ភ្នំពេញៈ សកម្មជនគណបក្សសង្គ្រោះជាតិ៣នាក់ ត្រូវបានសាលាដំបូងរាជធានីភ្នំពេញ កាលពីថ្ងៃទី៣១ ខែឧសភា ឆ្នាំ២០១៦ បានបើកសវនាការកាត់ទោស ពាក់ព័ន្ធករណីចូលរួមកុបកម្មបង្កអំពើហិង្សានៅទីលានប្រជាធិបតេយ្យ កាលពីពាក់កណ្ដាលឆ្នាំ២០១៤ កន្លងទៅ ។ ទោះបីយ៉ាងណា ក្រោយការសួរដេញដោល លោកចៅក្រម ម៉ុង មុនីសោភា បានលើកពេលប្រកាសសាលក្រមទៅថ្ងៃទី១៣ ខែមិថុនា ឆ្នាំ២០១៦ ខាងមុខនេះវិញ ។ លោកចៅក្រម ម៉ុង មុនីសោភា បានឲ្យដឹងថា ជនជាប់ចោទទាំង៣នាក់ឈ្មោះ រឿង ចិត្រា អាយុ ៣៣ឆ្នាំឈ្មោះ យន់ គឹនហួរ អាយុ ២៨ឆ្នាំ និងឈ្មោះ យា ថុង អាយុ៣៣ឆ្នាំ ត្រូវបានតុលាការចោទប្រកាន់ពីបទ ចូលរួមធ្វើកុបកម្មបទប្រឆាំងនឹងអ្នករាជការសាធារណៈ មានស្ថានទម្ងន់ទោស និងបទហិង្សាដោយចេតនា មានស្ថានទម្ងន់ទោស ប្រព្រឹត្តនៅចំណុចទីលានប្រជាធិបតេយ្យ សង្កាត់វត្តភ្នំខណ្ឌដូនពេញ រាជធានីភ្នំពេញ កាលពីព្រឹកថ្ងៃទី១៥ ខែកក្កដា ឆ្នាំ២០១៤កន្លងទៅ បទល្មើសដែលមានចែងឱ្យផ្តន្ទាទោសតាមមាត្រា៤៥៦ មាត្រ៤៥៧ និងមាត្រា២១៨នៃក្រមព្រហ្មទណ្ឌ៕
ដោយ សហការី
