កូរ៉េខាងជើងគម្រាមបាញ់ពន្លិចនាវាចម្បាំងកូរ៉េខាងត្បូងប្រសិនបើនាវាទាំងនោះឆ្លងចូលព្រំដែនសមុទ្រនៅក្នុងប្រទេសនេះ។
ការប្រកាសកើតឡើងក្រោយពេលដែនកងម៉ារីនកូរ៉េខាងត្បូងបាញ់ប្រមានទៅលើនាវាកូរ៉េខាងជើង២គ្រឿង ដែលកូរ៉េខាងត្បូងចាត់ទុកថាបានចូលតំបន់សមុទ្ររបស់ខ្លួន។
នៅក្នុងការប្រកាសមួយ មេបញ្ចាការកងទ័ពកូរ៉េខាងជើងបានចាត់ទុកថា សកម្មភាពរបស់កូរ៉េខាងត្បូង គឺជាការឌឺដង ជាការប៉ុនប៉ងបង្ករឲ្យមានគ្រោះថ្នាក់ដើម្បីលុបចោលសំណើរចចារថ្នាក់យោធារវាងប្រទេសទាំងពីរ។
កម្លាំងទាហានកូរ៉េខាងជើងបញ្ចាក់ថា នាវាកូរ៉េខាងត្បូងគ្មានអាវុធនៅក្នុងដៃឡើយពេលកូរ៉េខាងត្បូងបាញ់គម្រាម ។ មន្ត្រីកូរ៉េខាងជើងបញ្ចាក់ទៀតថា ប្រសិនបើនាវាចម្បាំងរបស់កូរ៉េខាងត្បូងចូលក្នុងដែនសមុទ្រប្រទេសខ្លួនត្រឹមតែ០.០១មីលីម៉ែត្រនឹងរងការបាញ់ពន្លិចជាមិនខាន។
កម្លាំងទាហានជើងទឹកកូរ៉េខាងត្បូងកាលពីថ្ងៃទី២៧ ខែឧសភា ឆ្នាំ២០១៦ បានបាញ់ប្រមាន៥គ្រាប់បណ្តេញនាវានេសាទកូរ៉េខាងជើងចេញពីដែនសមុទ្ររបស់ខ្លួន។ កាលពីខែកុម្ភៈក៏មានហេតុការបាញ់ប្រហារដូចគ្នានេះដែរ។
កន្លងមកកូរ៉េខាងជើងបានស្នើដល់កូរ៉េខាងត្បូងឲ្យមានកិច្ចពិភាក្សាថ្នាក់មន្ត្រីយោធាដើម្បីបញ្ចប់វិបត្តិ បញ្ចប់ភាពតានតឹង។ ប៉ុន្តែភាគីកូរ៉េខាងត្បូងវិញបដិសេធដោយទីក្រុងសេអ៊ូលបានលើកយកហេតុផលទៅពន្យល់ជាថ្មីថា ដើម្បីអាចផ្តើមកិច្ចចរចាណាមួយបាន ទីក្រុងព្យុងយ៉ាងត្រូវតែចាត់វិធានការជាក់ស្តែងឆ្ពោះទៅបោះបង់ចោលទាំងស្រុងនូវមហិច្ឆតាអាវុធនុយក្លេអ៊ែររបស់ខ្លួនជាមុនសិន ។
ចម្លើយបដិសេធរបស់កូរ៉េខាងត្បូងនេះ គឺជាការតបនឹងសាររបស់កងទ័ពកូរ៉េខាងជើងផ្សព្វផ្សាយថា កងទ័ពកូរ៉េខាងជើងជំរុញកូរ៉េខាងត្បូងឲ្យទទួលយកការហុចដៃរបស់កូរ៉េខាងជើងដើម្បីបញ្ជៀសគ្រោះមហន្តរាយនៃទំនាក់ទំនងអន្តរកូរ៉េ ។ ការហុចដៃរបស់កូរ៉េខាងជើង គឺសំណើឲ្យមានការបើកកិច្ចប្រជុំការងារថ្នាក់យោធារវាងគ្នា។ ក្រសួងការពារកូរ៉េខាងត្បូងបានទាត់ចោលសំណើនេះ របស់កងទ័ពកូរ៉េខាងជើងដោយលើកយកហេតុផលទៅពន្យល់ថា ទីក្រុងព្យុងយ៉ាងមិនបានចែងឲ្យបានច្បាស់លាស់ពីប្រធានបទដែលត្រូវជជែក ពិសេសប្រធានបទទាក់ទងនឹងកម្មវិធីនុយក្លេអ៊ែររបស់ខ្លួនដែលបានទទួលការថ្កោលទោសយ៉ាងខ្លាំងក្លាពីសហគមន៍អន្តរជាតិ ។
អ្នកនាំពាក្យក្រសួងការពារជាតិកូរ៉េខាងត្បូងបាននិយាយប្រាប់អ្នកកាសែតថា សំណើសុំចរចាដែលមិននិយាយដល់ការរំសាយនុយក្លេអ៊ែរ ជាសំណើលេងសើចនិងគ្មានន័យ។ រូបអ្នកនាំពាក្យក្រសួងការពារជាតិកូរ៉េខាងត្បូងដដែលបានបន្ថែមថា រដ្ឋាភិបាលកូរ៉េខាងត្បូងនៅតែបន្តប្រកាន់ជំហរមិនផ្លាស់ប្តូរដែលថាគ្រប់វិធានការឆ្ពោះទៅរំសាយនុយក្លេអ៊ែរត្រូវតែជាអាទិភាពទី១ នៅគ្រប់កិច្ចចរចាជាមួយកូរ៉េខាងជើង។ តែបញ្ហានៅត្រង់ថា នាពេលកន្លងមកក្រុងព្យុងយ៉ាងធ្លាប់បានបញ្ជាក់ជាច្រើនដងថា នុយក្លេអ៊ែររបស់ខ្លួនជារឿងដែលមិនអាចចរចាបាន ។
សូមជម្រាបជូនថា ចម្លើយបដិសេធរបស់ក្រុងសេអ៊ូលលើសំណើសុំចរចាថ្នាក់យោធារបស់ក្រុងព្យុងយ៉ាងពេលនេះ បានធ្វើឡើងចំពេលដែលភាពតានតឹងរវាងបងប្អូនបង្កើតគូសត្រូវទាំងពីរបានកើនទ្វេដង ពិសេសក្រោយពីកូរ៉េខាងជើងបានសាកល្បងនុយក្លេអ៊ែរលើកទី៤ កាលពីថ្ងៃទី៦ ខែមករា និងការបាញ់គ្រាប់មីស៊ីលចម្ងាយឆ្ងាយក្នុងថ្ងៃទី៧ ខែកុម្ភៈ ៕
ប្រែសម្រួល៖ សាធី
