បើទោះបីរដ្ឋាភិបាលទីក្រុងចាការតា ប្រឆាំងក្តី តែរដ្ឋាភិបាលសិង្ហបុរីមិនបោះបង់ការចោទប្រកាន់ក្រុមហ៊ុននៅក្នុងប្រទេសឥណ្ឌូនេស៊ី ដែលបង្ករឲ្យមានភ្លើងឆេះព្រៃ ប៉ះពាល់យ៉ាងខ្លាំងដល់ដែនអាកាសប្រទេសសិង្ហបុរីនិងផ្នែកមួយនៃប្រទេសតំបន់អាស៊ាន។
ជារៀងរាល់ឆ្នាំដល់រដូវក្តៅតែងតែមានភ្លើងឆេះព្រៃបង្ករឲ្យមានផ្សែងធូលីគ្របដណ្តប់ប្រទេសសិង្ហបុរីនិងមួយផ្នែកនៃប្រទេសថៃ ហើយមានឆ្នាំខ្លះធូលីផ្សេងទៅដល់ប្រទេសវៀតណាមទៀតផង ប៉ះពាល់យ៉ាងខ្លាំងដល់សុខភាពប្រជាពលរដ្ឋ។
ចាប់តាំងពីឆ្នាំ២០១៥ មកស្ថានភាពភ្លើងឆេះព្រៃអូសបន្លាយជាច្រើនខែធ្វើឲ្យសាលារៀននៅក្នុងប្រទេសសិង្ហបុរី ម៉ាឡេស៊ី និងផ្នែកមួយនៃប្រទេសថៃ ត្រូវបិទទ្វា មនុស្សមួយចំនួនត្រូវចូលសម្រាក់ព្យាបាលនៅក្នុងមន្ទីរពេទ្យ។
រដ្ឋទូតសិង្ហបុរីប្រចាំនៅទីក្រុងចាការតា លោក Anil Kumar Nayar បានបញ្ចាក់ថា សិង្ហបុរីបានស្នើឲ្យក្រសួងយុត្តិធម៌ចោទប្រកាន់ប្តឹងក្រុមហ៊ុនចំនួន៦របស់ឥណ្ឌូនេស៊ី ដែលគេចាត់ទុកថា ជាអ្នកបង្កឲ្យមានហេតុការណ៍អាក្រក់ខាងលើ។
បើទោះបីឥណ្ឌូនេស៊ីបានច្រានចោលការចោទប្រកាន់តែសិង្ហបុរីមិនប្តូរការសម្រេចចិត្តពីមុនទេ ដោយនៅតែត្រូវប្តឹងផ្តល់បណ្តាក្រុមហ៊ុនឥណ្ឌូណេស៊ី ក្នុងសំណុំរឿងភ្លើងឆេះព្រៃដែលបំពុលបរិស្ថានរៀងរាល់ឆ្នាំ នៅតាមបណ្តាប្រទេសអាស៊ីអាគ្នេយ៍មួយចំនួន។ សិង្ហបុរីមិនលុបចោលការប្ដឹងប្តល់នេះ តាមការទាមទាររបស់ឥណ្ឌូណេស៊ីទេ។ ទំនាក់ទំនងរវាងប្រទេសទាំង២កាន់តែតានតឹងនឹងគ្នាចាប់ពីខែឧសភាមក ក្រោយសិង្ហបុរីចេញដីកាចាប់ខ្លួនប្រធានសហគ្រាសឥណ្ឌូណេស៊ីមួយរូបពីបទភ្លើងព្រៃនេះ។
រឿងភ្លើងឆេះព្រៃបំពុលបរិស្ថាននៅតាមប្រទេសមួយចំនួននៅអាស៊ីអាគ្នេយ៍មានដើមហេតុមកពីឥណ្ឌូណេស៊ី ។ រៀងរាល់ឆ្នាំឥណ្ឌូណេស៊ីដុតព្រៃដើម្បីធ្វើចំការ បង្កើនការដាំដុះដូងប្រេង។
យោងតាមរដ្ឋធម្មនុញ្ញសិង្ហបុរី ក្រុមហ៊ុនសិង្ហបុរី រឺក៏ក្រុមហ៊ុនបរទេសដែលបង្កផលប៉ះពាល់បរិស្ថាន ត្រូវទទួលពិន័យជាទឹកប្រាក់ប្រហែល១សែនដុល្លារសិង្ហបុរី ត្រូវនឹង ៧៤.០០០ដុល្លារអាមេរិក។ ក្រសួងបរិស្ថានឥណ្ឌូណេស៊ីបានប្រតិកម្មថា សិង្ហបុរីមិនអាចជាន់លើវិស័យច្បាប់ឥណ្ឌូណេស៊ីដូច្នេះបានទេ។ ឥណ្ឌូណេស៊ីលើកឡើងថា បញ្ហាភ្លើងឆេះព្រៃនេះត្រូវតែដោះស្រាយតាមបែបផែនអាស៊ានទើបជាការត្រឹមត្រូវ៕
ប្រែសម្រួល៖ សាធី
