ខេត្តកណ្តាល៖ បុរសម្នាក់មានសភាពស្រវឹងស្រាស្រែកឡូឡាបង្កជម្លោះឈានដល់ទាញកាំបិតកាប់ជនរងគ្រោះ បណ្តាលឲ្យរងរបួសយ៉ាងធ្ងន់ រហូតបាត់បង់ជីវិតពេលបញ្ជូនទៅសង្រ្គោះនៅមន្ទីរពេទ្យកាលម៉ែត្រក្នុងរាជធានីភ្នំពេញ បន្ទាប់ពីធ្វើសកម្មភាពរួចជនល្មើសបានរត់គេចខ្លួនចេញពីលំនៅដ្ឋានបាត់ទៅ ។
ករណីនេះបានកើតឡើង កាលពីវេលាម៉ោង២១ និង២៥នាទី ថ្ងៃទី៣០ ខែមិថុនា ឆ្នាំ២០១៦ ត្រង់ចំណុចក្រោមផ្ទះជនរងគ្រោះ ស្ថិតក្នុងភូមិស្ពានដែក ឃុំព្រែកទន្លាប់ ស្រុកលើកដែក ខេត្តកណ្តាល ។
មន្ត្រីនគរបាលស្រុកលើកដែកបានឲ្យដឹងថា ជនរងគ្រោះឈ្មោះ សួស កែវ ភេទប្រុស អាយុ៣១ឆ្នាំ ជនជាតិខ្មែរ មុខរបរ កសិករ (រងរបួសលើជង្គង់ខាងឆ្វេងមួយកាំបិត និងលើភួនជើងខាងស្តាំមួយកាំបិត) មានទីលំនៅក្នុងភូមិ/ឃុំកើតហេតុខាងលើនេះ ។ ចំណែកឯជនល្មើសឈ្មោះ រ៉ុង រឿន ភេទប្រុស អាយុ៣៨ឆ្នាំ ជនជាតិខ្មែរ មុខរបរ រត់ម៉ូតូឌុប បច្ចុប្បន្នកំពុងរត់គេចខ្លួនចេញពីមូលដ្ឋាន ។
ប្រភពដដែលបានបន្តថា ជនរងគ្រោះនិងជនល្មើសមានលំនៅដ្ឋានជាប់ព្រំដីគ្នា កន្លងមកធ្លាប់មានជម្លោះពាក្យសំដីដ៏រ៉ាំរ៉ៃដែលបង្កដោយជនល្មើសផឹកស្រាស្រវឹងស្រែកជេរដៀមដាមទៅលើជនរងគ្រោះ ។ លុះមកដល់ថ្ងៃកើតហេតុ គេមិនដឹងថាជនល្មើសស្រវឹងស្រាមកពីណានោះទេ គ្រាន់តែឈប់ម៉ូតូនៅក្រោមផ្ទះរបស់ខ្លួនភ្លាម ក៏ស្រែកឡូឡាដៀមដាម និងជេរប្រមាថទៅលើជនរងគ្រោះ រហូតធ្វើឲ្យជនរងគ្រោះអត់ទ្រាំមិនបានក៏តបតពាក្យសំដីទៅជនល្មើសវិញ ធ្វើឲ្យជម្លោះកាន់តែខ្លាំងឡើងៗ ។ បន្ទាប់មកជនល្មើសក៏បានយកកាំបិតផ្គាក់ពីផ្ទះរបស់ខ្លួនចូលទៅកាប់ប្រហារ ជនរងគ្រោះកំពុងឈរក្រោមផ្ទះ បណ្តាលឲ្យរងរបួសលើជង្គង់ខាងឆ្វេង និងលើភួនជើងខាងស្តាំចំនួន២កាំបិត ។
ក្រោយពីធ្វើសកម្មភាពរួចជនល្មើសបានរត់គេចខ្លួនចេញពីលំនៅដ្ឋានបាត់ទៅ រីឯជនរងគ្រោះត្រូវបានក្រុមគ្រួសារដឹកបញ្ជូនទៅសង្រ្គោះនៅមន្ទីរពេទ្យក្នុងរាជធានីភ្នំពេញ ខណៈទៅដល់មន្ទីរពេទ្យមិនបានប៉ុន្មានម៉ោងផងនោះជនរងគ្រោះក៏បានដាច់ខ្យល់ស្លាប់ ក្រុមគ្រួសារបានត្រឹមតែដឹកជនរងគ្រោះមកធ្វើបុណ្យនៅលំនៅដ្ឋានវិញ ។
បច្ចុប្បន្នសសមត្ថកិច្ចនគរបាលយុត្តិធម៌ស្រុកលើកដែកកំពុងសហការជាមួយនគរបាលប៉ុស្តិ៍រដ្ឋបាលធ្វើសវតាជាតិជនល្មើស ដើម្បីកសាងសំណុំរឿងបញ្ជូនទៅកាន់សាលាដំបូងខេត្តកណ្តាលចាត់ការតាមច្បាប់ ៕
ដោយ៖ ស្អាងជ័យ
