ខេត្តកណ្តាល៖ ថ្នាំញៀនប្រភេទម៉ាទឹកកកជិត១០០កញ្ចប់តូច រួមជាមួយម៉ូតូ៣គ្រឿង  ដាវសាមូរ៉ៃ៤ដើម និងទូរស័ព្ឌចំនួន៣គ្រឿងត្រូវបានកម្លាំងនគរបាលប៉ុស្តិ៍បន្ទាយដែក សហការជាកម្លាំងនគរបាលព្រហ្មទណ្ឌស្រុក រឹបអូសបានពីក្រុមមុខសញ្ញាចែកចាយនិងប្រើប្រាស់ថ្នាំញៀន ក្នុងនោះជនសង្ស័យម្នាកត្រូវបានឃាត់ខ្លួនបន្ទាប់ពីទំនាក់ទំនងតាមទូរស័ព្ឌទិញថ្នាំញៀន ហើយត្រូវសមត្ថកិច្ចបន្លំជាអ្នកលក់ទើបឈានដល់ការចាប់ខ្លួនដោយឡែក៥នាក់ទៀតរត់គេចខ្លួនបាត់បន្សល់ទុកថ្នាំញៀននិងមធ្យោបាយធ្វើដំណើរនៅក្នុងផ្ទះដែលក្រុមជនសង្ស័យណាត់ជួបគ្នាដើម្បីចែកចាយនិងប្រើប្រាស់ថ្នាំញៀន ។

ករណីបង្ក្រាបមុខសញ្ញាចាប់បានតែវត្ថុតាងថ្នាំញៀនជាច្រើនកញ្ចប់នេះបានធ្វើឡើងនៅវេលាម៉ោង៤និង៣០នាទីរសៀលថ្ងៃទី០១ ខែមិថុនា ឆ្នាំ២០១៦ នៅក្នុងផ្ទះឈើមួយកន្លែងស្ថិតក្នុងភូមិកណ្តាល  ឃុំបន្ទាយដែក ស្រុកកៀនស្វាយ ខេត្តកណ្តាល ចាប់យកបានម៉ូតូ៣គ្រឿងមានម៉ាក ណាយហត ១គ្រឿង, សេ១២៥ ២គ្រឿង, ថ្នាំញៀន ៨៩កញ្ចប់តូច, ទូរស័ព្ទដៃ ៣គ្រឿង, ដាវសាមូរ៉ៃ៤ដើម (វែង២ដើម ខ្លី២ដើម) និងសម្ភារៈសម្រាប់សេពគ្រឿងញៀន ជាច្រើនទៀត ។

លោក ព្រើម  ប៊ុនធឿន នាយប៉ុស្តិ៍នគរបាលបន្ទាយដែកបានឲ្យដឹងថា ជារៀងរាល់ថ្ងៃកម្លាំងនគរបាលប៉ុស្តិ៍បានដាក់វេនគ្នាចុះល្បាតនៅក្នុងមូលដ្ឋានដើម្បីការពាសន្តិសុខជូនប្រជាពលរដ្ឋនៅពេលដែលលោកដឹកនាំកម្លាំចុះល្បាតទៅដល់ទីតាំងផ្ទះឈើមួយកន្លែងគ្មានមនុស្សនៅស្រាប់តែឃើញមានម៉ូតូចតនៅក្រោមផ្ទះចំណែកទ្វាផ្ទះបិទជិត ។  ដោយមានការសង្ស័យលោកក៍បានជិះម៉ូតូចូលទៅក្នុងផ្ទះនោះស្រាប់តែក្រុមជនសង្ស័យចំនួន៥នាក់បាននាំគ្នារត់ចេញតាមទ្វាក្រោយនិងតាមបង្អួចគេចខ្លួនអស់បន្សល់ទុកម៉ូតូ២គ្រឿងនៅក្រោមផ្ទះ ។ បន្ទាប់មកលោកអធិការបានបញ្ជាឲ្យកម្លាំងនគរបាលព្រហ្មទណ្ឌស្រុកចុះមកជួយអន្តរាគមន៍ដើម្បីឆែកឆេរផ្ទះដែលគេទុកចោលរកឃើញថ្នាំញៀន៨៩កញ្ចប់តូច ដែលជនសង្ស័យលាក់ទុកក្នុងកាបូបស្ពាយ និងរកឃើញដាវសាមូរ៉ៃចំនួន៤ដើម ដែលជាអាវុធរបស់ក្រុមជនសង្ស័យទុកធ្វើសកម្មភាពនិងទូរស័ព្ទ៣គ្រឿង  ដោយឡែកក្រុមជនសង្ស័យបានរត់គេចខ្លួនអស់ ។

