តបន្ទាយមានជ័យ ។
បើតាមប្រភពសាញ់ញាតិគ្រួសាររងគ្រោះឲ្យដឹងថា ក្រុមគ្រួសារជនរងគ្រោះខាងលើនេះមានសមាជិកសរុប៦នាក់ បច្ចុប្បន្ននៅសល់កូនប្រុស២នាក់ ម្នាក់អាយុជាង១០ឆ្នាំ និងម្នាក់ទៀត អាយុ១០ឆ្នាំ ។
បើតាមនគរបាលជំនាញចុះពិនិត្យកន្លែងកើតហេតុបានសន្និដ្ឋានថា ជនរងគ្រោះទាំង៤នាក់ខាងលើនេះទំនងជាត្រូវរថយន្តកៀរឲ្យម៉ូតូដួលរួចមានរថយន្ត១គ្រឿងទៀតមកពីក្រោយកិនពីលើបណ្ដាលឲ្យស្លាប់រដូករណែលនៅលើផ្លូវជាតិលេខ៥ ហើយរថយន្តបង្កក៏បានបើកគេចទៅមុខបាត់ខណៈពុំមានអ្នកណាបានឃើញ។
បើតាមសាច់ញាតិស្និតនិងក្រុមគ្រួសារជនរងគ្រោះឲ្យដឹងថា នៅមុនពេលកើតហេតុប្ដីប្រពន្ធជាជនរងគ្រោះខាងលើនេះបានឈ្លោះប្រកែកគ្នាយ៉ាងស្រួចស្រាវ ហើយពួកគេបាននាំគ្នាទៅផ្ទះប្រធានភូមិ-ឃុំដើម្បីសុំលែងលះនិងចែកទ្រព្យសម្បត្តិ-កូនចៅទៀតផង។ ក៏ប៉ុន្តែមេភូមិនិងមេឃុំបានសម្របសម្រួលរហូតប្ដីប្រពន្ធខាងលើនេះបានជានានិងគ្នាជាធម្មតាវិញហើយសង្ស័យដឹកគ្នារួមជាមួយនិងកូន២នាក់ដើម្បីទៅលេងស្រុកកំណើតនៅឯខេត្តកំពង់ធំក៏ជួបឧប្បត្តិហេតុដូច្នេះទៅ។
លោក ឆេង អ៊ីសុខា អធិការស្រុកអូរជ្រៅបានឲ្យដឹងតាមទូរសព្ទនៅរសៀលថ្ងៃទី២៨ ខែឧសភា ឆ្នាំ២០១៦ ថាករណីគ្រោះថ្នាក់ចរាចរណ៍នេះបើតាមការពិនិត្យនៅកន្លែកកើតហេតុម៉ូតូនិងជនរងគ្រោះមានស្នាមរថយន្តបុកពីក្រោយ ហើយប្រហែលជាមានរថយន្តមួយគ្រឿងទៀតបើកកិនពីលើទើបបណ្ដាលឲ្យជនរងគ្រោះស្លាប់ទាំង៤នាក់តែម្ដង។
លោកអធិការបញ្ជាក់ថា ករណីនេះសមត្ថកិច្ចបានបន្តស្រាវជ្រាវស៊ើបអង្កេតពិនិត្យនៅកន្លែងកើតហេតុដើម្បីប្រមូលស្លាកស្នាមវត្ថុតាងដើម្បីបន្តស្វែងរករថយន្តបង្កឃាត់យកមកផ្ដន្ទាទោសតាមផ្លូវច្បាប់។
បើតាមមន្ត្រីនគរបាលខេត្តបន្ទាយមានជ័យឲ្យដឹងថា នៅព្រឹកថ្ងៃទី២៨ ខែឧសភា ឆ្នាំ២០១៦ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យបានដឹកនាំកម្លាំងចូលរួមរំលែកទុក្ខក្រុមគ្រួសារសាច់ញាតិនៃសពនិងបានចូលរួមជាបច្ច័យចំនួន៥០ម៉ឺនរៀលដែលជាអំណោយរបស់លោកឧបនាយករដ្ឋមន្ត្រី កែ គឹមយ៉ាន និងមឈូសចំនួន៤ជាអំណោយរបស់សប្បុរសជនប្រគេនដល់ព្រះសង្ឃនៅវត្តរតនៈនិមិត្ត ស្ថិនក្នុងសង្កាត់និមិត្តដើម្បីរៀបចំធ្វើបុណ្យបូជាសាកសពជនរងគ្រោះទាំង៤នាក់ទៅតាមប្រពៃណី។
នៅកន្លែងប្រារពពិធីតម្កល់សាកសពជនរងគ្រោះអ្វីដែលគេសង្វេកនិងគួឲ្យអាណិតអាសូរបំផុតនោះគឺកូនតូចៗ២នាក់ដែលនៅមានជីវិតឈរសម្រក់ទឹកភ្នែកមុខមឈូសឪពុកម្ដាយជាទីស្រឡាញ់របស់ពួកគេដែលបានចែកឋានទុកឲ្យពួកគេនៅកំព្រាឪពុកម្ដាយ៕
ដោយ៖ វណ្ណា
