ខេត្ដក្រចេះ៖ ប្រជាពលរដ្ឋដែលបានទៅដល់ និងឈរមើលការជល់មាន់,និងល្បែងអាប៉ោង នៅខាងក្រោយទីតាំងក្នុងកាស៊ីណូ(ហ្គោលស៊ីធី) ដែលមានមនុស្សរាប់រយនាក់ កំពុងចាក់លុយភ្នាល់គ្នាក្នុង១គូៗរាប់ពាន់ដុល្លារ បាននិយាយដោយសម្ដែងការព្រួយបារម្ភអំពីបញ្ហាសន្តិសុខនៅក្នុងមូលដ្ឋាន ដែលពួកគេរស់នៅ ព្រមទាំងគ្រួសារក្រីក្រខ្លះអាចក្លាយទៅជាអ្នកវ័ណ្ឌកដោយសារតែជំពាក់បំណុល ព្រោះតែចាញ់និងល្បែងទាំងនេះ។
ការព្រួយបារម្មរបស់ប្រជាពលរដ្ឋ បន្ទាប់ពីគេមើលឃើញថា ពេលបច្ចុប្បន្ននៅកាស៊ីណូ(ហ្គោលស៊ីធី) ដែលមានទីតាំងនៅច្រកទ្វារអន្តរជាតិ(កម្ពុជា,វៀតណាម)ត្រពាំងស្រែ ក្នុងឃុំ២ធ្នូរ ស្រុកស្នួល ខេត្តក្រចេះ បានបើកសង្វៀនជល់មាន់,និងបាញ់អាប៉ោង ជារៀងរាល់ថ្ងៃ និងបានឱ្យប្រជាពលរដ្ឋខ្មែរចូលលេងដោយសេរី។ ហើយប្រជាពលរដ្ឋបានស្នើរឱ្យអាជ្ញាធរស្រុក ក៏ដូចជាអាជ្ញាធរខេត្ត គួរអនុវត្តគោលនយោបាយទាំង១០ចំនុចដែលក្រសួងមហាផ្ទៃបានដាក់ឱ្យអនុវត្តជាច្រើនឆ្នាំមកហើយ ដើម្បីធានាបាននូវភូមិឃុំមានសុវត្ថិភាព។
បុរសម្នាក់រស់នៅក្នុងស្រុកស្នួល ខេត្តក្រចេះ វ័យជាង៣០ឆ្នាំ ដោយលោកថ្លែងសុំមិនបញ្ចេញឈ្មោះ បានឱ្យដឹងថា (បើតាមខ្ញុំដឹងច្បាប់ស្តីពីកាស៊ីណូគឺបើកបម្រើសេវាសម្រាប់តែជនបរទេសប៉ុណ្ណោះ ដោយមិនអនុញ្ញាតឱ្យជនជាតិខ្មែរចូលលេងឡើយ ដូច្នេះការអនុញ្ញាត ឱ្យពលរដ្ឋខ្មែរចូលលេងគឺជារឿងខុសច្បាប់)។ ហើយបនល្បែងនៅខាងក្រោយកាស៊ីណូ(ហ្គោលស៊ីធី) គឺមានជនជាតិ ខ្មែរប្រមាណ៧០ភាគរយចូលទៅលេង ក្នុងនោះក៏មានសមត្ថកិច្ចមួយចំនួនផងដែរ ចំណែក៣០ភាគរយទៀតជាជនជាតិវៀតណាម។
លោកបានបញ្ជាក់ថា កាស៊ីណូ(ហ្គោលស៊ីធី)មួយនេះ គឺគេបើកជល់មាន់និងបាញ់អាប៉ោង ក្នុង១សបា្ដហ៍ ៦ថ្ងៃ គឺលើកលេងតែថ្ងៃសៅរ៍ តែប៉ុណ្ណោះដែលគេមិនលេង ហើយការភ្នាល់គ្នានោះវិញ គឺ១គូៗ ដាក់លុយរហូតដល់រាប់ពាន់ ឬ រាប់ម៉ឺនដុល្លារក៏មាន ។ប្រភពបានបន្តថា នេះសង្វៀនបញ្ជល់មាន់ វាស្ថិតនៅក្នុងបរិវេណកាស៊ីណូ តែបើបញ្ជល់លួចលាក់នៅតាមបណ្តាលស្រុក ឬក្នុងព្រៃតាមភូមិវិញនោះ គឺសមត្ថកិច្ចតែងតែចុះទៅពទ្ធ័ចាប់ ធ្វើឱ្យអ្នកញៀននិងល្បែងទាំងនោះរត់បាទជើងសព្រាត។
សេចក្តីរាយការបានឱ្យដឹងថា សង្វៀនជល់មាន់ និងបាញ់អាប៉ោង នៅខាងក្រោយទីតាំងកាស៊ីណូ(ហ្គោលស៊ីធី)មួយនេះ គឺថៅកែកាស៊ីណូ បានជួលទៅឱ្យ មនុស្ស២នាក់ ដោយម្នាក់ជាមន្ត្រីអាវុធហត្ថជាន់ខ្ពស់ នៅខេត្តក្រចេះ និងម្នាក់ទៀតជាមន្ត្រីនគរបាលនៅក្នុងស្នងការរដ្ឋាននគរបាលខេត្តក្រចេះ ដោយក្នុង១ខែ (២ពាន់៥រយដុល្លារ) សំរាប់បើកជល់មាន់និងបាញ់អាប៉ោង ដោយជ្រកក្រោមស្លាកកាស៊ីណូនេះ។
ពាក់ពន្ធនិងករណីខាងលើនេះ អភិបាលស្រុក និងជាប្រធានគណៈបញ្ជាការឯកភាពស្រុកស្នួល លោក គង់ គឹមនី បានឱ្យដឹងថា លោកមិនទាន់បានទទួលព័ត៍មាននេះនោះឡើយទេ ណាមួយពេលនេះលោកកំពង់ប្រជុំ ។
លោកបញ្ជាក់ថា ពេលលោកត្រឡប់មកពីប្រជុំវិញ លោកនិងចុះទៅពិនិត្យនៅកាស៊ីណូនោះហើយ ថាវាយ៉ាងម៉ិច ណាមួយកាស៊ីណូគឺមិនអនុញ្ញាត្តិឱ្យពលរដ្ឋខ្មែរចូលលេងនោះទេ៕ កោះទ្រុង
