ខេត្តស្វាយរៀង៖ ក្មេងប្រុសម្នាក់បានស្លាប់បន្ទាប់ពីក្រុមគ្រួសារបញ្ជូនមកដល់មន្ទីរបង្អែកស្រុករមាសហែកខណៈដែលមានរថយន្ត HYUNDAI មួយគ្រឿងដឹកគ្រឿងសំណង់បើកថយក្រោយខ្វះការប្រុងប្រយ័ត្នក៏បុកនិងជើងតាងបណ្ដាលឲ្យរលំសង្កត់លើក្មេងប្រុសនោះតែម្ដង។

ហេតុការណ៍នេះកើតឡើងកាលពីវេលាម៉ោង២និង៤៦នាទីរសៀលថ្ងៃទី២៨ ខែមិថុនា ឆ្នាំ២០១៦ ស្ថិតនៅភូមិមុន្នីព្រឹក្សា ឃុំត្រស់ ស្រុករមាសហែក ខេត្តស្វាយរៀង។

តាមនគរបាលស្រុករមាសហែកបានឲ្យដឹងថា ក្មេងប្រុសដែលស្លាប់មានឈ្មោះ យឿន​  សំណាង អាយុមួយខួបកន្លះ​មានទីលំនៅភូមិឃុំកើតហេតុខាងលើ​ ផ្ទះកំពុងជុសជុលមានឪពុកឈ្មោះ ប៊ិន​ ភារម្យ អាយុ៣១ឆ្នាំ មុខរបរកសិករ។

ចំពោះអ្នកបើករថយន្តបង្កហេតុត្រូវបានស្គាល់ឈ្មោះ ហាយ​ ស៊ាន ភេទប្រុស អាយុ៣៩ឆ្នាំ មុខរបរលក់គ្រឿងសំណង់ មានទីលំនៅភូមិវត្ត ឃុំត្រស់ ស្រុករមាសហែក ដោយឃើញសភាពការណ៍មិនស្រួលបានរត់គេចខ្លួនភ្លាមៗបន្សល់តែរថយន្តម៉ាក HYUNDAI ពណ៌ក្រហម ម៉ាកកូរ៉េមួយតោនកន្លះ ពាក់​ស្លាកលេខ ភ្នំពេញ 2AT-4548 ។

ប្រភពពីកន្លែងកើតហេតុឲ្យដឹងថា មុនពេលកើតហេតុគេឃើញរថយន្តដឹកគ្រឿងសំណង់បានមកឈប់មុខផ្ទះដែលកំពុងតែសាងសង់ ហើយក៏បានបើកថយក្រោយដើម្បីទំលាក់ដែក ប៉ុន្តែចៃដន្យខណៈបើកដាក់លេខថយក្រោយពីលិចទៅកើតខ្វះការប្រុងប្រយត្ន័មិនមើលឆ្វេងស្ដាំក៏បុកនិងជើងតាងធ្វើផ្ទះយ៉ាងពេញទំហឹងបណ្ដាលឲ្យបាក់សង្កត់ទៅលើក្មេងប្រុសដែលកំពុងឈរមើលរងរបួសធ្ងន់ ហើយត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យបង្អែកស្រុករមាសហែក ប៉ុន្តែអកុសល្យរបួសធ្ងន់ធ្ងរពេកក៏ដាច់ខ្យល់ស្លាប់គួរឲ្យសង្វេក។

ចំណែកម្ចាស់រថយន្តបង្កហេតុបានរត់គេចខ្លួនភ្លាមៗខណៈដែលសមត្ថកិច្ចមូលដ្ឋានបានអូសយករថយន្តមកកាន់អធិការដ្ឋាននគរបាលស្រុករមាសហែកចាត់ការបន្តតាមនីតិវិធី ហើយសពត្រូវបាននគរបាលប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណីទាំងក្ដុកក្ដួលបំផុត៕

ដោយ៖ យឹម សុថាន