ភ្នំពេញ៖ អគ្គនាយកអាជ្ញាធរជាតិព្រះវិហារបានបង្ហាញការសាទរចំពោះរដ្ឋាភិ បាលឥណ្ឌាដែលគ្រោងផ្តល់ជំនួយប្រមាណ៤លានដុល្លារសហរដ្ឋអាមេរិកសម្រាប់ធ្វើការជួសជុលប្រាសាទព្រះវិហារ ខណៈដែលបច្ចុប្បន្នប្រាសាទនេះកំពុងប្រឈមនឹង សភាពទ្រុឌទ្រោមគួរឱ្យព្រួយបារម្ភ។
លោក គង់ ពុទ្ធិការ អគ្គនាយកអាជ្ញាធរ ជាតិព្រះវិហារបានមានប្រសាសន៍កាលពីថ្ងៃទី៥ ខែកក្កដា ឆ្នាំ២០១៦ថា ការផ្តល់ជំនួយនេះគឺចំពេលដែលប្រាសាទព្រះវិហារកំពុងស្ថិតនៅក្នុងគ្រោះថ្នាក់ដោយសារ បញ្ហា ធម្មជាតិនិងការបង្កដោយមនុស្ស ជាពិសេស ក្រោយព្រឹត្តិការណ៍ប៉ះទង្គិចគ្នារវាងកងទ័ពកម្ពុជា នឹងកងទ័ពថៃកន្លងមក។
លោកបានបញ្ជាក់ថា ជំនួយរបស់ ឥណ្ឌានេះគឺគ្រោងយកទៅប្រើប្រាស់លើការជួសជុលខ្លោងទ្វារទី៥ដែលជាខ្លោងទ្វារសំខាន់នៃប្រាសាទព្រះវិហារ ខណៈដែលបច្ចុប្បន្នខ្លោងទ្វារនេះកំពុងមានការបាក់ បែកទ្រុឌទ្រោមដោយទឹកភ្លៀងហូរច្រោះ និងដើមឈើបាក់សង្កត់ដែលទាមទារឱ្យមានការជួសជុលជាបន្ទាន់។
លោកបានបន្តទៀតថា រដ្ឋាភិបាល ឥណ្ឌានឹងបញ្ជូនអ្នកជំនាញរបស់ខ្លួនមកពិនិត្យមើលនិងសិក្សាពីផលប៉ះពាល់មុននឹងចាប់ផ្តើមសកម្មភាពជួសជុល។
ការលើកឡើងរបស់មន្រ្តីជាន់ខ្ពស់អាជ្ញាធរជាតិព្រះវិហារនេះគឺកើតឡើង បន្ទាប់ពីលោក Naveen Srivastava ឯកអគ្គរដ្ឋទូតឥណ្ឌាប្រចាំកម្ពុជាបានសន្យាផ្តល់ ជំនួយ៤លានដុល្លារនៅក្នុងជំនួបជាមួយ លោកទេសរដ្ឋមន្រ្តី ប្រាក់ សុខុន រដ្ឋមន្រ្តី ក្រសួងការបរទេសនិងសហប្រតិបត្តិការ អន្តរជាតិនៅទីស្តីការក្រសួងការបរទេស កាលពីពេលថ្មីៗកន្លងទៅនេះ។
លោក ជុំ សុន្ទរី អ្នកនាំពាក្យក្រសួងការបរទេសបានប្រាប់ក្រុមអ្នកសារព័ត៌មានថា គម្រោងជួសជុលប្រាសាទព្រះវិហារក្រោមជំនួយរបស់ឥណ្ឌានឹងចាប់ផ្តើមនៅក្នុងឆ្នាំ២០១៦នេះហើយរាជរដ្ឋាភិបាលកម្ពុជា កំពុងសម្របសម្រួលដល់គម្រោងជួស ជុលនេះផងដែរ៕
ដោយ៖ សហការី
