ខេត្តកំពង់ធំ៖ ឃាតករសម្លាប់ប្រពន្ធដោយសារតែភ្លើងប្រច័ណ្ឌ និងស្រាចូលខ្លួននោះត្រូវសមត្ថកិច្ចចាប់វាយខ្នោះកសាងសំនុំរឿងតាមនិតិវិធី។លោកវរៈសេនីយ៏ឯក កែ ខាន់ណារ៉ា ស្នងការរងទទួលបន្ទុកការិយាល័យព្រហ្មទ័ណ្ឌនិងយុត្តិធម៌ បានឲ្យដឹងថា ជុំវិញករណីអំពើហឹង្សាក្នុងគ្រួសារខាងលើនេះបានកើតឡើងកាលពីវេលាម៉ោង៦:១០នាទីព្រឹក ថ្ងៃទី ២៩ ខែកក្កដាឆ្នាំ២០១៥ នៅលើផ្ទះរបស់ពួកគេស្ថិតនៅក្នុង ភូមិស្រែរំចង់ ឃុំសណ្តាន់ ស្រុកសណ្តាន់ ខេត្តកំពង់ធំ។
បើយោងតាមប្រភពព័ត៌មានពីកន្លែងកើតហេតុបានឲ្យដឹងថា នៅក្នុងគ្រួសារមានកូនប្រុសស្រីចំនួន២នាក់កូនស្រីបងអាយុប្រហែង៨ឆ្នាំ កូនប្រុសអាយុ៦ឆ្នាំ រស់នៅពុំសូវមានសេចក្តីសុខក្នុងគ្រួសារនោះទេ ដោយសារតែបុរសជាប្តីឈ្មោះ វង គៀង អាយុ៤៤ឆ្នាំ ជាមនុស្សញៀនស្រា និងមានការប្រចាន់ប្រពន្ធ ឈ្មោះអ៊ុង ឡន អាយុ៣៨ឆ្នាំ។
លុះនៅព្រឹកថ្ងៃកើតហេតុ ក៏មានរឿងជាថ្មីម្តងទៀត ដោយការជេរបញ្ចោរគ្នាទៅវិញទៅមកយ៉ាងខ្លាំង គឺពាក់មុខយក្សដាក់គ្នា ចង់យកឈ្នះយកចាញ់រឿងៗខ្លួន ធ្វើឲ្យបុរសជាប្តី ដែលជាជនសង្ស័យស្ទុះទាញបានកាំបិតកកុកដងវែងកាប់ទៅលើប្រពន្ធឈ្មោះ អ៊ុង ឡន ចំនួន៤កាំបិត ចំកញ្ចឹងករ១កាំបិត ក្បាល១កាំបិត និងដៃស្តាំ២កាំបិត បណ្តាលឲ្យប្រកាច់ដាច់ខ្យល់ស្លាប់នៅលើផ្ទះរបស់ខ្លួន ចំណែកបុរសជាប្តីក៏ពុំបានរត់គេចខ្លួននោះដែរ ក្រោយពេលកើតហេតុសមត្ថកិច្ចក៏បានធ្វើការឃាត់ខ្លួនជនសង្ស័យមកកាន់អធិការដ្ឋាន នគរបាលស្រុកសណ្តាន់ ដើម្បីចងក្រងសំនុំរឿងបញ្ជូនជនសង្ស័យមកកាន់តុលាការដើម្បីចាត់ការតាមផ្លូវច្បាប់៕
