ភ្នំពេញ ៖ មនុស្ស៤នាក់របួសស្រាលធ្ងន់នៅលើស្ពានអាកាសស្ទឹងមានជ័យ ខណៈពេលមានគ្រោះថ្នាក់ចរាចរមួយដោយសារម៉ូតូ៣គ្រឿងបុកបន្តកន្ទុយកាលពីវេលាម៉ោង៣ទៀបភ្លឺថ្ងៃទី៩ ខែមិថុនា ឆ្នាំ២០១៦ នៅចំណុចលើស្ពានអាកាសស្ទឹងមានជ័យ តាមបណ្ដោយផ្លូវលេខ២៧១ ក្នុងសង្កាត់ទំនប់ទឹក ខណ្ឌចំការមន រាជធានីភ្នំពេញ។
បើតាមប្រភពព័ត៌មានពីកន្លែងកើតហេតុបានប្រាប់ឲ្យដឹងថា មុនពេលកើតហេតុគេបានឃើញបុរស៤នាក់ដែលជាមិត្តភក្កិនឹងគ្នាបានជិះម៉ូតូដេញគ្នានៅតាមផ្លូវហើយម៉ូតូទាំង៣គ្រឿងនោះទី១ ម៉ាក FZ ពណ៌ខ្មៅ ពាក់ស្លាកលេខ ភ្នំពេញ 1CB-6534 ជិះគ្នា២នាក់, ទី២ ម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ 1CT-7834 ជិះម្នាក់ឯង, ទី៣ ម៉ាកវីវ៉ា ពណ៌ខ្មៅ ពាក់ស្លាកលេខ ភ្នំពេញ 1AB-7912 ជិះម្នាក់ឯង បានធ្វើដំណើរតាមផ្លូវ២៧១ស្របទិសគ្នាពីត្បូងទៅជើងក្នុងល្បឿនយ៉ាងលឿនស្រាប់តែមកដល់ចំណុចកើតហេតុ ម៉ូតូហុងដាឌ្រីមបានជ្រុលចង្កូតមកបុកម៉ូតូម៉ាក FZ ពីក្រោយពេញទំហឹង ខណៈពេលនោះស្រាប់តែម៉ូតូម៉ាកវីវ៉ា ដែលបើកតាមពីក្រោយចាប់ហ្វ្រាំងមិនទាន់ក៏ជ្រុលទៅបុកម៉ូតូហុងដាឌ្រីមពីក្រោយបន្ថែមទៀត បណ្ដោយឲ្យមនុស្ស៤នាក់របួសស្រាលធ្ងន់។ ភ្លាមៗនោះសមត្ថកិច្ចមូលដ្ឋានបានចុះទៅដល់កន្លែងកើតហេតុ បានហៅរថយន្តសង្គ្រោះបន្ទាន់ដឹកជនរងគ្រោះ២នាក់ដែលរងរបួសធ្ងន់ទៅសង្គ្រោះនៅគ្លីនិកឯកជន ។
ក្រោយពេលកើតហេតុម៉ូតូជនរងគ្រោះទាំងអស់ត្រូវសមត្ថកិច្ចប្រគល់ឲ្យអ្នករងបួសស្រាលយកទៅរក្សាទុកវិញ៕
ដោយ៖ សរស្មី
...
