ភ្នំពេញ៖ បុរស២នាក់បានរងរបួសធ្ងន់ត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗបន្ទាប់ពីពួកគេបានជិះម៉ូតូ២គ្រឿងស្របទិសគ្នាហើយត្រូវរថយន្ត១គ្រឿងទៀតបើកបុកពេញទំហឹង។
ហេតុការណ៍នេះបានកើតឡើកកាលពីវេលាម៉ោង១០និង៣០នាទីយប់ថ្ងៃទី២៩ ខែឧសភា ឆ្នាំ២០១៦ នៅចំណុចខាលលិចប៉ុស្តិ៍ចោមចៅ តាមបណ្តោយផ្លូវជាតិលេខ៤ ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ។
តាមសាក្សីនៅកន្លែងកើតហេតុឲ្យដឹងថា មុនពេលកើតហេតុគេបានឃើញបុរស២នាក់ជិះម៉ូតូ២គ្រឿង ១គ្រឿងម៉ាកស្មាស់ ពណ៌ខ្មៅ ពាក់ស្លាកលេខកណ្តាល 1F-5901 ធ្វើដំណើរតាមបណ្តោយផ្លូវជាតិលេខ៤ ស្របគ្នាជាមួយម៉ូតូ១គ្រឿងទៀតម៉ាកគុបជ្រុង ពណ៌ខៀវ ពាក់ស្លាកលេខ ប 0545 ពភ១ ខណៈមកមកដល់ចំណុចកើតហេតុស្រាប់តែមានរថយន្តកាមរី១គ្រឿងមិនចាំស្លាកលេខ ធ្វើដំណើរស្របគ្នាមកពីក្រោយក្នុងល្បឿនលឿនបានជ្រុលបុកពេញទំហឹងបណ្តាលឲ្យអ្នកជិះម៉ូតូរងរបួសធ្ងន់ ចំណែករថយន្តបង្កបានបើកគេចខ្លួនបាត់ស្រមោល។
ក្រោយពេលកើតហេតុជនរងគ្រោះត្រូវបានរថយន្តសង្គ្រោះដឹកយកទៅមន្ទីរពេទ្យភ្លាមៗចំណែកម៉ូតូត្រូវបានសមត្ថកិច្ចធ្វើការវាស់វែងយករក្សាទុកនៅអធិការដ្ឋាននគរបាលខណ្ឌពោធិ៍សែនជ័យដើម្បីរងចាំដោះស្រាយពេលក្រោយ៕
ដោយ៖ សុខាសែនជ័យ
...
