ភ្នំពេញ៖លោក ឡេង វាសនា នាយករងផ្នែកនគរបាលព្រហ្មទណ្ឌខណ្ឌពោធិសែនជ័យ នារសៀលថ្ងៃទី២៧ ខែកក្កដា ឆ្នាំ២០១៥នេះប្រាប់ឲ្យដឹងថា សពនារីរងគ្រោះម្នាក់ ដែលត្រូវជនមិនស្គាល់មុខ សម្លាប់រួចបោះសពចោលក្បែររបងវត្តអង្គតាមិញ រហូតមកដល់ពេលនេះត្រូវបានស្គាល់អត្តសញ្ញាណស្រ្តីរងគ្រោះហើយ គឺឈ្មោះ វង្ស គន្ធា អាយុ២៦ឆ្នាំ មុខរបរបំរើការងារនៅក្នុងហាងផឹកស៊ីមួយកន្លែង ស្ថិតក្នុងភូមិព្រៃទា សង្កាត់ចោមចៅ ខណ្ឌពោធិសែនជ័យ ស្នាក់នៅផ្ទះជួលភូមិតាងួន សង្កាត់កាកាប ខណ្ឌពោធិសែនជ័យ និងមានស្រុកកំណើតនៅខេត្តបាត់ដំបង ។ សពត្រូវបានក្រុមគ្រួសារតម្កល់ធ្វើបុណ្យតាមប្រពៃណីនៅ ក្នុងវត្តអង្គតាមិញតែម្តង។
សូមបញ្ជាក់ថា កាលពីវេលាម៉ោង៧ និង៣០នាទី ព្រឹកថ្ងៃទី២៦ ខែកក្កដា ឆ្នាំ២០១៥ មានការភ្ញាក់ផ្អើលមួយបានកើតឡើង ខណះកម្មករសំណង់ម្នាក់ប្រទះឃើញសពស្ត្រីម្នាក់ដែលគេសម្លាប់ ហើយយកមកផ្លុងចោលនៅក្នុងដីឡូមួយកន្លែងជាប់របងវត្តអង្គតាមិញ ខាងលិច ស្ថិតក្នុងភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
