ភ្នំពេញ ៈ កម្លាំងកងរាជអាវុធហត្ថខណ្ឌដូនពេញ ឃាត់ខ្លួនបុរសម្នាក់នៅក្នុងចំណតឡានផ្សារសុរិយាម៉ល ពីបទចែកចាយគ្រឿងញៀន កាលពីវេលាម៉ោង០១និង០៥នាទីរសៀលថ្ងៃទី០៧ខែមិថុនាឆ្នាំ២០១៦ ក្នុងសង្កាត់ផ្សារថ្មី៣ ខណ្ឌដូនពេញ ។
មន្រ្តីកងរាជអាវុធហត្ថខណ្ឌដូនពេញ បានឲ្យដឹងថា ជនសង្ស័យឈ្មោះ ជួន រដ្ឋា ភេទប្រុស អាយុ៣៦ឆ្នាំ មុខរបរមិនពិតប្រាកដ ស្នាក់នៅផ្ទះលេខ៤២ ផ្លូវ៣៣៤ សង្កាត់បឹងកេងកង១ ខណ្ឌចំការមន រាជធានីភ្នំពេញ ។ ចំណែកឯវត្ថុតាងចាប់យកពីជនសង្ស័យមានៈ -ក្រាមសថ្លាចំនួន០៦កញ្ចប់ ទូរស័ព្ទ០២គ្រឿង ម៉ូតូ០១គ្រឿងម៉ាក មីនីស្កុបពី គ្មានស្លាកលេខ ។
មន្រ្តីកងរាជអាវុធហត្ថដដែល បានបន្តទៀតថា នៅមុនពេលឃាត់ខ្លួនជនសង្ស័យ គឺកម្លាំងបានជិះម៉ូតូល្បាតក្នុងមូលដ្ឋាន លុះជិះមកដល់ចំណតឡានផ្សារសុរិយាម៉ល ស្រាប់តែប្រទះឃើញជនសង្ស័យកំពុងតែឈរ ដោយមានការសង្ស័យក៏ឃាត់ខ្លួនសួរនាំនិងឆែកឆេរ រកឃើញថ្នាំញៀនប្រភេទម្សៅក្រាមសថ្លាចំនួន០៦កញ្ចប់ ។
បច្ចុប្បន្នជនសង្ស័យនិងវត្ថុតាងត្រូវបានបញ្ជូនទៅបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីសាកសួរនិងកសាងសំណុំរឿងចាត់ការតាមច្បាប់ ៕
ដោយៈ ស ដារ៉ា