បន្ទាប់ពីចាប់យកបានវត្ថុតាងរួមមានម៉ូតូ  ថ្នាំញៀន និងទូរស័ព្ទរួចមក ស្រាប់តែមានបុរសម្នាក់បានទំនាក់ទំនងចូលទៅទូរស័ព្ទរបស់ជនសង្ស័យ គ្រានោះសមត្ថកិច្ចលើកទទួលជំនួសដោយប្រើប្រាស់តាមជំនាញហើយក៏ណាត់ជួប  មួយសន្ទុះក្រោយមកបុរសរូបនោះបានមកដល់គោលដៅណាត់ជួបក៍ត្រូវបានសមត្ថកិច្ចចាប់ខ្លួនតែម្តងរួមជាមួយម៉ូតូ១គ្រឿងទៀត ម៉ាកហុងដាសេ១២៥ ពណ៌ខ្មៅ តែពុំមានវត្ថុតាងថ្នាំញៀននៅជាប់និងខ្លួននោះទេគឺគេប្រើឲ្យមកទទួលយកទៅឲ្យអ្នកផ្សេង ។

ពាក់ព័ន្ធករណីនេះដែរលោកវរៈសេនីយ៍ឯក ប៉ា  សំអិត  អធិការនគរបាលស្រុកកៀនស្វាយបានឲ្យដឹងថា ជាការសោកស្តាយណាស់ដែលកម្លាំងរបស់លោកចាប់ជនសង្ស័យមិនបានដោយសារតែពេលចុះល្បាតក្នុងមូលដ្ឋានមានកម្លាំងតែ២នាក់ប៉ុណ្ណោះ  ពេលជួបក្រុមជនសង្ស័យកុំពុងប្រមូលផ្តុំគ្នាសេពគ្រឿងញៀន កម្លាំងសមត្ថកិច្ចក៏បានចូលទៅត្រួតពិនិត្យធ្វើឲ្យក្រុមជនសង្ស័យដឹងខ្លួនទាន់រត់គេចខ្លួនអស់  បន្សល់ទុកតែថ្នាំញៀនជាច្រើនកញ្ចប់នៅក្នុងកាបូបស្ពាយ  ម៉ូតូ២គ្រឿង  ដាវ៤ដើម និងសម្ភារៈមួយចំនួនទៀត ។  ដោយឡែកបុរសម្នាក់ដែលសមត្ថកិច្ចឃាត់ខ្លួនក្នុងរង្វង់ប្រតិបត្តិការរួមជាមួយម៉ូតូ១គ្រឿង  ពេលនេះសមត្ថកិច្ចឲ្យត្រឡប់ទៅផ្ទះវិញ ហើយដោយសារគ្មានវត្ថុតាងដាក់បន្ទុកក្នុងនោះសមត្ថកិច្ចជំនាញបានធ្វើកោសល្យវិច័យទឹកនោមគ្មានសារធាតុញៀននោះឡើយ  បន្ទាប់ពីធ្វើការសាកសួរលំអិតទើបដឹងថាបុរសម្នាក់នេះត្រូវគេប្រើឲ្យឌុបជនសង្ស័យ ចំពោះម៉ូតូមិនទាន់ឲ្យយកត្រឡប់ទៅវិញនោះទេសមត្ថកិច្ចកំពុងតែស្រាវជ្រារកឯកសាពាក់ព័ន្ធ ។ ដោយឡែកជនសង្ស័យទាំង៥នាក់ដែលរត់គេចខ្លួនកម្លាំងជំនាញនិងបើកការស្រាវជ្រាវរកអត្តសញ្ញាណនៅពេលខាងមុខ  បន្ទាប់សមត្ថកិច្ចកសាងសំណុំរឿងករណីចាប់បានវត្ថតាងថ្នាំញៀនចំនួន៨៩កញ្ចប់រួមជាមួយម៉ូតូ៣គ្រឿងដើម្បីបញ្ជូនទៅតុលាការ ៕

ដោយ៖ សណ្តោស