ខេត្តពោធិ៍សាត់៖ បុរសម្នាក់បានរងរបួសយ៉ាងធ្ងន់ធ្ងរដោយសាររថយន្តបុកពេញទំហឹង ខណៈបុរសរូបនេះជិះម៉ូតូឆ្លង

ផ្លូវក្នុងទិសដៅពីជើងទៅត្បូង។

ហេតុការណ៍នេះបានកើតឡើងកាលពីវេលាម៉ោង១១និង០៣នាទីព្រឹកថ្ងៃទី២៦ ខែមិថុនា ឆ្នាំ២០១៦ នៅលើកំណាត់ផ្លូវជាតិលេខ៥ត្រង់ចំណុចមុខក្លោងទ្វារចូលវត្តភ្លៅមាន ស្ថិតក្នុងភូមិអណ្ដូងក្រសាំង ឃុំស្នាមព្រះ ស្រុកបាកាន ខេត្តពោធិ៍សាត់។

លោកអធិការនគរបាលស្រុកបានឲ្យដឹងថា បុរសរងរបួសធ្ងន់ត្រូវបានគេស្គាល់ឈ្មោះ វុធ អាយុ២៣ឆ្នាំ រស់នៅភូមិក្រូចសើច ឃុំខ្នារទទឹង ស្រុកបាកាន ខេត្តពោធិ៍សាត់។ បុរសរូបនេះធ្វើដំណើរដោយម៉ូតូ១គ្រឿងម៉ាកហុងដាឌ្រីមសេ១២៥ ពណ៏ខ្មៅ ពាក់ស្លាកលេខ ពោធិសាត់ 1D 2841 ធ្វើដំណើរក្នុងទិសដៅពីជើងទៅត្បូង(ឆ្លងផ្លូវជាតិលេខ៥) លុះមកដល់ចំណុចខាងលើស្រាប់តែមានរថយន្ត១គ្រឿងកំពុងបោះពួយយ៉ាងលឿនបានបុកពេញទំហឹង បណ្ដាលឲ្យភាគីខាងម៉ូតូសន្លប់ស្ដូកស្ដឹងតែម្តង។

លោកអធិការបន្តថាៈ​ រថយន្តនោះម៉ាកហុីយ៉ាន់ដាយ ពណ៏ស ពាក់ស្លាកលេខ ភ្នំពេញ 2T 4217 ធ្វើដំណើរតាមបណ្ដោយផ្លូវជាតិលេខ៥ ក្នុងទិសដៅពីលិចទៅកើត(អ្នកបើកបររត់គេចខ្លួន)។ លោកបន្តទៀតថាជនរងរបួសបានបញ្ជូនទៅសង្រ្គោះនៅមន្ទីរពេទ្យបង្អែកស្រុកបាកាន ដោយឡែកវត្ថុតាងម៉ូតូនិងរថយន្តបានប្រគល់ឲ្យនគរបាលជំនាញខេត្តដើម្បីបន្តតាមនីតិវិធី៕​

ដោយ៖បឹិុម ពិន