ភ្នំពេញ ៖ នាយឧត្តមសេនីយ៍ ប៉ោ ភក្តិ អគ្គលេខាធិការ នៃអគ្គលេខាធិការដ្ឋាន ក្រសួងមហាផ្ទៃ បានឱ្យដឹងថា ក្នុងឆ្នាំ២០២២ ក្រសួងមហាផ្អៃ បានផ្តល់អត្តសញ្ញាណប័ណ្ណសញ្ជាតិខ្មែរជូនប្រជាពលរដ្ឋអាយុចាប់ពី ១៥ឆ្នាំឡើងបានចំនួន ៦៥២.៨៤៣នាក់។ នាយឧត្តមសេនីយ៍ បានបញ្ជាក់បែបនេះក្នុងឱកាសអញ្ជើញធ្វើសេចក្តីរាយការណ៍ក្នុង វិធីបើកសន្និបាតត្រួតពិនិត្យលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងមហាផ្ទៃ និងលទ្ធផលការងារប្រឡងប្រណាំងអនុវត្តគោលនយោបាយ “ភូមិ-ឃុំ-សង្កាត់ មានសុវត្ថិភាព” នាព្រឹកថ្ងៃពុធទី២២ ខែកុម្ភៈ ឆ្នាំ២០២២ នៅសណ្ឋាគាររ៉េស៊ីដង់សុខាភ្នំពេញ។
ក្នុងឱកាសនោះ នាយឧត្តមសេនីយ៍ ប៉ោ ភក្តិ បានឱ្យដឹងបន្ថែមទៀតថា គិតត្រឹមខែធ្នូ ឆ្នាំ២០២២ ការផ្តល់អត្តសញ្ញាណប័ណ្ណសញ្ជាតិខ្មែរទុតិយតាសម្រេចបានចំនួន ៤៤៩.៣៩០នាក់ នៅសល់ ១.២៧៧.៧០៤នាក់ ដែលត្រូវបន្តផ្ដល់ជូនដល់ប្រជាពលរដ្ឋ ។ទន្ទឹមនឹងនេះ ក្រសួងមហាផ្ទៃ បានផ្តល់លិខិតឆ្លងដែនជូនប្រជាពលរដ្ឋបាន ២១២.៨៣៥ក្បាលនិងផ្តល់លិខិតធ្វើដំណើរដល់ពលករកម្ពុជាធ្វើការនៅបរទេសបាន ៩២.០០៣៩ក្បាល។
ជាមួយគ្នានេះដែរ នាយឧត្តមសេនីយ៍ ប៉ោ ភក្តិ មានប្រសាសន៍លើកឡើងនូវទិសដៅការងារសម្រាប់ឆ្នាំ២០២៣ ដោយក្រសួងមហាផ្ទៃនឹងបន្ដខិតខំជំរុញបញ្ចប់ការរៀបចំលិខិតបទដ្ឋានគតិយុត្តថ្មីៗពិសេសសេចក្តីព្រាងច្បាប់ស្តីពី អត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ព្រមទាំងពិនិត្យឡើងវិញនូវច្បាប់ និងលិខិតបទដ្ឋានគតិយុត្តនានាដែលពាក់ព័ន្ធការងារអត្តសញ្ញាណកម្ម ដើម្បីធ្វើវិសោធនកម្មឱ្យស្របតាមទស្សនាទាននានាដែលមានកំណត់ក្នុងផែនការយុទ្ធសាស្ត្រជាតិស្តីពីអត្តសញ្ញាណកម្ម (២០១៧-២០២៦)។
ទន្ទឹមនឹងនេះក្រសួងមហាផ្ទៃ នឹងបន្តជំរុញអភិវឌ្ឍសមត្ថភាពមន្ត្រីជំនាញទាំងនៅថ្នាក់ជាតិ និងថ្នាក់ក្រោមជាតិ សំដៅពង្រឹងសមត្ថភាព និង ការយល់ដឹងពីគោលការណ៍ និងលិខិតបទដ្ឋាននានាពាក់ព័ន្ធការងារអត្តសញ្ញាណកម្ម ព្រមទាំងបន្តតាមដាន ត្រួតពិនិត្យ និងជំរុញការងារផ្តល់អត្តសញ្ញាណប័ណ្ណសញ្ជាតិខ្មែរនៅតាមបណ្តារាជធានី ខេត្ត ជាពិសេសការផ្តល់អត្តសញ្ញាណប័ណ្ណដែលត្រូវផុតសុពលភាព ដើម្បីបំពេញសិទ្ធិដល់ប្រជាពលរដ្ឋក្នុងការចូលរួមបោះឆ្នោតជ្រើសតាំងតំណាងរាស្ត្រសម្រាប់នីតិកាលទី៧ នៃរដ្ឋសភា៕
ដោយ៖ សហការី
